初三啟豪更加去搵真銀，獲旅行社邀請跟前輩李龍基上中山登台
十二月、一月不斷有演出嘅英國豪羅啟豪（Ramon）嚟到農曆新年繼續忙不停。繼佢連同一班中年好聲音第一季及第二季參賽者與一眾 TVB 藝員及歌手年三十晚喺油麻地天后廟為新年倒數後，初二更有份為一年一度嘅花車巡遊匯演演唱。嚟到初三啟豪更加去搵真銀，獲旅行社邀請跟前輩李龍基上中山登台。今次 Ramon 第一次去內地登台，好多豪殼（歌迷暱稱）都遠渡而嚟撐場。偶像一出場同大家拜年並帶嚟觀眾耳熟能詳嘅〈愛是永恆〉，觀眾聽到熟悉嘅前奏幾時熱烈歡呼。唱罷，啟豪喺台上分享話原來中山係自己公公嘅鄉下，不過自己對中山嘅認識唔深，希望以後有機會多啲嚟認識呢個地方。佢隨即用普通話向觀眾拜年同埋唱出〈親密愛人〉。之後佢揀嚟最近同譚輝志喺中年好聲音第二季令輝取得第二個MVP嘅歌曲〈今天等我來〉。Ramon 先前亦喺社交平台分享自己好開心呢首歌上咗串流平台嘅熱門排行榜，一個禮拜嘅點擊率更合共超過四十萬，怪不得豪殼聽到佢唱呢首歌嘅獨唱版都非常興奮。然後可能因為新年關係，英國豪少有地一連唱兩隻快歌〈夢伴〉同〈愛將〉，加埋個個都識跟住唱嘅〈霧之戀〉，將現場氣氛推向高峰。最後，估唔到年紀都算後生嘅羅啟豪帶嚟羅文嘅〈好歌獻給你〉為演出作結。
表演期間，Ramon 不斷有觀眾上前派利俾佢同埋同佢自拍，佢都一貫笑到見牙唔見眼，來者不拒。啟豪話：「以前睇演唱會嘅片段，見到好多前輩例如李克勤同譚詠麟新年期間開演唱會觀眾會派利是，今次自己可以體驗一下覺得好得意，同埋真係好多謝每一位送俾我嘅呢啲祝福同心意。」演出唯一美中不足嘅係，當啟豪正準備唱《霧之戀》之時，咪高峰竟然突然冇電，令演出暫停近三分鐘。好在意外唔係演唱緊一首歌嘅中途發生，而觀眾更加趁呢段時間湧上台邊俾利是啟豪同埋同佢自拍，氣氛完全冇受影響。隨後工作人員將新咪交俾啟豪，至令佢可以繼續演出。
問到英國豪佢嘅新歌幾時推出，佢就話聽公司講話好快，呢個消息必定令佢嘅歌迷引頸以待。不過喺日前嘅初一，啟豪都喺自家YouTube 頻道為當中一個叫「歌曲重 Sung」嘅系列推出咗「新歌」。啟豪想透過呢個系列重唱一啲舊嘅冷門歌或者一啲自己鍾意嘅舊歌，向有份參與嘅音樂人致敬，以及將歌曲重新介紹畀樂迷。今次嘅「新歌」係葉蒨文超過三十年前嘅一首作品〈回歸自然〉，係當時 TVB 一套叫《又是冤家又聚頭》嘅電視劇嘅片尾曲，由鮑比達作曲、編曲及盧永強作詞。啟豪同製作團隊特別前往流水響為 MV 取景，以香港少見嘅紅葉作背景。歌曲嘅 MV 留言區內雖然好多網民表示從未聽過呢首歌，但都一致大讚啟豪演繹得好，並形容一向靚聲嘅佢將首唱到好似新歌咁。問啟豪點解揀選翻唱呢首歌，佢話：「我由細到大都好鍾意、好鍾意呢首歌嘅旋律，加上歌詞以大自然嘅生態作比喻，鼓勵人與人之間要回復真我、重拾友善態度，為彼此重新帶來最真、最自然嘅互動，所以我覺得喺大年初一送呢首歌俾我嘅歌迷，為大家帶嚟一個咁正面嘅訊息最適合不過。」問佢覺得葉蒨文聽到有人翻唱自己一首咁舊嘅冷門歌會有乜嘢感覺，啟豪話：「我唔奢望葉蒨文前輩會特別鍾意我嘅演繹，我只希望有人會轉發呢首歌畀佢聽，因爲有機會畀佢聽到我嘅版本已經係我好大嘅榮幸。」希望啟豪如願以償。
網民欣賞啟豪翻唱30年前冷門歌
網民欣賞啟豪翻唱30年前冷門歌
