內幕消息

散戶最鍾意跟消息炒股。我見過見好多內幕消息害死人的例子，不妨與大家分享，引以為戒。

這是真人真事。聽朋友講，佢一個小學同學Richard是一家中小型IT上市公司的中層，他喜歡炒股，每次遇到老闆，都畢恭畢敬地問老闆攞料炒股。有一次，公司即將公布業績，Richard遇到老闆，當然唔放過機會又攞料啦，老闆笑笑口同佢講：公司業績好好呀，真係要多謝同事的努力呀。與老闆分手後，Richard心想，「老闆主動向我報料，仲唔係擺明想益我？」

事不宜遲，Richard馬上call股票經紀落盤。經紀話隻股票今日已經升5%，Richard心諗公司後日公布業績，時間無多，於是叫經紀照價入貨，仲係全副身家50萬掟晒落去。落完盤，無錯，係落完盤，Richard襟機睇價，嚇了一跳，原來隻股票近兩三個月，已經由2元升上3元，升咗超過50%！他有少少畏高，但心諗老闆放料，點會有問題呢？於是心安理得，等住收錢！

兩日後，公司公布業績，賺咗2億元，盈利增長50%，屬於利好消息。不過，當中有8000萬元係物業重估的特殊收益。核心盈利其實只有1.2億元，按年計核心盈利增長沒有50%咁高，只係25%。

由於該股票之前已經升了不少，公布業績後翌日，股價朝早炒高5%至3.15元，好快就有沽盤湧現。股價掉頭倒跌3%至2.91元收市。Richard有點沮喪，心諗公司盈利按年升50%，股價無理由不升反跌？條氣唔順之餘，臨收市前大手加注10萬元，但股價第二日再跌。雖然隻股未有大跌，但陰陰地向下，股價在兩個星期之間唔見咗超過10幾%。Richard見到勢色唔對，終於唔等派息就忍痛打靶，埋單慘蝕7、8萬元。

Richard老闆係知情人士，告訴他的都屬股價敏感消息。因為這些消息買賣該公司股票，係內幕交易，屬犯法行為，其他人千萬不要學。

上市公司老闆、內幕人士，猛讚自己的公司業績點好點好，我已經聽過唔少。就算那些老闆並非存心欺騙，真心以為公司股價還會再升，但隻股票已經升了許多，無論係幾好的消息，已經消化晒，再升的空間有限。另外，做老闆的，睇自己盤生意，就好似自己的仔女一樣，永遠都覺得好叻、好掂。老闆仔可能叻，但未必係好似老闆想得咁叻、咁勁。你信晒佢啲消息（偏見），盲目入市，唔中招瀨嘢都幾難。所以話，消息，都係唔信好啲啦！

陸羽仁

** 博客文章文責自負,不代表本公司立場 **

港股正受好壞兩重因素夾擊，壞的影響來自美國。美國本周四披露的兩份重磅數據，令市場大驚失色。

美國商務部公佈的數據顯示，美國第一季度實際國內生產總值（GDP）按年率計算增長1.6%，預期值2.5%，去年第四季度終值爲3.4%。美國計GDP方法和外國不同，是按季度表現再年化計算，換言之，這個1.6%增長是以一季度表現推算全年增長率只有1.6%。

通脹方面，美國第一季剔除食品和能源價格的實際個人消費支出指數增長了3.7%，上季前值爲2.0%，爲一年來首次比上季環比加速，這個通脹指標是聯儲局主要參考數據。

市場面對美國經濟增長意外地差、核心通脹頑固的局面，擔憂經濟放緩通脹上升的停滯膨脹風險，似乎正在增加。美股三大指數大跌，利息上升，美元向上。

數據發佈後，利率互換市場改變了對利率預期，目前認爲聯儲局今年要到12月才會啓動降息，而不是11月。市場預計，美國有20%機會，會掉頭加息。

美股杜指上日下跌1%。

美國減息機會渺茫，香港利息短期內不會下降，對樓市特別不利，對股市也有壓抑。

另一方面，本周幾日港股上升和外資睇好有關。今日美股跌港股不跌，和外資睇好中資股票有關。

美資大行高盛近日唱好紅色股。高盛表示，中國重塑資本市場的努力，將大幅提升股票估值。高盛分析師本周二在一份報告中寫話，如果中國市場在股息支付、回購、公司治理和機構所有權等方面改革，縮小與全球領先企業運作的差距，內地A股的估值可能會上漲 40%。

歐資大行瑞銀集團也加入了這一個唱好行列，升級了對香港上市股票和海外上市中概股評級。瑞銀以中資公司的獲利有彈性，又有國家政策支持，將大摩中國指數和港股評級上調至「增持」。

今日恒指人跌佢唔跌，升366點，收17651點，相信和外資睇好，基金補貨有關。港股受冰火兩重因素夾擊，但外資大行睇好，有助抗跌。

港股周五不跌反升2.1%。