第六場第四班一二〇〇米：「八卦」前季中於草地建功，季尾轉戰同程贏多一場，食住勇態上季初搶攻，首戰同程熱捧得手。任務完成，升上三班次次冷門，相對欠缺出擊之意，在五九五場跑直路賽拼入Q，可見能力唔差。
上季尾「八卦」落番四班，然而兩戰都用黃皓楠未肯出手，今季兩仗票數也欠硬淨，結果均跑近輸個多身位，其中上仗拼獲第三，亞軍「狀元及第」之後再出轉跑草地亦能入位，可見該賽的水準甚高。今次賽前練者安排「八卦」試閘，相比起之前肉緊得多，該閘試來更是前後兼備譽滿欄邊，班利路合，置身弱組贏馬呼聲甚高。
第八場第三班一二〇〇米：「加州凱歌」首戰已殺入一席，谷草好開翌仗卻改攻泥地，最終贏馬順利補中，可見告東尼眼光獨到。上季初「加州凱歌」持續見好，第二仗再於同程勝出，雖贏得險，但蹄下敗將「醒臣」、「銀紙」、「平常心」均非泛泛之輩，後駒之後更贏四場。
可能該仗「加州凱歌」出力太多，告東尼希望評分調整，之後絕少安排此駒出戰泥地，亦因此未有士哥，但睇番絕少大敗，甚至三度上名表現唔差。今季「加州凱歌」首戰直路賽都跑得接近，上仗跑番強項同程當然備受熱捧，可惜三甲不入，但睇番當戰大利外疊後追馬，「加州凱歌」跟前守好位拼失不用介意，目前評分有賺無蝕，決心補中亦好鬥志，值得追多次。
