克勤全新嘗試！
音樂競賽節目《聲生不息》今日（3日）播出第十一集，今集主題是《勁歌金曲衝刺夜》，所有參賽歌曲必需要曾入選過「十大勁歌金曲」，十六組歌手全部出場，贏得「期待值」最高的隊伍才能於決賽中全員上台演唱。
克勤今集跟李健及魔動閃霸一齊演唱《雨夜的浪漫 x 護花使者》，克勤表示：「《雨夜的浪漫》係『十大勁歌金曲』嘅歌曲，《護花使者》就是彩蛋。不過我哋特登唔將《護花使者》個歌名寫出嚟係因為想俾觀眾有個驚喜。《雨夜的浪漫》編曲部份由李健負責；而《護花使者》就係我負責編曲。」
克勤跟李健及魔動閃霸一同演唱《雨夜的浪漫 x 護花使者》。
由於想讓觀眾有耳目一新的感覺，克勤這次的表演特意加入跳舞元素，更認真備戰，提早差不多兩個星期開始準備，「大家都知道跳舞一向都唔係我強項，自己知自己事，所以我提前咗個幾星期去排練，每一日都捉住排舞老師去排練，排咗幾日之後就拉埋魔動閃霸一齊。其實足足排咗超過一個星期，我係抱住一個將勤補拙嘅心態去做，因為喺呢個舞台上我唱咗好多抒情歌，係時候俾觀眾一個驚喜，呢個都係一直想擺入《聲生不息》節目裹面嘅元素，但係要搵一個適合嘅時間去做。」除此了跳舞，克勤更「試新嘢」，跟魔動齊齊玩rap，「廣東話rap嘅歌詞係我自己寫，要感謝魔動一路教我點樣rap，因為對於我嚟講，rap我唔係好在行，但呢個當然係佢哋強項，所以佢哋一路話俾我聽個拍子點樣去唱rap，其實係有tone、有key，係有好多學問喺裏面，絕對係上咗一課。」
最後，克勤這個突破的表演勝出，令到總比數跟對手打和，從而令克勤全隊進入決賽。
克勤挑戰唱跳加Rap！
炒熱現場氣氛！
