黃淑儀多年來背劇本一定要寫一次!
73歲的黃淑儀(Gigi),由19歲拍第一套劇集《夢斷情天》出道,入行超過半世紀,雖然Gigi 姐近年主持烹飪節目較多,但對於演藝工作仍有追求,為挑戰自己去年9月參演音樂劇《伴我同行》,演出大獲好評。
![早前內地全面通關,黃淑儀參加香港飛北京旅行團, 接受內地傳媒訪問新聞片段中以「黃淑儀香港遊客」稱呼她,引起網民關注。](https://image.bastillepost.com/1024x/wp-content/uploads/hongkong/2023/02/_2023021801531376709.jpg.webp)
早前內地全面通關,黃淑儀參加香港飛北京旅行團, 接受內地傳媒訪問新聞片段中以「黃淑儀香港遊客」稱呼她,引起網民關注。
Gigi姐早前更首度公開有讀寫障礙,多年來讀劇本為演出做準備,比一般人要花更多功夫,她一直以為是自己蠢兼記性差,但她依然很享受這份工作,不斷增值自己。Gigi姐又分享近年榮升嫲嫲,弄孫為樂相當開心。
![去年9月,Gigi姐跟焦媛合演音樂劇《伴我同行》,劇中演工人「和姐」。](https://image.bastillepost.com/671x/wp-content/uploads/hongkong/2023/02/_2023021801531422476.jpg.webp)
去年9月,Gigi姐跟焦媛合演音樂劇《伴我同行》,劇中演工人「和姐」。
Gigi姐為演出音樂劇《伴我同行》,去年8月專程由溫哥華返港演出,她解釋相隔21年再答允藝術總監兼監製高志森邀請演出舞台劇,全因想挑戰自己,「到咗呢個年紀都想挑戰舞台劇,因為冇得NG,拍電視劇有得NG,咁我做唔做到呢?同埋知道個對手係焦媛,我就即刻應承,我睇過好多焦媛嘅舞台劇,最深刻印象有次唔記得咩劇名,知道係焦媛做就入去睇,睇極點解仲未到焦媛出場嘅,原來佢少女咁戴咗個bob頭,喺度又唱又跳,佢舞台上嘅身體語言係一流,完全認唔到佢,合作之後發覺大家嘅交流擦出火花好多,佢幫咗我好多。」正因合作太愉快,而音樂劇排練需時,只演出4場Gigi姐大呻唔夠喉,「感覺好似排咗咁耐,大家嘅付出咁多做得四場,而且反應咁好,我自己都估唔到。」
![Gigi姐收到高志森邀請,知道拍檔是焦媛即答應演出。](https://image.bastillepost.com/803x/wp-content/uploads/hongkong/2023/02/_2023021801531515307.jpg.webp)
Gigi姐收到高志森邀請,知道拍檔是焦媛即答應演出。
畀拍檔何守信取笑太勤力
演出多年,經常要熟讀劇本的Gigi姐,早前首度公開患有讀寫障礙,「人哋講咗我都唔得,我一定要寫低先記得,有時影咗張相我都要做手腳,呢個係邊個,見返面我先會知,如果唔係個樣認得,但唔記得個名。」她一直沒察覺記對白要靠寫低劇本,直至年前經丈夫發現她這情況都屬於讀寫障礙,「其實都好耐,不過我一路諗住係咁樣做功課冇事,以為自己蠢或者記性差,我先生見到我成日都要寫過晒啲對白喎,佢就提我呢啲都屬於讀寫障礙。」
![Gigi姐獲醫生丈夫徐景清提醒,原來患有讀寫障礙。](https://image.bastillepost.com/939x/wp-content/uploads/hongkong/2023/02/_2023021801531644485.jpg.webp)
Gigi姐獲醫生丈夫徐景清提醒,原來患有讀寫障礙。
除了背對白困難,做主持要記硬資料更加考起Gigi姐,當時還被《歡樂今宵》的拍檔何守信取笑,「何守信話『你使唔使做咁多功課,你使唔使乜都寫住佢,使唔使咁勤力呀』,其實我唔知道自己有缺憾,唔勤力唔得。」就連她自己寫的食譜,也因為讀寫障礙問題,每次拍節目煮之前都要溫習。不過竟然「飛紙仔」(即場才收到劇本)時,Gigi姐反而應付自如,「我睇完劇本寫一寫,寫完後即刻拍,我記得拍《肥田囍事》同許志安胡杏兒有場戲,係我喺度教訓佢哋,全場戲係我講,『飛紙仔』嚟到,我哋一齊化緊妝,我就喺度寫寫寫,對一次跟住就拍,安仔話『你真係犀利,畀着我今晚都收唔到工』,不過呢啲記得快掉得快,出咗廠頭先嘅對白就冇晒。」
![Gigi姐就連自己寫的食譜要記熟,都要下廚前先溫習。](https://image.bastillepost.com/800x/wp-content/uploads/hongkong/2023/02/_2023021801531721089.jpg.webp)
Gigi姐就連自己寫的食譜要記熟,都要下廚前先溫習。
坐車睇人鬧交儲演戲素材
不過演戲經驗豐富的Gigi姐,依然覺得自己有所不足,「雖然我有讀麗的電視訓練班第2期,但訓練咗3個月已經調咗去配音組,之後就報告新聞,所以我喺戲劇班學到啲理論係膚淺到不得了。」既然理論基礎不夠,Gigi姐唯有靠日常生活來吸引演戲素材,「我鍾意坐地鐵同埋巴士,我喺車度會睇人哋啲表情反應,尤其係鬧交我仲會睇,鬧人嗰個點,被鬧嗰個點,喺現實生活入面搵多啲呢啲嚟模仿,唔可以話我係明星,地鐵巴士都未坐過,咁你點去演戲呀?!正所謂太過離地,唔係所有角色吓吓都做千金小姐,如果生活永遠係不食人間煙火,你成世做神仙咩!?」
