Twins演唱會優先訂購秒速爆滿 開心宣佈加開兩場

Twins相隔9年重返紅館，演唱會優先訂購兩小時售完，下午即刻宣佈，加開1月28日至29日兩場。

《TWINS SPIRIT SINCE 2001 LIVE IN HONG KONG》演唱會，11月15日進行優先訂購，秒速爆滿！主辦單位英皇娛樂即時開心宣佈，加開兩場，由6場變8場！門票將於11月22日起城市售票網公開發售，撲唔到的朋友，22號要仍有機會可以搶到飛。

Twins情同姊妹，一齊經歷起跌

Twins相隔9年重返紅館

Twins相隔9年重返紅館，一話開騷，已經瘋狂引爆回憶殺，內部認購前所未有咁瘋狂，兩日已經爆瀉，而15日早的優先訂購，不到兩小時已經宣佈售完，下午英皇娛樂即時宣佈，加開1月28日至29日兩場，門票將於11月22日起城市售票網一起公開發售。 

今早的優先訂購，不到兩小時已經宣佈售完

過去Twins於紅館，最多都係開5場，今次破紀錄開8場，不單令粉絲興奮若狂，亦令阿SA(蔡卓妍)阿嬌(鐘欣潼)開心，阿sa謂，「以組合來講，入行22年仲可以開演唱會，企喺個枱度同大家慶祝，真係好難得！所以呢個演唱會對我哋嚟講係好有意義！知道咁多人仲繼續支持我哋，又感動又開心！希望到時大家可以有一個好好玩嘅晚上。」

過去Twins於紅館，最多都係開5場，今次破紀錄開8場，不單令粉絲興奮若狂，亦令阿SA(蔡卓妍)阿嬌(鍾欣潼)開心

細心一睇，今次演唱會的公售日期，正是阿SA生日，而演唱會頭場，就係阿嬌生晨，問到兩人係咪特登揀呢兩個良辰吉日㗎？阿SA表示，「梗係唔係啦，真係咁橋喎，紅館期邊有得揀話想邊日，第一次公司同我哋講個開騷日期，我地都覺得好奇妙，所以公司就話，不如係我生日個日公開發售啦！咁兩個生日都可以雙喜臨門啦！ 」阿嬌表示，「揀得中呢兩個日子售票同開show都係第一次，覺得好開心好受重視，哈哈。加場雖然開心，但都開始有啲壓力㗎，希望到時可以做到最好比大家！」

今次演唱會的公售日期，正是阿SA生日，而演唱會頭場，就係阿嬌生晨

問到阿SA係咪已經諗定今年點大事慶祝生日兼演唱會大爆，阿SA: 「下，哈哈，好成績先諗點慶祝啦！今年生日願望一定係做好個演唱會。重有係身體健康啦，嚟緊要開始排舞練歌，好身體好緊要。」14日兩人就為演唱會開始籌備開會，阿嬌因身在外地工作，只得用電話facetime參予，齊齊開了4小時會議，整個開會過程都充滿歡樂笑聲，齊齊揀歌，阿SA更即時就自行排舞給阿嬌看，很是搞笑。之後兩人又FaceTime中合照留念。

兩人就為演唱會開始籌備開會

用電話facetime參予，齊齊開了4小時會議，整個開會過程都充滿歡樂笑聲，齊齊揀歌

Twins Spirit世界巡迴演唱會完美結束。

Twins今年年頭開始《Twins Spirit 世界巡迴演唱會》，巡足一整年，聖誕於英國倫敦OVO Arena Wembley演出完滿成功結束，日前又從倫敦飛到新加坡做了兩場，所到之處都非常受歡迎。

