無綫綜藝歌唱真人騷《中年好聲音》，自去年十一月播出以來掀起不少話題，當中在比賽中曾自嘲似「隱形人」的羅啟豪，初期一直感到未被人留意到，但後勁凌厲的他，卻愈戰愈勇，連比賽評審亦讚他每次都有驚喜，而主持人車婉婉也看好他。
十三歲開始到外國生活的阿豪，長時間與媽媽分隔兩地；年半前，因媽媽不幸患上癌病，他即放下手頭工作，回香港照顧媽媽，待媽媽身體好轉，又再返英國生活。直至阿豪回港參加比賽，母子又再「團聚」，媽媽看到兒子一次比一次進步，令她感動又開心！
羅啟豪
怕羞隱形人
現年三十八歲的羅啟豪，十三歲開始在英國讀初中，住寄宿學校，完成會考後再到美國繼續學業，在大學修讀室內建築，後來再改修平面設計，大學畢業後留美國工作了十五年，至一五年返回英國生活，現時任職平面設計師。去年，他回港參加TVB舉辦的綜藝歌唱真人騷《中年好聲音》，比賽初期表現一般，未被外界看好，更以「隱形人」來形容自己，每次晉級都是掹車邊；不過，後勁凌厲的阿豪卻愈唱愈好，更排除萬難走到現在，更被視為「黑馬」。
羅啟豪傳承媽媽音樂夢。
阿豪自言從小到大都是一個怕羞仔，但自從參加比賽後，令他性格有所改變：「其實我頭幾個回合，緊張到震晒，雖然依家都仲有，但已經好咗好多。我覺得參加呢個比賽令我個人長大咗、進步咗，在好短時間裹面，好似一個crash course（速成班），可以鍛練膽量，對住評審表演、接受佢哋嘅評語，無論係好與壞，同埋對住咁多人講嘢……在參加比賽之前，我真係一個好怕在別人面前講嘢嘅人嚟。」他坦言怕羞性格，最大原因是自己的濕疹皮膚：「我由細到大個人咁怕羞，其中一個大原因係我啲濕疹，對自己冇信心，成日驚畀人睇低，因為皮膚好差，自己都唔鍾意見到自己皮膚咁差，所以變得咁怕羞。病發時，成條頸都紅色o架，上台有時都會見到。」
比賽完結後，啟豪表示如果有機會繼續發展，他會選擇留在香港，繼續跟媽咪一起生活。
雖然阿豪對唱歌有信心，但卻感到比賽賽際是有難度，加上幾位「高質」的參賽者，對於繼續有得留低，他認為成功闖關已當贏了：「每次晉級，都覺得自己又過一關嘞！每個回合都覺得賺咗嘢，對自己認識都深咗，評審的評語，令我學識點樣去令自己進步，又識到一班戰友，我覺得係一件非常開心嘅事嚟o架！尤其我咁怕羞嘅人，係好難識到朋友。」
羅啟豪與媽媽
