女乘客搭的士要求「中途順路接朋友」,卻遭司機爆粗拒絕兼嗆「有本事你報警」,於是咁做。
有女網友於Facebook群組「的士乘客及司機行為分享區」發文,表示日前上了一架的士,在告知司機目的地時,已表明要「中途順路停站接朋友」,開車後司機竟爆粗回應表示「我唔X停,我要賺錢冇時間同你停車」。樓主不解,追問不肯停車的原因,司機火爆回應「我係唔X停,有本事你咪報警囉!」。
樓主不忿氣「我哋乘客都係搭車啫,冇理由受埋呢d氣」,於是「就順你意思去報警」,當得知事主已報警後,司機立即改變態度,即時向樓主道歉,何惜為時已晚「警察到場第一時間發現呢位火爆司機冇展示的士司機証,警察立即抄咗佢牌」。最後樓主登記及付車資後便落車離去,她更心涼表示「警察就慢慢同你玩。好彩之後我哋截另一架的士個司機態度好。」
此帖引網民熱議,有人不解司機為何不願中途停車「中途停一停個咪錶照跳嗰喎,有咩問題呢?個司機第一日揸的士?」、「停一停方便吓人有幾大不了呢?咁樣就搵唔到食?唔係啩,真係唔明個腦諗緊乜嘢」;有人則批評司機態度惡劣「其實說到底係禮貌問題,恃老賣老,自己其身不正無展示的士證」、「就係呢啲垃圾阿叔搞彎哂個行頭」、「深深明白司機有難處,但都希望可以態度好啲,西客不是一日養成的」。
不過亦有網民撐司機「我又解釋吓點解司機咁怕中途停車接人?原因係好多話中途停接朋友,去到未見人,等吓又一分鐘,等吓又一分鐘,好多客人成日覺得停喺度有個錶識跳,以為司機好著數,假設等十分鐘,收得你十零蚊,用十分鐘可以做完支旗落埋客喇」、「香港法例,所有道路,除咗錶位,係只可停車上落,不可停車等候,停低喺度等,差人隨時可以埋嚟抄牌,而家仲興玩錄影,事後收信先知中咗招,到時唔通搵返你嚟認頭?」、「我唔知你支旗有幾大,一陣又話的士佬嫌你短途乜乜物物,如果係唔過40蚊旗,呢度停一停,果度等一等,將心比己,正如你去茶餐廳叫杯熱奶茶仲要這樣那樣,你係冇錯嘅,不過就令人討厭啲囉」。
帖文來源:Facebook群組「的士乘客及司機行為分享區」