不得承應，霸戲哥今鋪真係跌晒眼鏡。原以為無綫套《家族榮耀》都係類似現代版《金枝慾孽》crossover《溏心風暴》，同一般女人爭產劇冇乜分別，點估到今晚大結局，係我要求豬視妹陪我睇。

令霸戲哥改觀嘅，係個劇本結構紮實，唔會突然大暴走，雖然都偶有出現膠化情節，但整體都可以接受。而每位出現角色都有其陰暗面，性格轉變唔會太突兀，都係順住劇本走。呢點，幾位編劇蔡淑賢、廖雨琦、蘇侃風同馮偉濤應記一功。

至於去到結局篇，楊怡（即楊茜堯）演技大爆發由頭帶到落尾，嗰種善良外表包裝住嘅邪惡，真係由骨到滲出嚟。所以話，「最毒婦人心」我時刻記住，同咪千祈咪得罪女人。

結局唔算太出人意表，而臨尾出場嘅羅嘉良亦唔算驚喜（預告出晒啦），相信係為續集鋪路啦。




霸戲哥

** 博客文章文責自負,不代表本公司立場 **