好耐冇睇過一齣咁爽嘅印度奇片，霸戲哥真係要瞓身推介。片名《RRR》，唔係朗拿度呀、Rosanne嗰啲，3R係Rise、Roar同Revolt，係講革命嘅，依家喺Netflix熱播。Roar~

霸戲哥無意捲進印度同英國嘅殖民紛爭，但睇戲就知，印度人應該好憎英國佬，將佢哋妖魔化成畜牲都不如。呢齣好明顯係印度主旋律飛機片，但who cares?

故事背景設喺印度獨立之前，英國總督強行擄走貢德族女孩瑪莉，獵人畢姆死命營救，中途認識警員阿蘭，又因兩人神功蓋世，建立一段可歌可泣嘅bromance⋯⋯

喂劇情唔重要啦好冇，反正觀眾睇得爽就得。唔好畀三粒鐘片長嚇親，成齣戲由頭爽到尾，要動作有動作，要感人有感人，要靚女有靚女（又係 Alia Bhatt），要歌舞有歌舞。總之一切都盡在導演嘅掌握中。

觀眾睇呢類爽片，亦唔使計較力學同邏輯，成個甄子丹咁款嘅阿蘭，打到腳跛血盡，嗌幾聲又滿血；貌似沙拿嘅畢姆，唔止係不死身，仲識召喚百獸攻擊，狗扯到不行但我buy！最爆笑係嗰啲煞有介事嘅慢鏡同定鏡，除咗營造爽感，對劇情推進係完全無幫助嘅。

霸戲哥同豬視妹睇到眼球都飛埋出嚟，呢三粒鐘，爽呀！




霸戲哥

** 博客文章文責自負,不代表本公司立場 **