謝君豪開大師班傳授影帝級演技 見證學員蛻變盼獲演出機會

成就解鎖！

影帝謝君豪從影多年獲獎無數，演技毋庸置疑，豪哥亦演而優則教，最近特意抽空開辦大師班授徒，指導一眾新演員演技，當中包括劉沛蘅（Hiliary）、陳毅燊（ANSONBEAN）、陳紫萱（Summer）、林熙彤（Hazel）等。日前十堂的演技課圓滿結束，學員們難得獲影帝賜教，都非常榮幸，亦感激豪哥傾囊相授，而見證學生們的蛻變，豪哥都非常自豪，猶如成就解鎖：「佢哋每個人都有唔同嘅成長，呢樣嘢令我感覺打咗支強心針，即係自己教導都有啲成果，好似少少成就解鎖！」

影帝謝君豪最近特意抽空開辦大師班授徒，指導一眾新演員演技。

豪哥見證學生們的蛻變感到非常自豪，猶如成就解鎖。

大師班最後一堂，豪哥及助教陳錦龍導演，跟學員們檢討學習成果，並勉勵大家，眾人依依不捨一起拍照留念，更向豪哥送上感謝信，令到他相當感動：「教書好開心㗎，首先第一樣嘢就係溫故知新，做演員好基本嘅嘢，自己教書嘅時候會諗返，然後提醒返自己，教學相長我覺得好有意思，第二樣嘢，就係睇到佢哋嘅成長，真係好開心同埋感動。」

豪哥及助教陳錦龍導演在大師班最後一堂與學員們檢討學習成果，並勉勵大家。

開心大合照

學員們向豪哥送上感謝信。

12位學員包括：Hiliary、ANSONBEAN、Summer、Hazel、陳伊霖、鄧沛楠、黎紫琦、范明𤋮、鄧啟軒、梅維瀚、管鋈及雅霖，當中不少人都有幕前經驗，亦有部份學員是素人，年齡由19歲至40多歲，橫跨不同年齡層，豪哥讚賞他們每位在最後一堂結業表演都有突破，令他自豪感到成就解鎖：「尤其係冇經驗嗰幾位，我真係由開頭佢哋第一堂上堂，好似好冇自信，講嘢好細聲，到而家最後一堂，我覺得睇住佢哋嘅自信慢慢上嚟，我覺得呢樣嘢比任何嘢都重要，真係有少少做老師安慰嘅感覺。」

（左起）女學員與豪哥合照：陳紫萱、黎紫琦、劉沛蘅、謝君豪、雅霖、林熙彤、范明熙、陳伊霖

（左起）男學員與豪哥合照：陳毅燊、梅維瀚、鄧啟軒、謝君豪、管鋈、鄧沛楠、助教陳錦龍

早於2016年，豪哥就經已在香港浸會大學電影學院擔任客席講師，相隔多年又再執教鞭，皆因豪哥之前參與演出時，遇到一班非常好學的年青演員，另外一直都有不少人主動叩門求教，豪哥決定藉住最近兩個多月的空檔，開辦這個10堂大師班，他又補充指開班另一原因，是自覺有份傳承的責任：「做咗行業都好多年喇，其實我之前係好多前輩教過好多嘢，嗰啲唔係書本嘅嘢嚟，而係身體力行嘅經驗，我覺得我都應該有責任分享出嚟，因為理論上嘅嘢，其實係睇書可以睇到㗎 ，你買本書都睇晒講晒㗎，頭先我都同佢哋講，我話其實你哋上堂主要係分享一啲我對呢個演出嘅睇法，你嘅老師對呢個演出有咩嘅獨特嘅體會，獨特嘅經驗，呢樣嘢先係最重要。」

