新婚的他全程笑笑口吹水,相當風騷。
月尾踏入69歲嘅「漫畫教父」黃玉郎,日前自爆情人節娶三十幾歲嫩口女友Cass Fong,老婆仲佗緊豬BB。將會五度做人父嘅黃玉郎,日前下午約咗朋友喺銅鑼灣風騷high tea。見佢無咗影婚照時嘅「王小虎眉」,招牌鬚喺番度,成個樣當堂順眼晒呀!
黃玉郎今年情人節低調迎娶年輕逾30歲嘅圈外女友Cass,榮升人夫外,仲雙喜臨門將做爸爸,新婚太太現已懷孕數月。早前,黃玉郎被追問快將抱B一事,開心謂太太有咗幾個月,仲暗示係仔,話一直都想生個豬仔。加埋佢同首任妻子馬夢妮生咗兩子一女,舊愛倪詩蓓所生嘅細仔19歲黃英樑,將五度做父親。
日前下午,如沐春風嘅黃玉郎約咗位男友人喺銅鑼灣百德新街嘅餐廳歎茶。二人坐喺露天位,方便漫畫教父「叉電」嘛!見新婚嘅佢鬼咁風騷,笑笑口吹水時單手托頭,個樣幾梳乎。而且年紀唔細嘅佢仲唔飲凍嘢,叫咗杯熱檸檬茶慢慢歎。最後,兩個麻甩佬逗留一小時,黃生畀錢請客,就分頭走人。