泳兒正日生日開show 陳慧嫻封大利是祝福

日前，陳慧嫻領軍跟同門的泳兒（Vincy）及許靖韻 （Angela）到美國加州舉行兩場演唱會，而首場演出剛好是Vincy的正日生日，慧嫻除了送上大利是，更安排連番驚喜，令Vincy過了一個難忘的生日。

過去幾年因疫情關係，海外演唱活動幾乎全面停頓，直至今年疫情減退，海外show亦除之相繼復甦。慧嫻也透露上一次到美國已經是五年前的2018年，十分掛念歌迷，「好開心再一次嚟到美國表演，有啲歌迷都同我講前幾年睇完我美國演唱會後都一直掛住，想我快啲再過嚟開個唱，希望遲啲有呢個機會。」Vincy亦謂很久未試過離開香港一段長時間，執行李時發覺太多東西要帶去，想着同事應該可以幫手，不過時與願違，「喺機場時，想分俾同事幫手裝，點知原來大家都已經唔夠位，逼住要左攝右攝，哈哈。」而首次到美國出show的Angela直言出發前三、四個月已經十分興奮，「係咁睇一啲關於嚟到三藩市同埋洛杉磯嘅一啲可以去嘅地方，希望喺完show後爭取時間去行吓街。」

陳慧嫻領軍跟同門的泳兒（Vincy）及許靖韻 （Angela）到美國加州舉行兩場演唱會。

問到難忘事，Vincy坦言是慧嫻在台上的悉心安排，「綵排時，主辦煞有介事叮囑同慧嫻姐姐合唱完唔需要talk環節。真正on show時，合唱後，想邀請慧嫻姐姐去後台休息，點知佢好似唔想離開，原來係全場大合唱生日歌，突然收到幾千人祝福。」慧嫻則說：「我向 band leader同監製提議喺台上俾驚喜佢，當佢以為同我合唱完後我就將舞台交俾佢時，我喺台上宣佈今日係 Vincy生日，帶領觀眾一齊同Vincy唱生日歌，見到佢驚喜個樣我都好滿足。」驚喜一浪接一浪，完show後主辦同Vincy切蛋糕時，作為前輩嘅慧嫻亦封了利是給Vincy，「祝佢以後一切順利，有個開心難忘嘅生日，再一次見到佢驚喜個樣，諗番都覺得好笑。」

首場演出剛好是Vincy的正日生日，慧嫻除了送上大利是，更安排連番驚喜。

令Vincy過了一個難忘的生日！

三人首次合作開show，除了獨唱，亦有合唱部份，慧嫻跟Angela合唱《跳舞街》，「唱完我好奇問佢點解會識唱我嘅歌，始終年紀都差咗幾個 generation嘛，哈哈。佢話因為佢小時候父母都成日聽我嘅歌，所以佢對我嘅歌曲都非常熟悉，可以同年輕一輩嘅歌手合作對我黎講係一件好開心嘅事。」至於後輩Angela亦表示十分榮幸可以跟原唱慧嫻合唱。除了《跳舞街》，二人還合唱了慧嫻的經典歌曲《千千闕歌》，Angela透露是她選的曲目，「呢首歌喺今年嚟講對我非常之有意義，之前參與咗一個節目，其中一個好好嘅朋友叫『唐伯虎』，佢喺節目裹面送咗呢首歌俾我，所以今次可以同到慧嫻姐姐合唱《千千闕歌》我會覺得係帶俾我今年一啲美好嘅回憶，亦都係非常之有意義嘅一首歌。」

慧嫻跟Angela合唱《跳舞街》。

由於這次美國之行的演出場地比較偏遠，而且行程緊密，慧嫻及Vincy都未有特別安排行程，不過二人都不約而同在兩場show的幾日空檔四出覓食，慧嫻謂：「唯一就係到埗後放低行李就即刻去咗Taco Bell快餐店，食咗個 Beef Burrito，很想重溫一下我大學時期嘅回憶味道。」而Vincy就食到驚穿不到第二場show的貼身裙，十分搞笑；至於Angela表示很貪心想去多個景點，將自己的行程排得非常緊湊，「一次過去咗Disney Land同埋Universal兩個主題樂園，私下行程係非常之忙碌，不停爭取機會去拍咗啲vlog，同埋影咗好多靚相。」

