來自巴西的馬雅，一直支持量不多成績平平，老實講，他的騎功未達頂尖，不過與同鄉波健士一樣，出閘工夫不俗，也因此策主動前置馬甚可靠，今晚的「瑪神好運」正是其一。
第一場第四班一六五〇米：「機緣巧俠」上季由文家良接手，不止極速建功，尚要三扒兩撥贏三場，之後未能衝擊第四W，此駒出戰草地場場也跑近，甚至跑田草千四都上名。奇怪的是跑草地出色，季尾卻走去爭泥地，結果一次巴度出事被重罰，另一次跑濕泥大敗。
弗足一季未完，「機緣巧俠」今季依舊咁弗，亦因晨課搶鏡，上仗吸引到莫雷拉注視，可惜雷神都有老貓燒鬚時，無啦啦一早踩油，仲要放得快，發揮錯誤失手，相對可以保到第四僅輸半個馬位，表現好到痹。賽後獲加一分，評磅員極重視，換上史卓豐威力無減，戰意亦好，穩健馬膽。
第五場第四班一二〇〇米：「瑪神好運」在港現役唯一馬女，希斯昔日訓練出馬后「勝威旺」，前駒目前的成績尚算不俗。起初的「瑪神好運」因為未適應水土，表現平平無奇，幸好無病無痛體力充沛，多跑多減分下，好快已降兩個班次。上季尾漸入佳境，先在同程入Q，不敵今季再贏「辣得驕」，接住轉戰田草再獲亞，壓倒之後兩捷「有苗頭」。
開鑼日「瑪神好運」亦順利打開勝門，更贏個多身位，雖然上仗備受熱捧而未能再贏，但考慮到重返四班作賽，尚要遇快步速跟得急，最後取得一席季軍已有交代。唔跑周日兩組四班田草千二，一來在谷草曾上名，二來今次對手更弱更參差，希斯部署十分精明！
