有網民認為司機「有責任唔畀人放雜物在輪椅位置」~
殘疾人士外出時比一般人困難，遇上人多擠迫的情況更可能要等候多時才能上車。近日一名輪椅人士被巴士司機以無位為由拒載，幸得好心女乘客幫口，該名輪椅人士才可以上車，引起網民熱論。
Getty圖片
Facebook專頁「StartChing」早前分享，指在荔枝角目睹一名輪椅人士上不到巴士的慘況。他指，輪椅先生原先是排在巴士隊頭位置，但車到站時，司機企起身望一望就向輪椅先生稱「唔好意思呀！嗰位（輪椅位）擺咗兩架BB車啦，上唔到啦，無位上呀。」
輪椅先生質疑「嗰個位我哋專用㗎喎，點解唔俾我上？又要等過下一班！」，但司機仍表示無位上車，著他等下一班。無得上車，輪椅先生只好讓後面的乘客上車「「唔好意思，你哋上車先，唔想阻到你哋。」乘客上車時，輪椅先生依然和巴士司機爭持不下。
此時一名女乘客向車長表示，這種情況已經不是第一次，投訴過亦未見改善，輪椅先生雖然感謝女乘客出言相助，但擔心會阻礙其他乘客，遂說：「唔緊要啦！唔洗理我㗎啦，唔該曬你，有心啦！你哋走先啦！」女乘客則繼續與司機爭論，最終司機回頭向車廂大叫「喂，邊個㗎（BB車）？拎一拎開啦。」，輪椅先生才可以順利上車。
StartChing FB圖片。
版主有感指「平日如果沒有人為輪椅先生發聲，他要等候多少架巴士才可以上車。在車門旁邊的他，與巴士的距離像這麼近，那麼遠。」不少網友都大讚女乘客的行為，更稱她為「女俠」，「將心比己個女乘客好好」。亦有不少殘疾人士留言指自己遭遇差不多，「作為輪椅用者，經常遇到此事，有苦自己知，不過都好感激仍有不少熱心市民願意幫忙」，「我都係一個坐輪椅傷殘人士，聽到好窩心」。
另外，有網友批評司機的做法，認為司機「有責任唔畀人放雜物在輪椅位置」，又指司機「理應替輪椅人士維權，而唔係叫佢通融下等下架。」
不少人可能都試過在巴士上睡着了以致過站都懵然不知，日前就有港男因在車上睡得太沉，直至巴士到了總站，全部乘客都已下車了才醒來，卻發現自己被鎖在車廂內！
影片截圖
醒返時車內空無一人車門被鎖
有港男早前在社交平台發文及影片，寫到「點解返工遲到？」由影片中所見，他人身處巴士的下層，車門已鎖，而車內空無一人連司機也不見，只有樓主無奈地坐在空車內。
港男表示因為在巴士上層睡得太熟，到了總站都不知，而司機也沒察覺直接鎖車走人，所以也成為了他當日返工遲到的原因。
影片截圖
網友同情：睇嚟你真係好眼瞓
不少網友睇帖文後留言「司機落車前要巡車架！！！」、「好慘，睇嚟你真係好眼瞓」、「呢鑊嘢你好可能一世都記得」。亦有網友則教樓主下次遇到類似情況應如何甩身「自己撳掣（太平門掣）離開巴士車廂」，「前門望下門框有個黃色邊紅色開門掣，開門在安全情況下離開，記得撳返車外面嘅綠色閂門掣閂門」。
網民分享類似經歷 竟然睡到巴士已改了路線
不過帖文亦引來不少網民分享類似的經歷「試過坐巴士，去到總站唔知醒，好在巴士司機叫我」、「我試過半夜飲醉咗瞓咗喺架巴士，但個司機收車冇鎖，直接行返出去」、「我試過瞓到，巴士已經返到車廠入油，落到下層時嚇死個司機」。
影片截圖
有網民甚至試過睡到巴士已改了路線，「我嗰次要搭269C返工，一上車肯定係瞓覺，醒嗰陣發現以下嘅事情，車長換咗人；架車轉咗牌變68X；行車方向係入新界方向（仲要已經行到青衣就到汀九橋）」。
城巴fb圖片
有人在車上睡了幾程車超誇張
最誇張的是竟然有網民在車上瞓了幾程車「之前坐89D返學，瞓覺瞓到藍田站嘅時候有少少醒，但係唔知點解繼續又瞓返，跟住返返去馬鞍山又係有少少半睡半醒但係唔知做乜嘢，我選擇繼續瞓（可能諗住瞓到返屋企落車唔返學掛），但係最後醒返已經差唔多準備又上公路出九龍，跟住第二次同樣又係瞓到去藍田站，但係又係半睡半醒之間唔知點解選擇繼續瞓，跟住期間又半睡半醒望到架車行緊觀塘道，但係架車好似冇着燈，後尾架車唔知做乜嘢去咗樂富之後俾個司機叫醒咗」。