Angela同壽星女慶祝生日。

陳慧嫻表示藉着《給親愛的親愛》「同親愛嘅觀眾、親愛嘅粉絲講聲Hello。」

陳慧嫻（Priscilla）推出新歌《給親愛的親愛》，歌曲由Larry Wong作曲及編曲、林若寧填詞，舒文監製。歌曲靈感及主題均來自慧嫻，「呢首係我加盟新公司英皇娛樂嘅第一首歌，再加上我好耐都冇出新歌，所以想藉住呢一首歌同親愛嘅觀眾、親愛嘅粉絲講聲Hello。簡單嘅一句『親愛的你好嗎』嘅問候，承載住我對你哋嘅思念同埋祝福，希望你哋能夠感受到呢一份真摯嘅情感，無論大家身處邊一度，都有我嘅音樂陪伴住你哋。」

陳慧嫻推出新歌《給親愛的親愛》。

觀看相關影片按連結：https://youtu.be/xc_R85Rkyxw

慧嫻表示選擇這個題材是因為近年經歷很多聚散離別，無論是移民、工作、家庭又或是成長的原因，曾經的關係緊密好友變得疏離，「其實好多時候都會耐唔耐諗起大家，但硬係抽唔到個時間去見面，我希望可以喺呢一首歌裏面表達到呢種思念同埋祝福。」歌詞中的「親愛」可以指家人、好友或愛人，「每當諗起佢哋嘅笑容、陪伴、支持，我哋心裏面都會充滿着一種好感激同埋好懷念，希望透過呢一首歌能夠令到觀眾諗起生命中重要嘅人，無論佢哋身處何方，呢一段情感都可以係超越距離，永遠相連。」

慧嫻指選擇這個題材是因為近年經歷很多聚散離別。

而最觸動慧嫻的歌詞「人生如風似煙 領悟人生後 初見面」，她解說：「我哋都後生過，個時可能會比較自我中心、驕傲、自私少少，唔識得易地而處，但當經歷多咗、大個咗，我哋睇番轉頭，就會覺得後生嘅時候原來係咁幼稚。大家再見返嘅時候，都發覺大家都變好咗。同埋我覺得呢一句歌詞亦都係令到人好感受到人生嘅變幻無常，當我哋真正理解人生嘅本質之後，或者我哋能夠更加珍惜咁去看待生命中每一次嘅相遇同埋離別。」

歌詞「人生如風似煙 領悟人生後 初見面」最為觸動慧嫻。

問到錄音趣事，慧嫻笑言舒文為十分正經，跟他一起沒甚麼趣事，但對他錄音室的廁所十分感興趣，更謂好好玩，「佢個洗手間入面有一塊叫做『Yes No』嘅決策板，每一次去洗手間我都會忍唔住攞嚟玩吓。好多時錄到咁上下去廁所，我咪信吖嘛，我就會問吓塊板究竟我頭先嗰個Take得唔得？如果最後粒珠仔走落去YES嗰度，我就覺得一定得！出到去就算舒文叫我再錄，我都唔會再錄㗎啦，哈哈；但係如果粒珠去到No，咁就算舒文覺得係OK我都會話：『俾多次機會我啦……』我會喺度磨爛蓆，哈哈；如果粒珠去到中間，咁冇得揀，出到去等舒文決定使唔使再嚟過。」

慧嫻指舒文十分正經，跟他一起沒甚麼趣事，但就爆舒文對錄音室的廁所十分感興趣。

除此之外，慧嫻透露正積極籌備明年演唱會，「我正在全力籌備我嘅四十周年紅館演唱會！期待同大家可以一齊再分享我嘅音樂，好似我嘅新歌裏面有一句歌詞『努力排練 若然一日能遇見』，我哋好快會見㗎啦！哈哈。」

慧嫻透露正積極籌備明年四十周年紅館演唱會。