上星期陸羽仁講起美息下跌,可留意粵海投資(0270),話美國10年期債息跌穿3.8厘,粵投核心業務是東江水供港服務,收入穩健,近期股價慘淡,只因受累於地產業務,上星期講的時候股價是5.57元,如果末期息維持去年一樣,就有11厘息。
但講完一個星期,粵投升咗上去,周五收6.02元,現價動態息率跌到10.2厘,因為股價升咗8%,息率相應下降。
有網友問我仲好唔好買粵投? 抑或買派4.25厘息的機管局零售債券?
我答佢其實股票同債券係完全不同的東西,好似蘋果同橙,講真是難以比較。但利息下跌投資者對高息股較有興趣而已。夾硬去比較,主要關乎投資者能接受風險的程度。股票風險高啲,債券風險低啲。
機管局計劃發行最多50億港元零售債券,每手1萬元,發行年期2年半,每3個月派息1次,票面息率為每年定息4.25厘。機管局發債集資用作資本開支,包括三跑項目。今批零售債券1月17日開始認購,1月25日下午2時截止認購,2月5日發行,翌日在聯交所掛牌。
若有多餘錢,本來做長定期,估計利息向下走,機管局債券有4.25厘息唔失禮,可以認購,適合不愛風險人士。機管局不會執笠,到期可以收回本息。即使利息調頭向上,債券面值下跌,揸2年半揸到尾,都可以收回本金,極低風險。
至於粵投,股票點講風險都大啲,主要係內地地產市道進一步轉差,佢要為地產業務減值更多,股價就會跌。另一種風險是大圍的,就是美國利息不減再加,咁全世界股票都會死。但粵投勝在高息,即使減啲派息,無10厘,都有7、8厘息,退可以守。由於係廣東省政府窗口公司,唔會太差,所以有防守性。
建議想買粵投都等佢回吐,在5.7元左右才開始入,咁會安全少少。
(陸羽仁《金融High Tea》專欄,逢周一至五,在「石榴台」獨家發布,歡迎您訂閲石榴台收睇)
陸羽仁
** 博客文章文責自負,不代表本公司立場 **