Twins於新加坡舉行《Twins Spirit 世界巡迴演唱會》尾站。

Twins於新加坡舉行《Twins Spirit 世界巡迴演唱會》尾站。

阿Sa不捨變喊包。

英國的騷，黃偉文（Wyman）、JW也有去捧場，氣氛超級熱烈，兩人本想同美國一樣繞場握手，但因為歌迷太瘋狂關係，只得在台前握手，去不了後方，而Wyman亦拍下騷後感，大讚Twins演出精彩，「有生之年都冇諗過，可以聽到呢首歌《你最紅》live呀大佬！」此外又公開收到阿Sa特地帶來的厚禮，非常開心。

而新加坡站不單是Twins出道至今的第100及101場演唱會，並且是《Twins Spirit 》這個騷的最終場，舞台上跟歌迷暫別，歌迷台下大哭，兩人也被感動得眼眨淚光，慶功時阿Sa跟一班Dancer擁抱，又再忍不住落下不捨眼淚。

阿嬌高呼要放假。

回想這一年來的努力，阿Sa（蔡卓妍）謂走過世界各地，並且完成第一次倫敦開騷的夢想，是一件非常開心的事，由香港站開始，真的從來沒想到可以走足一整年：「每一站都有難以忘記美好回憶， 其中應付『時差』對我來講最難忘。美加巡迴不停去完東岸又去西岸，連續21日，返香港一個禮拜又去倫敦，喺倫敦過埋聖誕又直接去新加坡，覺得自己啲體能都真係算係咁。」

獲黃偉文（Wyman）捧場。

談到英國之旅，阿Sa完騷後，有留下放一個短假，與媽咪、容祖兒、黃偉文等好朋友一起過聖誕：「英國之旅好開心呀，因為第一次同媽咪喺外國過聖誕，好多朋友都過埋嚟一齊玩，見到阿Y同君如姐啦，阿祖啦，馬天佑啦，仲有我一啲移咗民去英國舊同學，呢個咁難得嘅聖誕party，我哋都籌備咗一陣，大家齊心協力先可以達成，真係好難忘好好玩好耐冇過過一個咁多人咁開心嘅聖誕節。」

新加坡慶功上，Sa坦言走到最後一站有點不捨：「每個演唱會都會有結束嘅時候嘅，當然會唔捨得，喺個台上面見到有好多歌迷都喊，搞到我都忍唔住。當你企喺個台上面，見到台下面嘅觀眾好投入咁跟住你唱歌，對住你好開心咁笑，好留心咁聽你講每一句說話，係真係好感動。我會永遠都記得呢啲畫面。慶功時啲dancer唔捨得，一個二個喺度喊，所以又搞到我忍唔住，一開咗個掣就好難停㗎啦，哈哈。我成晚好耐都平復唔到心情，瞓咗冇一個鐘就要起身執行李出機場。」

Twins完成第一次倫敦開騷的夢想。

Twins唱足101場。

=

回港後，Sa表示要集中火力做電影宣傳：「電影農曆年上，我都好期待。因為成套戲啲演員都好好笑，好期待謝票嘅時候同佢哋一齊玩一齊吹水，一定笑死我。今年係超級無敵忙碌嘅一年，都真係有啲攰，我諗下年真係要放慢少少腳步，唔可以走太快。長命功夫長命做吖嘛！」

Wyman大讚：「有生之年都冇諗過，可以聽到呢首歌《你最紅》live 呀大佬！」

阿Sa與容祖兒一起過聖誕。

至於阿嬌（鍾欣潼）就表示巡足一整年非常難忘:「我同阿Sa都經常係台上面講，我哋每一次演唱會，都會當係最後一次，今次都唔例外，無人知日後幾時再開，我真係要好好放一個假，已經同公司申請了，我要好好休息，養足精神。美加及倫敦如夢如幻，要敵過時差，但又實現了倫敦OVO Arena Wembley開演唱會的夢想，非常多謝歌迷，這次巡演的一路相伴，佢哋做左好多應援，有忠粉Twins先行到咁遠。同埋第一次係英國過聖誕，好有氣氛，都難忘，我買咗好多聖誕裝飾返屋企裝飾自己個聖誕樹。」

阿Sa兩母女

阿Sa坦言從來沒想到可巡足一整年。