昨朝出跳馬主要來自葉廄，幾位騎師亦專誠早到協助練兵，包括潘頓、田泰安、梁家俊和蔡明紹等，現將操練報道如下。
「九運」潘頓拍「開心大少」助手跳兩段，前駒走外檔，最後幾步追上反應唔差，多操下開始上力；後駒仍舊模樣，力度尚可，中規中矩。
「開心一號」梁家俊拍「其利斷金」田泰安跳兩段，前駒一直佔取上風，過終點後更彈甩廄侶，正值勇境準備就緒；後駒向來有點懶散，跳輸唔介意，神色則好過上一課。
「月球」戴頭罩由副練跳兩段，比之前一課好得多，唔再懶好肯走，馬身也收靚。
「錶之未來」戴頭罩由助手跳兩段，一貫頭岳岳，大步走過步挺開揚，精神爽利，一派高班馬表現。
「夢想成金」戴頭罩由助手跳兩段，唔規矩要緊韁抽實，肌肉有點鬆，未復最銳利時。
「紅鬃烈馬」助手跳一段，淡淡定走過，馬身結實毛色悅目，落腳爽勁有力。
「二話不說」蔡明紹跳兩段，豎高尾走是其標誌，汗濕唔多表現專注，力度愈見雄渾。
「威闖」薛恩跳兩段，快開走得起勁，神態生猛，雙目炯炯有神，朝氣旺盛。
「冠軍名駒」潘頓跳兩段，無轉腳，只是平淡走過，馬身可收得再靚，初起而已。
「確妙星」戴頭罩由副練跳一段，一貫火猛搶走，外觀已做得好靚，曾有傷患之馬，近期可多操好現象。
「打鐵趁熱」戴頭罩由潘頓跳兩段，步順力充足，馬身壯健，近況對辦。
「燈胆友」薛恩跳兩段，大馬好輕身，出腳唔論盡，傷瘉後第一課出跳已及格。
「閃電烈馬」潘頓拍「紅旺」助手跳兩段，前駒走外檔，身色皆靚，落腳輕巧流暢，勇況已備；後駒唔急唔更見淡定，愈見大將之風。
「銀河飛馬」戴頭罩由助手跳兩段，谷起雞公頸甚威武，而且又唔太急，極具好感。
「超班福星」戴頭罩由史卓豐跳兩段，雖直路中段內閃，但好似無以往咁搶口，神態軒昂火力兼備。