![Gigi姐當年做主持為背熟稿狂做筆記,還被拍檔何守信(右一)取笑。](https://image.bastillepost.com/1024x/wp-content/uploads/hongkong/2023/02/_2023021801531832173.jpg.webp)
Gigi姐當年做主持為背熟稿狂做筆記,還被拍檔何守信(右一)取笑。
Gigi姐認為要有生活體驗先至做得到戲,「我成日都話你唱歌跳舞,一日唔練就冇,但係演戲你唔使周圍去練習演戲,人生嘅經歷愈豐富演戲會愈好。老實講睇其他人演出,佢都係演出嚟,但係我喺生活裏面留意身邊啲人,就容易吸收得到,你做出嚟定係發自內心會睇得出,多少少就會嫌造作。」欣賞踏實演技派的她,近年除了焦媛外,就喜歡睇潘燦良演出,「好多時舞台劇演員,一去到電視就會浮誇咗,但佢冇。」
![Gigi姐跟胡杏兒拍《肥田囍事》要「飛紙仔」,她反而應付到。](https://image.bastillepost.com/460x/wp-content/uploads/hongkong/2023/02/_2023021801531932735.jpg.webp)
Gigi姐跟胡杏兒拍《肥田囍事》要「飛紙仔」,她反而應付到。
開心同孫仔每日視像傾偈
雖然Gigi姐依然有戲癮,但除了現在難遇到有發揮角色外,還因為近年她可以弄孫為樂,「聽見好多人話退咗休,除非有好劇本就出嚟做,我都係有呢個保留同心態,𠵱家做唔做對於我嚟講都係湊孫會開心啲。」
![19歲的Gigi姐,與馮淬帆拍攝第一套劇集《夢斷情天》正式出道。](https://image.bastillepost.com/1003x/wp-content/uploads/hongkong/2023/02/_2023021801532052964.jpg.webp)
19歲的Gigi姐,與馮淬帆拍攝第一套劇集《夢斷情天》正式出道。
先後有兩段婚姻的Gigi姐,共育有1女3子,長子和次子先後誕下孫女和孫仔,雖然孫女不在身邊,孫仔一星期只見1次,已令她非常開心,「孫女5個月大,喺三藩巿嗰邊,我會特登飛咗去三藩巿探吓佢,孫仔就嚟滿兩歲,識行識走又識表達少少意思。」就算她返了香港,一樣每日同孫仔視像見面,「新抱放工返嚟開始煮嘢食,我個仔等佢唔好阻住媽咪做嘢,就叫佢打電話畀嫲嫲,佢一見到我就叫嫲嫲,但係叫得兩聲佢自己走佢玩,但喺視像度可以望住佢,同佢傾吓偈,有時佢耐唔中會抬頭望吓你,佢叫得最準就係叫嫲嫲,叫爺爺變吔吔,爹哋就類似打打,總之叫得嫲嫲最準,哈哈!」
![身材高挑的Gigi姐,入行初期連模特兒工作都試過。](https://image.bastillepost.com/460x/wp-content/uploads/hongkong/2023/02/_2023021801532142041.jpg.webp)
身材高挑的Gigi姐,入行初期連模特兒工作都試過。
![1980年,黃淑儀跟周潤發、謝賢和呂良偉合演《上海灘續集》。](https://image.bastillepost.com/1024x/wp-content/uploads/hongkong/2023/02/_2023021801532323893.jpg.webp)
1980年,黃淑儀跟周潤發、謝賢和呂良偉合演《上海灘續集》。
![70、80年代,Gigi姐成為TVB當家花旦之一。](https://image.bastillepost.com/557x/wp-content/uploads/hongkong/2023/02/_2023021801532481154.jpg.webp)
70、80年代,Gigi姐成為TVB當家花旦之一。
![Gigi姐有1女3子,長子和次子已為她添了孫仔孫女。](https://image.bastillepost.com/460x/wp-content/uploads/hongkong/2023/02/_2023021801532538638.jpg.webp)
Gigi姐有1女3子,長子和次子已為她添了孫仔孫女。
![孻仔徐肇平跟隨Gigi姐步伐入行,亦有推出烹飪書,但Gigi姐不望他繼承衣缽,只望他搵到滿足感。](https://image.bastillepost.com/1024x/wp-content/uploads/hongkong/2023/02/_2023021801532676124.jpg.webp)
孻仔徐肇平跟隨Gigi姐步伐入行,亦有推出烹飪書,但Gigi姐不望他繼承衣缽,只望他搵到滿足感。
![73歲的Gigi姐現在對選擇工作的要求,角色有發揮最重要。](https://image.bastillepost.com/1024x/wp-content/uploads/hongkong/2023/02/_2023021801531242233.jpg.webp)
73歲的Gigi姐現在對選擇工作的要求,角色有發揮最重要。