豪哥透露開辦大師班其中一個原因是之前參與演出時，遇到一班非常好學的年青演員，而且一直都有不少人主動叩門求教。

開班另一原因就是豪哥自覺有份傳承的責任。

豪哥滿意學員表演，大讚他們有心又有天份，但對學員來說，豪哥認為最重要還是有機會給大家實踐：「佢哋最缺乏嘅就係機會，其實一定要做得多，即係拳不離手，舞台劇又好電影又好，最緊要做得多，所以要多啲機會畀佢哋，喺度呼籲啊大家（業界）都用多啲年青演員呀。」問到會否再開班，豪哥虛心指要先收集一班學生意見，檢討今次課堂內容，至於如何可以加入「謝家班」，豪哥笑著回答：「好容易㗎咋，交學費，哈哈哈！其實最緊要就係你鍾意咯，因為好辛苦，除咗課堂之外，你仲要花好多時間去排戲啦同對手夾啦，仲要返嚟做功課畀我睇，仲要當眾執戲㗎，如果你唔鍾意嗰樣嘢，冇嗰個熱情，你可能覺得係一種負擔。」

豪哥滿意學員表演，並大讚他們有心又有天份。

豪哥又指要先收集一班學生意見，檢討今次課堂內容，才決定會否再開班。

上堂後，12名學員齊齊宴請豪哥，謝師宴上大家一同舉杯慶賀畢業，又在席間互相交流課堂表現。學員們能夠從影帝兼劇帝的身上學習，都異口同聲獲益良多，Hiliary：「因為我嚟緊都要演舞台劇，今次呢十堂學嘅嘢，我覺得好幫到我，去分析我嚟緊工作嘅一啲角色。」ANSONBEAN：「我發現自己都有好多好多嘢要戒，尤其係我可能行路好多小動作，都令到自己甩唔到自己嘅角色，我要繼續去努力，去做好佢。」Summer亦大讚豪哥的教授實用，跟過往自己準備演出方法不同，Hazel就指在課堂上首次接觸舞台劇劇本，直言跟拍戲大相逕庭，今次增進不少知識。

上堂後，12名學員齊齊宴請豪哥。

大家一同舉杯慶賀畢業。

（左起）林熙彤 劉沛蘅 范明熙

（左起）雅霖、黎紫琦

陳毅燊、陳紫萱

至於分別是全班年紀最細和最大的鄧啟軒及梅維瀚，都各有得著，鄧啟軒說：「我喺豪哥度學到點樣動心，一個角色係可以打動到自己嘅心，思考下我同角色有咩性格上相似，呢點我從來都冇學過。」梅維瀚：「我其實教唱歌教咗廿幾年，今次係我第一次上acting class，演技班入邊畀到好多靈感我，點樣可以 inspire 自己學生，點樣將佢情緒再develop再擺喺歌曲入面，呢點對我嚟講係最大得著。」

上：陳伊霖 、下：鄧沛楠

右下：陳毅燊、右上：梅維瀚、左下：鄧啟軒、左上：管鋈

除了謝君豪和朱栢謙，電影還雲集多達五位新生代大獎級演員，以及多名影壇上位新星！

全新黑色喜劇 《一個部門的誕生》由林小强及劉浩良監製，《樹大招風》《神探大戰》兩屆金像編劇麥天樞執導兼執筆，雲集多達五位新生代影壇大獎級陣容壓陣演技大鬥法，當中包括曾榮獲金像獎、金馬獎及亞洲電影大獎的演員－包括《踏血尋梅》白只、《梅艷芳》廖子妤、《白日之下》梁雍婷、《正義迴廊》麥沛東及《但願人長久》謝咏欣擔綱演出，聯乘多名影壇上位新星－包括《年少日記》《那年盛夏我們綻放如花》戴玉麒、《命案》伍詠詩、《正義迴廊》鄧月平大鬥演技，而同片更邀得好戲之人盧宛茵、朱栢謙、蘇宸褕（灰熊）及徐偉棟等加持。眾星正面交鋒，以嶄新黑色喜劇風格，加上過癮啜核對白，合力炮製2025年最強年輕金像陣容聯手交織之攻守舌戰，揭開令人震驚又有共鳴的cut台血淚史！

