春天終於嚟到，大地回春，係時候坐下露天cafe，享受下被陽光親吻下肌膚嘅感覺！
喺樹仁讀書嘅Angela同小編講，樹仁雖然位處於寶馬山，距離銅鑼灣唔算太遠，但一到食晏時間，無論上山同落山都要等好耐車，如果到2點左右又要同啲國際學校私家車爭上山，分分鐘會遲到。所以上完朝早嘅堂之後，最鐘意就係響學校過條馬路，到賽西湖商場地下嘅Coffee 101食晏，既唔駛嘥時間落山，又可以relax一下~
Angela話：「依間cafe開咗唔算太耐，見佢晏晝有約$60嘅pasta lunch set,唔算太貴，而且cafe以Vintage為裝修風格，店入面放咗大大小小各式各樣嘅懷舊裝飾品，當中有部真空管擴音機，一睇就知店主係識貨之人。一行入去，成個人都會感覺好休閒，所以我每逢番學食晏，都鍾意同同學仔一齊去食，食物味道唔錯之餘，仲可以響cafe入面放慢個人，同啲同學傾下計訴下苦，為忙碌嘅生活叉下電，舒舒氣。」
「其實除咗Pasta set以外，依間cafe仲有拉花拉得好精緻嘅咖啡，材料豐富嘅all day breakfast 同甜品供應，賣相唔差不突止，價錢仲好划算。」
雖然餐廳各方面都做得幾好，但可惜入面座位唔多，所以如果一大班朋友嘅話，可能就唔太啱feel喇～～
大學生吃什麼開咗咁耐，大家對依個page有咩意見想反映下呢？歡迎大家俾意見，我哋兩位小編會繼續努力，為大家搵更多好嘢食！多謝大家支持！！
即刻LIKE FB: 大學生吃什麼~ 有更多靚相睇!
大學生吃什麼
** 博客文章文責自負,不代表本公司立場 **