35歲的高模，前「城嫂」熊黛林(Lynn)， 近日盛傳同富二代、郭可盈胞弟郭可頌，將會拉埋天窗。婚事傳得熱烘烘的同時，Lynn舊愛郭富城好似有少少氣沖沖，即刻大晒與28歲上海辣模Moka(方媛)拖手照放閃。高Lynn見慣世面，當然唔示弱，又放情侶鞋相高調還拖。待嫁新娘日前開胸出席活動時，更寸嘴說：「你晒得我又晒得！」寧舍風騷！
日前，孝順女熊黛林下午趁住得閒即做乖乖女，陪媽媽遊走銅鑼灣。兩母女勝利出巡三個鐘，被問及「新城嫂」慘變負評王，Lynn不願回應，反而在旁邊的熊母Keep住陰陰嘴笑，擺明力撐愛女。途中不少人都認得出Lynn，大讚「真人好靚」。看來，Lynn今次以全勝姿態贏晒！
點擊看圖輯
Lynn拖母現身銅鑼灣，她侍母至孝，拖母揸住愛郎部白色波子，現身銅鑼灣。兩人泊車後就即去對面Sogo鳩嗚。沿途唔少人認出高模，大讚她「真人好靚」和「雙眼好大」，o氹到熊黛林冧笑。入到Sogo，兩母女就去女裝部睇衫，乖女不停幫母親揀冬天厚褸、毛衣等。
個半鐘後都睇唔上眼，二人就返回地下化妝品部，Lynn快手揀了支唇膏畀錢，再與媽咪去名店Salvatore Ferragamo睇手袋。見二人起勢睇一個售價$12,500的紅色橫紋小手袋，原來係熊母情有獨鍾睇中手袋，七折後$8,750，乖女即刻碌卡，熊母亦開心即買即用。孭個新袋襯埋阿女個紅白色Chanel袋，實行「母女裝」靚靚行街街。
折返利園會合公司同事途中，記者問黑超Lynn前度和女友Moka拍拖半年就公告戀情，有無唔開心？EQ高的Lynn耍太極說：「無喎！唔該晒！行街呀！bye bye！」貴為前城嫂，又會否同情Moka變負評王？Lynn沉默三秒嘴角向上說：「我要同媽媽行街嘞！」熊母就keep住陰笑。兩母女會合公司同事後，再上新開的眼鏡店掃貨，逗留大半小時拎埋袋戰利品就取車離開。