《一個部門的誕生》由兩屆金像編劇麥天樞執導兼執筆。

電影公司發布邀得金馬影帝謝君豪（豪哥）及演而優則導的朱栢謙（朱謙）加入劇組演出，日前探班同場更有劉國昌及導演麥天樞。豪哥及朱謙接受電影公司訪問雙雙透露，今次受劇本打動演出，豪哥指：「麥天樞係一個好好嘅編劇，今次係佢第一次導演，一定要撐佢喇，劇本相當完整，感受到佢花咗好多心機去寫。開拍前都有開會，有了解導演同編劇嘅諗法。」；而朱謙則分享：「導演好有誠意，同演員有好多交流空間，所以一定要支持佢。導演了解完我哋嘅想法，又會再調整劇本，感受到佢對演員嘅重視。」

謝君豪、導演麥天樞、劉國昌、朱栢謙

被問到二人的角色關係，豪哥透露：「今次我飾演電視台老闆，朱謙飾演電視台行政總監，即係佢幫我打工，我又會讚佢又會責備佢。至於係咪真心，大家就要自己參透。」；而朱謙補充：「電影風格係黑色幽默，所以不按常理出牌㗎。」豪哥笑言：「以我理解，黑色幽默係唔可以胡鬧，係認真到好極致嘅時候就會幾好笑，就會出咗嗰份味道。」

豪哥在新片中飾演電視台老闆。

朱謙則飾演電視台行政總監。

豪哥表示新生代演員之中，戴玉麒跟自己特別多戲份，對方的角色希望停機（cut台），不過因為手續頗繁覆，並發生一連串的事越搞越大，甚至轟動港九，更多劇情則留待觀眾發掘。至於被問到今次有否爆肚演出？豪哥笑指：「導演可以容許，佢冇限制我哋點做，如果有靈感可以同佢分享。」

豪哥在新片中與新生代演員戴玉麒特別多戲份。

豪哥及朱謙屈指一算，已經是相隔14年再度合作，豪哥大爆自己是朱謙的「樂迷」：「雖然隔咗14年先再次合作，其實我一直都睇佢做戲，聽佢唱音樂劇。仲記得2010年嗰陣合作《情話紫釵》，朱謙每次唱音樂劇，我都會去台側欣賞，真係聽出耳油，好有感染力。」而朱謙則表示豪哥對後輩滿滿關心：「豪哥係我嘅偶像同榜樣，佢真係有睇我嘅戲，就算有時喺街撞到，佢真係會講得出我做緊啲咩。好多謝佢嘅指點同對後輩嘅愛。」

豪哥與朱謙今次是相隔14年再度合作。

豪哥自爆是朱謙的「樂迷」。

至於聖誕節即將來臨，豪哥表示今個聖誕會在工作中渡過，「我會為《天下第一樓》到幾個城市深圳、佛山、蘇州、北京、上海進行接近二十場巡迴演出，緊接農曆新年前再返香港演出，就收爐過年。每到一個城市就要好快入台演出，即將要投入舟車勞頓嘅節奏。」至於朱謙則表示：「我接住落嚟聖誕節會綵排舞台劇《試鏡》，好正好搞笑，係關於鹽鹽濕濕嘅嘢。」

豪哥透露今個聖誕會在工作中渡過。

對於甫完成電視節目《選角》，豪哥大歎感動：「呢件事前後接近一年，由開頭摸下摸下，到大家都越嚟越上心，其實大家都好開心，好唔捨得。其實最令我感動，唔單止係參賽者做得好唔好，係我見到佢哋嘅成長，感受到佢哋嘅真誠，令我自己都相當感動，充滿驚喜。好多參賽者都令我喜出望外，又百感交集，見到佢地臨近尾聲都拼湊出好多火花。最緊要畀到一個機會年輕又熱愛演戲嘅朋友，有機會發揮，幫到幾多就幫幾多，希望繼續會見到佢哋嘅成長。」

豪哥指見到《選角》參賽者們有所成長，感受到他們的真誠，令他相當感動，充滿驚喜。