今個周日的父親節係近年過得最唔開懷的一次，陪爸爸飲完茶，本來應承阿媽難得放假，會整日留在家中陪吓兩老。但係落完雨，仍然難擋政治氣候的沉重壓抑，周五到周六，覺得好辛苦，睇到唔少人將所謂衝擊立法會的事件同和平佔中相提並論，覺得你哋根本唔明後生一輩，承受緊幾大的政治、社會壓抑！
終於都係向阿媽請假，走落去鑽石山，加入毅行爭普選，心想能行多久都係一種表態，行一陣已覺得成身火熱，由於中途加入，無特別走去前面睇幾位老人家在不在隊伍中，但早上睇新聞，見到八十歲的樞機一號風球下，繼續行，我真係有啲想哭，點解爭取咁多年，呢班老人家為香港民主奮鬥一生，七、八十歲仲要用咁辛苦的方式，爭取公民應有的基本權利？！
行咗唔知有冇一小時，到咗街站，已經感覺有啲上氣唔接下氣，要離開隊伍，真係有啲覺得爭普選的路點解行極都未完，返到屋企，繼續喺抑鬱中做「乖乖女」，好有耐性咁同兩老講毅行爭取啲乜嘢，一個無篩選的普選點解咁重要，講講下，睇到新聞中新界東北村民及團體開記者會，見到佢哋個個後生的臉上有著唔應該有的風霜，可能經歷過周五晚被抬走的痛苦和失望，有啲人顯得累了，聽到其中一個成員聲淚俱下，讀出村民的感謝說話，希望呢班後生仔女唔會被嚇怕。
尊貴的議員可唔可以聽吓呢班後生仔的呼聲？佢哋或者衝動了一點，邊個沒有後生的火紅歲月，佢哋只係希望為維護社會公義而盡一點力，係咪可理解吓佢哋的角度呢？強硬只會逼佢哋埋牆，解決唔到問題。
我哋的社會點解會病到咁深，政府是否聽到人民的聲音，我哋幾時先能夠走出陰霾！
Katniss
** 博客文章文責自負,不代表本公司立場 **
