阮兆祥、羅敏莊、小肥和陳柏宇等都搵佢教唱歌。
歌手就算幾有天份,有時都要靠背後高人幫手,先可以好好發揮,令到大家聽到靚歌。《頭條日報》就發現近年樂壇有個急速冒起歌唱老師Guddy(陳傑龍),雖然年紀輕輕只得30歲,但學生由出名唱得的阮兆祥、羅敏莊、小肥和陳柏宇,到當時得令的MIRROR成員Anson Lo(AL)、Edan、Stanley同Jeremy等等。Guddy能夠被歌手熱捧,背後音樂實力有幾勁呢?Guddy又點品評呢班歌手學生唱歌水平呢?想知《頭條》就為大家搵答案啦!
![舞台劇演員謝裕玲跟Guddy學唱歌年多,這天練習發聲。](https://image.bastillepost.com/1056x/wp-content/uploads/hongkong/2021/08/_2021080521211516519.jpg.webp)
舞台劇演員謝裕玲跟Guddy學唱歌年多,這天練習發聲。
Guddy曾在中文大學音樂系修讀聲樂,遇上啟蒙老師葉葆菁後,發覺音樂巿場好濶,除了古典樂外,流行曲和冇伴奏合唱等對聲音需求都好大,於是連流行曲和舞台劇唱法都去學。他大學畢業後當了兩年中學老師,「家長見到我教合唱團,出面又有表演,開始搵我教小朋友,就係嗰兩年開始萌生教唱歌念頭。」他毅然辭職,教了一年playgroup儲錢再到美國修讀很流行的音樂課程「Speech Level Singing」,完成後返港正式開展教學工作。不過最初未有娛樂圈學生,直到同屆大學同學、指揮家劉卓熙介紹了歌手秦馨敏(Emily),「期間佢聲音有轉變,佢同時喺陳輝陽個女聲合唱團,跟住一個掕一個到小肥,就變到咁多啦!」
![Guddy陪Edan 錄音到零晨,Edan出post時tag了他,即收到大量查詢。](https://image.bastillepost.com/396x/wp-content/uploads/hongkong/2021/08/_2021080521210879874.jpg.webp)
Guddy陪Edan 錄音到零晨,Edan出post時tag了他,即收到大量查詢。
小肥唱歌感情真摰
小肥是Guddy教的首個有知名度歌手,他大讚小肥唱歌感情真摰,不會只顧技巧,「佢聲質好大份,能夠用力量去彌補高音域嗰啲問題,而且佢假聲好響,但點樣用真聲繼續上去,令到發音可以好正常同穩定就需要多啲時間,好似大隻佬去跳芭蕾舞,拉筋要好長時間。」
![Guddy大讚AL有把靚低音,唱情歌一定好正。](https://image.bastillepost.com/1056x/wp-content/uploads/hongkong/2021/08/_2021080521211972180.jpg.webp)
Guddy大讚AL有把靚低音,唱情歌一定好正。
陳柏宇最勤力學生
陳柏宇每周至少上一次Guddy堂,而且好有要求及獨特見解,「佢發覺有啲歌嘅音域好難到達,或者聲質唔滿意就問我點解,佢好多諗法亦會問到好細。佢高音上嘅問題源自喉頭位置,好影響發聲健康,可能唱少少好容易會攰,或者冇咗某啲音域。初頭不斷練佢都有啲唔慣,但好開心,佢話呢幾次Live開始覺得身體上有啲唔同。」
![新年時,Guddy跟小肥、陳柏宇、張紋嘉、林子傑及J. Arie等飯聚。](https://image.bastillepost.com/939x/wp-content/uploads/hongkong/2021/08/_2021080521211344079.jpg.webp)
新年時,Guddy跟小肥、陳柏宇、張紋嘉、林子傑及J. Arie等飯聚。
鐵嗓子羅敏莊
羅敏莊因為音樂劇《我們的音樂》而搵Guddy教,「當中有首歌叫《大海歌》超出咗佢音域,佢一直以為自己屬於好低音,其實佢唔係咁低仲有好多音域冇試。佢從來冇練過啲肌肉,練咗之後佢話『唱到《領悟》好多高音好正』,佢好有天分,畀樣嘢佢練好快見效,所以我叫佢鐵嗓子,因為冇乜嘢唱唔到。」
![Guddy與羅敏莊及《我們的音樂劇》音樂總監、作曲家高世章合照。](https://image.bastillepost.com/704x/wp-content/uploads/hongkong/2021/08/_2021080521210656294.jpg.webp)
Guddy與羅敏莊及《我們的音樂劇》音樂總監、作曲家高世章合照。
阮兆祥想搣甩80年代腔
