最近一個月，同中環朋友們食早餐，好多時都見到佢哋有黑眼圈，除咗早前掛住睇歐聯歐霸賽事之外，另一個原因，就係在晚上，好多人都開始炒美股，覺得港股真係炒到冇嘢好炒。
原因係乜？其實好簡單，你睇吓恒生指數幅日線圖，唔好計三月大跌後小V反彈，如果你由4月開始睇到8月尾，指數過去五個月低位係22700左右，高位係26700，中間位大概係24700，其實4月尾嘅時候已經彈到呢個水平，而今早恒生指數低位係24931，換句話說，如果你在四月尾不幸高追隻盈富基金（2800），四個月過去了，你都賺唔到錢！呢個情況都幾恐怖，睇啱個市，以為穩穩陣陣跟股神畢菲特講，買指數ETF，點知指數就係唔升，知道係炒股唔炒市，當今實在重要得好緊要。主因係舊經濟股唔掂，新經濟股升勢如火箭，但係恒生指數成份股換馬嘅速度，未能及時追得上。
恆指四月高位同今日低位，都係24700至24900附近，幾個月來冇點升，QQ圖片。
好彩係三月大跌市嘅時候，尚風係呢度講，你可以等恒生指數在25000、23000及21000嘅時候，分三注錢去買三隻ATM股，即係阿里巴巴（9988）、騰訊（0700）同埋美團點評（3690），如果有跟足，又咁叻仔可以揸到今時今日，三隻股大概分別升咗45%、45%及200%，希望讀者都有做到，而又可以持有到現在。
香港新經濟股在恒生指數佔比唔多，而舊經濟股中，內銀、內險、內房、收租、本地銀行、本地地產、公用及石油股全部不濟，近月表現比較好啲，其實就只有港交所（0388）、騰訊（0700）、收入大跌未復甦的濠賭股、國內內需股蒙牛（2319），以及業績好的恆安（1044）及創科（0669），咁你話恒生指數點樣起？
於是乎，港股投資者近月唯有集中買ATMXJD6股，但你總不能把全部錢放晒落這6隻大型中概股上。事實上，你買完呢6隻股，基本上都應該暫時放埋一邊，不用沽出，繼續讓利潤滾存，無需炒上炒落，直至你覺得納指將見頂回落為止。
另外，近數月港股投資者又會炒下其他細隻科技股，包括晶片、雲端、軟件、SaaS(software as a service) 股。而醫藥、醫療、物管、內地消費股亦有一定炒風。不過，不少升幅已巨，而且相對來說，香港這個市場能容納的炒股資金始終不夠多，你總不能無止境地將30、40隻當炒股不斷炒上，所以當這些股份都炒到一個高位之後，資金不但會獲利回吐，而且好有機會係轉去炒、選擇更多、更多元化的美股。況且，現在開免佣金的美股戶口，網上買賣實在太方便了，還有一個好處，好多美股最少可以買一股，例如蘋果分拆後，一股美金130元左右，亦即1000港元左右就可以有交易，難怪散戶趨之若鶩。
買了Zoom一星期賺六成，股友話，多謝個仔俾佢靈感！，QQ圖片。
有中環股友見阿仔中學復課，但係只能用Zoom及Google meet上堂，靈機一觸下，上星期以285美元買入Zoom，誰知週一晚公布季績極好，全年每股盈利預測由1.29美元向上修訂至2.47美元，勁升九成， Zoom股價周二上升40%至457美元，買股票一星期賺六成，真係好耐都未試過！
尚風
** 博客文章文責自負,不代表本公司立場 **