連詩雅(Shiga)是呢期的負評王,跟葉蘊儀幫ViuTV拍攝《跟住矛盾去旅行》因表現作狀,被網民狠批為「極級港女」。面對着一大籮的負評,Shiga接受《頭條日報》專訪時坦承唔開心:「呢啲咁有話題性嘅說話當然唔會好聽。」更為自己平反:「我點會係港女?啲人睇得太表面。」
「紅人」連詩雅新歌《血一般紅》講述被另一半背叛,女方策劃連串報復行動後決定唔再做受害者,所以她狠心剪去10吋長髮來配合,不論歌曲風格及造型都係新嘗試。
傳跟Shiga拍拖3年的麻將大王石鑑輝家族成員石恒聰(Anthony)因第三者介入而移情別戀,對於失戀時演繹失戀新歌,指與自己的現況有所不同:「兩個case唔同,《血一般紅》係講男仔背叛,個故事都幾激,真實版失戀好平靜,人愈大愈變得冷靜,大家都係大人會坐低去傾,受情緒影響會作出唔理智決定,嬲完後會後悔自已意氣用事。」
對於分手一事,她堅持分手原因是雙方都太忙,為事業放棄筍盤,Shiga強調唔心痛,「哈!我都係筍盤啫,睇緣份啦,兩個人拍拖唔一定要睇對方有冇錢,係咪有家底,擁有啲乜。」
她順道澄清,現居的九龍塘寓所由母女兩人租用,並非傳聞中Anthony未下逐客令暫畀兩人住:「屋租係同媽咪一齊分擔,同任何人無關,今時今日我所擁有嘅嘢係媽咪努力工作所得。」
Shinga之後又說起自身的過去經歷:「17歲開始已經濟獨立唔使任何人照顧,特別見到父母分開,已明確地同自己講,要有能力養活自已,除咗媽咪無邊個都得,因為永遠唔會知道身邊人幾時會離開。」
在播完《跟住矛盾去旅行》後獲封港女,Shinga立即否認,甚至說:「話我係港女啲人睇得太表面,佢哋唔知我經歷就話我。其實不得不讚《跟住矛盾去旅行》剪接得好成功營造到效果,做到好緊湊同埋好有火花,增加好多娛樂性話題。」
唔係「極級港女」,連詩雅眼中嘅自己係乜?她大笑說:「熱愛唱歌嘅正常女仔,畢竟係一個人,所以興奮時會變得高音,係咪港女好難有一個準則,每人心目中港女定義都唔同,所以我冇諗得咁複雜呀,最重要係做好本份。」她又指,選擇這份工作已知要食得鹹魚抵得渴,「鍾意你嘅人點都鍾意你;唔鍾意嘅亦都一樣,我又唔係傷害到人,呢啲嘢控制唔到,唯一會提醒自己唔好咁high咁高音。」
至於用字中英文夾雜方面,她坦言沒有辦法,因為自己沒有正式學過中文,「拍嘢時諗唔到個Terms只有咁樣去表達意思,而廣東話不時有捲舌R音亦唔係刻意,係我一向冇留意,好難令全世界咁please自己,唔通因為咁以後唔講嘢?唔發Post咩?」