記得霸戲哥上兩星期先講過，倒模TVB《聲夢傳奇》同ViuTV《全民造星》嘅HOY TV（前名香港開電視）選秀節目《就是青春》，因為創意零蛋實冇運行。話口未完，今日就有報道爆出節目收視，對上一集（第4集）收視只得0.3，即大約2萬觀眾接觸過，若以節目投資咗2000萬去粗略計，即要用1000蚊，先接觸到一位觀眾，條數認真和味。
負責製作《就是青春》嘅「好好製作」當然袋袋平安，但長期冇好好嘅製作，都好難贏到口碑。
香港開電視上月先改名「HOY TV」，又改埋新台徽，照理應要有番新氣象，譬如搣甩浸死板味，加多啲本地製作，或者投放多啲資源，拉籠一班年輕製作人，幫手度橋、寫script、拍攝，咁先有機會發圍。而唔係一味翻抄舊橋，用舊式思維去營運電視台。
霸戲哥認為，與其「HOY水喉」用2000萬換0.3點收視，倒不如用呢筆錢請班勁人返嚟，重新省靚個招牌好過啦。
霸戲哥
** 博客文章文責自負,不代表本公司立場 **