政改方案否決後，對香港民主發展前景點睇，出現南轅北轍的估計。 佔中三子之一的港大法律系副教授戴耀廷，昨日在港台《香港家書》 中話，中共可能會將今次政改失敗責任，推給反對方案人士， 雖無法估計真正民主何時到來，但佔領運動已令很多港人政治醒覺，令他對香港民主前景仍然樂觀，「 我唔知道仲要幾耐香港先有真正嘅民主，但我相信呢日一定會嚟到」 。
戴耀廷在父親節前夕，於港台節目《香港家書》寫信給女兒。 戴耀廷話，雖然經過兩年多努力，80萬人參與民間全民投票，以及79天的佔領，好像甚麼也爭取不到，但很多香港人已經政治醒覺，「香港人已經唔會再淨係坐喺度，等住當權者將民主施捨畀我哋」。不過戴耀廷無講到有乜爭取民主的具體方略。
同樣是港大法律系的基本法委員會委員陳弘毅教授則對香港將來民主發展不樂觀，佢預料，香港民主路將難再走下去，在可見將來現有的政制或會維持不變，在「一國兩制」之下， 現在的政制甚至將會是終極的政制，香港市民要有這個心理準備。政府只能盡力令本港有較好的管治，免落後於其他城市。
陳弘毅解釋，政改需要中央和立法會有共識，但可惜社會長期對政改有不同意見，在 人大8.31及中央對港政策不變的情況下，政改難以得到三分二議員支持，現有的政制只能繼續維持。經歷了過去幾年的政改爭拗後，市民都很厭倦。 如果現屆政府在餘下任期集中處理經濟民生議題， 相信會得到大多數市民支持。
高人話，戴耀廷講到只是空想式樂觀，陳弘毅就現實好多，講出香港民主路走唔到落去的實況。大家唔知記唔記得，戴耀廷等人當日提出佔中時，就係話在呢次政改中，只要佢地用佔中的方法，自首逼爆差館，癱瘓中環，就會逼到中央讓步，香港就會有民主，結果除咗佔中之外，無乜嘢事係依佢的劇本發生，所以佢對未來預測，其準確度都可想而知啦。
Ariel
** 博客文章文責自負,不代表本公司立場 **
