28歲名媛蔡天鳳(Abby)於今年2月慘遭碎屍肢解,事件震驚全城。其家人6月18日在大圍寶福紀念館為她設靈,多位圈中人亦有致送花圈悼念。《東張西望》6月18日播出現場情況,當中有觀眾向《東張+》提供數張靈堂內的照片,見到一遍粉紅的靈堂正中,掛上「永遠懷念」,左右兩側擺滿白色蘭花,前面兩個心形粉紅玫瑰,由蔡天鳳母親及奶奶致意。而好友劉倩婷接受主持梁敏巧電話訪問,大談蔡天鳳家人現況。
劉倩婷表示:「呢段時間都有見面,我哋都好關心佢屋企嘅狀況,或者佢小朋友點呀,唔會係短時間可以平復到嘅事,但我已覺得佢好努力。前兩日見到Chris(蔡天鳳丈夫)佢話社工上咗屋企,陪佢一齊同啲小朋友講,星期日就要送走媽咪,跟住社工問啲小朋友有冇啲咩想問㗎,跟住小朋友話,冇喇!我唔想再講喇,因為我唔想爹哋再喊,所以我想同Abby講,佢可以安心,因為啲小朋友真係好生性,好孝順,佢真係教啲小朋友教得好好。」
對於有指蔡天鳳母親五姐申請做遺產管理人,盼取得孫兒的撫養權,代替愛女照顧。劉倩婷說:「我就聽Chris講,佢(五姐)都好努力照顧啲小朋友,其中有四個小朋友要照顧,都唔係簡單,佢哋都好叻。」劉倩婷希望大家好好送走蔡天鳳,亦希望對方的家人堅強。