網上流傳一段疑似東鐵線車廂內的影片,當中一名師奶因後生仔伸腳碰撞問題與其發生爭執,過程中師奶苦口婆心教訓生仔超過四分鐘引網民熱議。
港鐵後生仔行李頂腳拒讓 師奶激動教訓
有網民於Facebook群組「香港突發事故報料區及討論區」上載一影片,事發地點為港鐵東鐵線頭等車廂內,後生仔與師奶面對面而坐,後生仔將行李放在腳前,佔用了座位間的通道。坐在對面的師奶疑因後生仔的腳碰到她,而對方拒絕退讓,雙方隨即發生口角。
師奶:「點解要我縮開啊?細路哥!」
後生仔:「因為你砸到我隻腳。」
師奶:「咁你隻腳唔伸埋嚟我點會砸到你呀?我頂住個膝頭哥我唔出聲,我覺得好閒㗎咋,你有行李OK,你有行李你應該自己去處理,點解要佔人哋個位呢?你講吓道理呀。我以為你唔識講廣東話,原來你咁叻仔!」
師奶繼續教訓後生仔:「真係搞唔清楚,唔好成日話香港人蝦你哋啦,你哋要用下個腦,諗下嗰啲條件、規矩!」
後生仔:「我香港人嚟㗎!」
師奶:「我唔理你咩人啊!」
後生仔:「你唔係人!」
師奶:「我幾十歲呀,d後生仔,你係香港人都唔知呢啲事情!」
後生仔:「你啱晒!」
師奶更激動:「你做咩要我拎開啲嘢啊?你隻腳伸去人哋嗰度叫人哋拎開啲嘢?你伸去人哋屋企啊隻腳啊,然後你叫人哋搬啊,傻佬!」
後生仔:「我隻腳伸到先算啦,如果隻腳早過人哋搬入去,以前十幾年擺埋嗰度,妳仲要人哋搬啊?」
師奶:「我一齊同你落去講道理啦不如。」
後生仔:「妳落去講啦,我繼續喺車上面。」
師奶:「我繼續擺喺度,你知唔知道你好醜啊,隻腳伸去人哋嗰度,仲叫人哋拎開啲嘢啊。我真係話畀你聽啊,你真係係咪讀緊書㗎,如果讀緊書,你返去問吓miss問吓你嗰啲先生!真係激死人!」
期間,坐在後生仔隔離的男乘客疑嫌他們太嘈而離開,其他乘客亦嘗試阻止二人爭嗌,但師奶未有理會,繼續教訓後生仔。
師奶:「講到而家你仲唔明!你講咩女人俾我影衰呀,我唔出聲就真係影衰女人,你返去問你阿媽啦!」
後生仔:「我淨係請你攞開個袋,你砸到我隻腳,咁小事妳都要咁大聲。」
師奶:「我梗係要大聲啦,細聲你又唔明,你阿媽都唔知用咩養大你,你仲唔明白,仲話自己係香港人!」
後生仔:「你講嘢唔好侮辱我父母!」
師奶:「你唔係講咩影話我影衰啲女人啊,我都唔會咁樣話畀你聽啊!」
師奶又問其他乘客:「各位,我自己坐自己個位自己擺自己個嘢,人哋頂住我仲要我拎開啲嘢,啱唔啱啊?」
後生仔:「人哋成個車廂都嫌你煩啊,黐線」
師奶:「嫌我煩,定嫌你啲細路哥冇禮貌冇道理啊,道理都唔識講你點讀書啊。」
後生仔:「你嫌我煩你落車囉!」
師奶:「我唔識你,我更加要鬧你!我就係唔識你我先要鬧你啊,如果我識你,我冚你兩巴啦,細路哥!唉!」
爭執持續了4分多鐘,期間師奶試圖讓其他乘客「評評理」,並不斷指責後生仔無禮貌,最終,坐在旁邊的大叔站起讓座,師奶隨即轉位離開,但仍繼續批評後生仔,後生仔則坐在座位上看手機,未再理會師奶,至影片結束。
網民唔撐後生仔
影片曝光後,不少網民批評後生仔的行為「阻到人仲大條道理,呢條x樣真係博打」、「個細路果種不可一世,覺得自己無問題果下抵俾人x」、「個靚仔成架車仔隊入去,好心就坐出邊啦」、「不知所謂的死𡃁仔,影衰後生仔!」、「條𡃁仔真係態度又差,一啲教養都冇,行為有有問題,好自私」。
網獲激讚師奶:鬧得好!有Point !
網民大撐師奶「姨姨都鬧得好有厚度」、「阿姨已經好有禮貌咁幫埋佢老母教仔,阿姨心地真係好,又有耐性」、「點解冇人幫亞姐鬧醒個XX仔」、「咁我撐阿姨喎,阿姨有道理喎」、「其實阿姐講嘢幾有point㗎!」、「罵左咁耐,條靚仔隻腳郁都唔郁,就明白阿姨點解咁火」。
帖文來源:Facebook群組「香港突發事故報料區及討論區」