吉吉笑言：「唔一齊唔得！」
周吉佩（吉吉）前日(7月16日) 到新城廣播接受譚玉瑛、何基佑及麥皓兒主持的《QK玉瑛室》訪問，原來吉吉妻子黃彥欣（Louise）跟麥皓兒是同屆港姐，所以吉吉和麥皓兒已認識多年，兩人在直播室再遇，就像老朋友見面。
周吉佩接受《QK玉瑛室》訪問。
周吉佩對港姐太太一見鍾情！
譚玉瑛問吉吉是否主動追求港姐太太？他笑言：「其實係港姐追我，講笑啫！我係09年透過朋友聚會認識我太太，最重要我哋兩個係同一日生日，唔一齊唔得。（揀番呢日結婚？）有諗過，但我唔想，我鍾意有儀式感，會紀念重要日子。」而二人拍拖兩年幾，吉吉已求婚「落訂」，第5年便結婚，至今已在一起14個年頭，婚後更誕下一子一女，相當幸福。
吉吉大爆爆太太與主持麥皓兒為同屆港姐。
新歌《Falling for you》講述吉吉那些年的愛情觀，包括一見鍾情，「MV其中一幕有我同我太太嘅真實故事，當年我第一眼見到我太太喺卡啦OK房，個場景暗暗地，又有啲射燈，佢一開門有啲風吹起佢啲頭髮，好有女神feel，我就將呢一幕放入MV，主要係想講『嘩，好鍾意呀』！」
左起：何基佑、譚玉瑛、周吉佩、麥皓兒
吉吉在訪問中透露今年12月會舉行首個個人演唱會，場地暫時未能公布，但可以容納不少觀眾，可會騷肌或跳舞？吉吉指舞蹈一定會有，至於六嚿腹肌則仍在努力當中，「都想嘅，我有個畫面好想做，就係除咗件衫孭住支結他喺到彈，懶係型咁。不過我都係盡量去做，唔敢肯定，練到就有，冇就畀手臂大家睇。」
詳細節目內容，請重溫7月16日，下午3-4時，新城知訊台《QK玉瑛室》節目，網址：https://www.metroradio.com.hk/MetroInfo/