阮兆祥是Guddy唱歌經驗最豐富學生,「佢想打破一啲固有唱歌習慣,佢唔想尾音好似好80年代,我解釋畀佢聽唔係淨係尾音,係成個聲音嘅本質,你能唔能夠駕馭以前未試過嘅音域,張惠妹係個好例子,佢唱歌方法冇變,只係咬字放嘅聲音喺一定美感上轉變,佢聽到就明白。」
![Guddy除了教學生唱歌,好像小肥錄音時都會到現場協助。](https://image.bastillepost.com/528x/wp-content/uploads/hongkong/2021/08/_2021080521211287444.jpg.webp)
Guddy除了教學生唱歌,好像小肥錄音時都會到現場協助。
AL有powerful低音
Guddy由AL《WARRIOR》開始幫手,發現AL未被發掘的優點是低音,「佢有一把好靚嘅低音,只不過無可能一首跳舞嘅歌一粒高音都冇,所以要迫去唱一啲佢音域上難少少嘅曲目,唔係唱唔到,係要長時間令佢穩定。我期待佢呢個咁靚嘅低音將來點樣發揮,唔知佢有咩火花發出嚟,佢把聲成熟得嚟好有感染,香港歌手好少有,加埋中音可以好powerful!」
![Guddy認為阮兆祥歌唱經驗豐富,難得仍好學不倦。](https://image.bastillepost.com/469x/wp-content/uploads/hongkong/2021/08/_2021080521211491726.jpg.webp)
Guddy認為阮兆祥歌唱經驗豐富,難得仍好學不倦。
Edan鄉音累事
Guddy眼中Edan有才華亦是個謙卑用心好學生,「你講嘅嘢佢會認真咁思考去練,錄《E先生》時我未教佢,佢Live唱呢首歌覺得唔係好順,我哋練習就唱到,不過咬字真係呢!哈哈!佢第三聲會變第六聲,同埋啲入聲,咬字絕對影響發聲系統,引致好多鼻音問題,喉頭又高,道氣用唔到塞住咗,高音又唔到,骨牌咁樣去。佢仲要自彈自唱,佢要駕馭一樣嘢,但係又要投入個樣要有表情,但係又有鄉音,全部jam埋一齊。」
![Guddy覺得Stanley把聲又man又厚,最啱唱情歌。](https://image.bastillepost.com/704x/wp-content/uploads/hongkong/2021/08/_2021080521210968647.jpg.webp)
Guddy覺得Stanley把聲又man又厚,最啱唱情歌。
Stanley靚聲好厚好man
Stanley由參加《造星》開始大家覺得他唱唔到歌,但Guddy完全反對,「佢把聲好靚,佢把中高男聲好厚好man,現役歌手好少,個個都飆高音,佢唔係冇高音,只係唔會飄咗上去,佢又唔係對音樂冇睇法,佢需要繼續強健聲帶肌肉,亦需要去學點樣用一個唔嗌嘅情況上到高音,搵到最舒服最好聽嘅音域。」
![Guddy睇好Jeremy唱Rock and Roll及快歌會好有發揮。](https://image.bastillepost.com/564x/wp-content/uploads/hongkong/2021/08/_2021080521211111651.jpg.webp)
Guddy睇好Jeremy唱Rock and Roll及快歌會好有發揮。
Jeremy要改壞習慣
Guddy認為Jeremy聲音肌理上面有壞習慣,又鍾意狂爆高音,「佢係渾圓嘅聲,一直以嚟專注高音發展,冇諗過中低音鞏固咗,高音會更好,同埋會搵到自己最靚嘅音域。佢呢排穩定啲上堂嘅時候聲音真係圓番,我覺得大家可以拭目以待,佢啱Rock and Roll嘅嘢,快歌會做得好。」
![30歲的Guddy坦言要駕馭一班大明星不容易,所以事前要做足備課,多聽多睇他們的歌和演出。](https://image.bastillepost.com/750x/wp-content/uploads/hongkong/2021/08/210805_EN_guddy.jpg.webp)
30歲的Guddy坦言要駕馭一班大明星不容易,所以事前要做足備課,多聽多睇他們的歌和演出。
![Guddy任教母校循道中學女子合唱團時,帶學生到日本出席「東京國際合唱節 2019」。](https://image.bastillepost.com/939x/wp-content/uploads/hongkong/2021/08/_2021080521210833969.jpg.webp)
Guddy任教母校循道中學女子合唱團時,帶學生到日本出席「東京國際合唱節 2019」。