人氣爆登嘅網台「主播」o趙海珠（譚淇淇，Kiki）接受本網專訪時，自揭「真身」係全港首位女Rapper，原來更係一間韓式炸雞店老闆娘，「百足咁多爪」。到底呢位細細粒妹仔如何兼顧幕前幕後工作，過程係享受定難受？等佢自己答。
採訪：鍾榮傑 攝影：陳鍵樂 場地提供：Hide n' Seek
Kiki自認係「韓迷」，聽歌聽Big Bang，衣着跟韓星，食嘢要食韓式料理，仲索性同屋企人夾錢開咗間炸雞店，父母主理廚房，佢就負責店鋪設計，同埋發揮青春本錢做生招牌。開業半年就打算開分店，生意做得唔錯。
講起生意上軌道，Kiki謙虛話唔係自己叻，過程中多得好多人幫手：「我身邊都有好多創業嘅朋友。我有咩請教佢哋，大家都會好俾心機教我，提供好多資訊，真係好感恩。」佢認為成功不能單靠自己，識得同身邊人合作先會事半功倍。
幕前工作繁多，幕後仲要打理自己生意，Kiki承認好辛苦，不過只要努力有回報，犧牲啲嘢「係值得嘅」：「休息時間我會盡量就，玩樂時間真係少咗好多。以前就會話『work hard，play hard』，一半工作一半玩，一做生意先發現唔係咁簡單。不過我覺得年輕時要好好工作，玩呢啲遲吓先。」
犧牲咁多嘢，咁有無犧牲埋感情世界？KiKi無直接回答，淨係話「工作係我最大男朋友」，同埋理想對象係台灣影星彭于晏，大讚對方靚仔、做事有毅力。「我覺得男仔都係上進啲比較好。我都係個好鍾意工作嘅人，又鍾意試新嘢，我希望另一半都一樣。」
