真氣頂，日日係咁加班又加班，錢又冇得補，淨係補假，有鬼用咩，手上工作做極做唔完，放假只係鏡花水月，昨晚又要加到九點幾，眼線都溶晒。
真係好Q累，返到屋企竟然肚痛，入到厠所，頂！朝早出門咪再三提醒自己要買厠紙囉，用晒……係用晒…….用Q晒呀!!!!!連一盒盒的面紙都用Q晒，呢次真係折墮。
即刻著住拖鞋落樓跑去最近的藥房連鎖店，衝入去狂搵，點呀，得紙巾，唔係嘩，厠紙冇！面紙都冇！問店員哥哥：我哋呢間冇厠紙同面紙喎！心諗：家陣唔係有少少鐘意你，係有少少想炳你囉。
肚痛難頂，跑去隔兩條街果間藥房連鎖店，又係冇，成間店密密麻麻，冧到滿滿的奶粉、尿片…..總之係冇厠紙，得紙巾，姨媽巾就一籮籮，真係有幾個祖國同胞掃緊姨媽巾，自由行鐘意啲貨堆滿晒，厠紙、面紙呢啲大體積的日用品，Sorry，自由行唔會掃，唔好霸住啲位！唔賣！
終於跑去再遠啲的超級市場，好好彩，搵到我要的厠紙，從未試見到厠紙會咁開心，跑去俾錢，前面有成十個拖喼人排緊隊，喂，九點幾喇，去羅湖的尾班車就開啦，仲要掃貨！
我高貴、大方，但呢一刻好想學識十八個字粗口，想點呀！我唔鐘意啲人走去反蝗蟲，咁樣去鬧人真係好冇禮貌，但呢一刻我真係好討厭好討厭自由行，政府班高官個個月袋廿幾萬，可唔可以諗吓計搞搞，我唔鐘意政治，只係想落街買到厠紙，唔想用紙巾嚟咩屎，好核突，但sorry，今晚真係好興！
番到屋企順暢完，睇到新聞話明年台灣限制每日大陸客只接5000個，仲興，人家地大物博過香港咁多，一年得180幾萬大陸客？！費時俾人話我亂嘈，再喺網睇多啲，跟團就限5000，自由行最多放寬到4000，咁都係每日9000啫，喂，一年300幾萬，依家香港係2700幾萬。死未，你班政客都唔知做乜，叫果個話至多搭車逼少少的爛鬼高官，自己試吓去同啲自由行逼吓呀，試下買唔到厠紙的滋味呀！再唔諗諗點搞吓，我都想上街喎。
Katniss
** 博客文章文責自負,不代表本公司立場 **
