97年亞姐冠軍韓君婷入行19年易肥易瘦,五年前移居新加坡,協助胞兄打理生意,淡出娛圈。早前她回流香港低調做藥廠OL。提到年前一次意外仆崩鼻手術失敗,鼻骨變歪,被誤會「整容失敗」,日前她受訪時首度親爆歪鼻真相,及重塑鼻形經過。
闊別多年回港的韓君婷去年因昔日外貌大走樣,鼻翼兩邊收窄,而被人誤會「整容失敗」。其後她解釋是因為在浴室意外跌倒,撞到鼻樑下榻,更被指無錢延醫,搞到塌鼻破相。
為免越描越黑,韓君婷受訪時披露足本跌傷及整鼻過程:「12年12月喺新加坡屋企沖涼,因為慳小小時間,試圖用腳趾抓毛巾抹身,而失重心仆咗落浴缸。爆鼻後即時入院,醫生要喺我肋骨度拎條軟骨出嚟植入鼻樑,肋骨開刀堅痛仲係大手術,如果女仔尋找美麗,打Botox同透明質酸就夠,唔使攞苦嚟辛,所以我絕對唔係誤傳去整容。」住院十幾日,她回家休養時因為避免鼻內積血,要坐着睡一個月,睡得非常辛苦,毫無精神。
最不幸是在八個月後,即2013年的暑假,因傷口受細菌感染,嚴重發炎要再度入院,韓君婷向哥哥借錢去泰國重建塌鼻,她笑言:「我揀去泰國做,因為我係鬼妹,唔想揀去韓國做到變韓妹!當時個鼻發炎搞到軟骨組織出現彎位,鼻骨變歪,醫生話係萬中無一嘅個案!唯有再花錢及精神做多次手術去補救。但自從喺新加坡做過一次大手術,真係好痛好辛苦,醫生話放完膿,要等兩年康復先可以再做。所以我就選擇放膿,其後個鼻運作正常,就決定唔再做手術,所以成日話做咗一次半手術。」
早前宣佈淡出娛樂圈的韓君婷專心做藥廠OL,她非常享受現在朝九晚五的生活,可以每朝六點起床梳洗扮靚,再慢慢食個早餐,紅日放假還可以約朋友聚會,生活舒適穩定。至於感倩方面,41歲仍然單身的她表示:「有人追,但繼髮型師男友Sherman之後,搵唔到一個令我破解到執着嘅人,我諗我一生中最愛嘅係自己。」