有「冰山美人」稱號嘅Super Girls（SG）成員陳穎欣（Yanny），被友人踢爆同環球力捧歌手周殷廷（Yan Ting）暗撻半年，風頭火勢，兩個人梗係潛晒水，不過，身邊人繼續爆料話，Yanny拍過兩次拖，初戀係一位浪子回頭嘅花花公子，依家就係一位有藝術氣質嘅「自閉」男。
（IG圖片）
（資料圖片）
原來「自閉」係Yanny用嚟形容呢位真命天子嘅親暱名詞，意思係呢位男友好有自己諗法，與別不同。據身邊人話，親耳聽過Yanny講，話係俾呢位「自閉」男友獨有嘅氣質深深吸引。
連女神都動凡心，Yan Ting究竟有幾獨樹一幟？睇下佢個CV先：喺新加坡讀電影，真係充滿藝術氣質喎；導演才華更加鋒芒畢露。最近影后劉美君（Prudence）喺ViuTV嘅新節目《碌卡大導》中首執導演筒，就特登搵Yan Ting做副導演，有影后用行動投咗佢信心一票，Yan Ting啲藝術氣質有幾爆燈，唔駛多講啦。
（FB圖片）
不過，文韜就掂暏，武略又點先？原來真人唔露相，Yan Ting喺新加坡服過兵役，精通MMA格鬥術，藝人星級健身教練杜德智就曾經公開大讚佢Fit到爆。佢早前參與大陸才藝真人秀節目《花漾夢工廠》，由國寶級演員張國立、秦海璐、郭德綱擔任導師，網民反應勁Like，大讚佢「大隻」、「具有偶像劇男主角氣質」。
（資料圖片）
（FB圖片）
Yan Ting真係好上進。之前喺東京秘密集訓，師承一位著名排舞師學舞，唔怪得舞技歌技都咁出眾啦。其實唔講唔覺，Yan Ting嘅歌已經入晒屋，日常生活裡面都聽到架，梗有一間喺左近嘅麥記，裡面啲洗腦歌，一直只係播陳奕迅（Eason）呢類天皇級歌手，依家Yan Ting啲歌都係麥記嘅常駐歌，每日播不停，呢個後起之秀，真係唔到女神唔另眼相看。
（資料圖片）
身邊人講到眉飛色舞，兩個當事人就繼續隱形，娛圈嘅「緋聞」，就係咁如霧似煙。不過，今次有片有真相，原來Yanny真係公開講過佢主動追過一個「自閉」男！Yanny呢段專訪影片拍攝嘅時間，咁啱就係2015年同Yan Ting「緊密合作」之時，巧合到咁？至於呢位有藝術氣質嘅「自閉」男，係咪Yan Ting？畫公仔唔駛畫出腸喇啩，你懂的，去片！
