大台18年前的巨乳女藝人組合「電波少女」解體多年，其中貌似後輩樂瞳的G奶梁雪湄(Koei)，潛水多年，原來搞生意之餘，現年39歲的她真係走咗去學潛水，而且仲首度做旅遊Blogger，大晒36G魔鬼胸。日前下午，好耐無見的「電波中女」Koei，mark實富貴四眼男去銅鑼灣利園Hermes掃貨。皮膚白滑、睇落索過以前的她，雖密冚G奶，但激凸身材好易認。最後成功冧掂男友買條萬三蚊皮帶，Koei個樣笑得超甜。
近40歲的梁雪湄孖富貴四眼男行名店，不老甜樣仲好睇得。
95年入行的梁雪湄，憑36 G魔鬼胸被大台賞識，98年聯同李思蓓、姚樂怡、汪琳、雷穎怡、梁佩盈、任港秀和翟佩雲組成「電波少女」，性感大激鬥做綜藝節目搶收視。個樣生得嫩口又幾甜的Koei，其後拍劇一直撈散，最終09年離巢，過檔亞視。11年，決心跳出幕前的她，轉營從商，在尖沙咀開美容院，近年又同其他藝人夾份開上環的華星冰室和華星客棧。消失多年，近來開始為旅遊網做blogger，不時周圍飛，親自影相撰文，食歎生活賺到白滑肌膚和凍齡靚樣做bonus。
入行初期，胸大腰幼的梁雪湄，常派演性感奀角。
日前下午，曾被影到有新四眼男友的美魔女梁雪湄，又孖男友行利園。四眼男年約40歲、外表好斯文，手戴約50萬的勞力士Daytona腕錶。男伴一直雙手繞身後，好有耐性等候，任由女友揀嘢。未幾，女方睇中一條約萬三元的橙色皮帶，遂試上身。此時四眼男有默契地走近幫眼。見Koei嬌嗲男友又雀躍露出腰果眼，男友即刻投降，點頭話買。咁快有着落，Koei繼續睇絲巾。不過款式唔啱心水，之後醒目替平日穿西裝返工的男友揀領呔。行足半小時，最後扑槌買了條同款的紅色皮帶，四眼男自動科水簽卡，Koei就繞埋雙手等走人。最後她眼利發現記者，撇甩男友分頭離開。
3年前，美魔女梁雪湄愛上潛水，前後考了6個牌，將考教練牌。
做旅遊blogger的梁雪湄，周圍飛親自影相撰文，間中晒事業線派福利。
