陳蕾3月紅館演唱會海報面世 全新造型頭頂「念」字發出紅光

陳蕾2024年3月假紅館舉行其首個個人演唱會，對於海報白髮造型表示自己個人是非常非常之咁喜歡，創作過程也有參與構思！

陳蕾將於明年2024年3月假紅館舉行其首個個人演唱會，今日演唱會海報率先面世，歌迷都嘩嘩聲，因為海報之中是一個全新造型的陳蕾，一頭長長白髮，頭頂「念」字發出紅光，粉絲紛紛大讚非常有型。是次這個白髮造型，陳蕾表示自己個人是非常非常之咁喜歡，創作過程也有參與構思，「我當時同同事講，《沙門》演唱會之後，由《世界與你無關》之後的歌，全部都係黑暗中有道光的感覺，個海報背景可以好黑暗，我個人個妝就好白，我就係個道光嘅感覺。最終就有咗依家見到嘅白髮陳蕾啦，人生第一次紅館演唱會，都希望 poster 上有耳目一新嘅感覺，會質疑呢個係咪我嚟㗎就最好㖭。我想將自己塑造成一個純白狀態，話俾大家知，無論個世界幾黑暗都好啦，我願意成為你嗰道光！」

因為海報之中是一個全新造型的陳蕾，一頭長長白髮，頭頂「念」字發出紅光，粉絲紛紛大讚非常有型

Poster出來之後，陳蕾謂第一眼見到設計師把「念」字放在一個紅色像瞳孔的物體上，更暗自開心偷笑，「我係諗，唔通佢都係fans？因為我諗個演唱會名「念」都係同動漫全職獵人《HUNTER×HUNTER》有關，《HUNTER×HUNTER》入面有個角色古勒比加，佢一憤怒眼睛就會變為紅色，設計師又用咗個紅色圓形圖案圈住個「念」字，所以我超鍾意。好多謝團隊做咗個咁好嘅設計效果比我。」

陳蕾謂第一眼見到設計師把「念」字放在一個紅色像瞳孔的物體上，更暗自開心偷笑

第一次做紅館，反應勢如破竹，問到她開始有壓力未？陳蕾笑謂因為內部認購反應好，所以壓力反而少左，通常壓力都係開騷前一個月先會來到，所以即日開始會做好自己身形管理，聲音管理，體能管理等等，免得有臨急抱佛腳的緊張，成個人Ready好就會減少心理壓力，可以做得更好，「演唱會我希望可以視覺上，音效上都帶俾大家一個沉浸式體驗，唔會有悶場，絕大部份先用音樂去交流，之後Encore環節先用打機來同大家再交流，哈哈....但係公司未知呢件事，哈哈哈.....。」 

第一次做紅館，反應勢如破竹

保誠保險呈獻 陳蕾演唱會 2024 《念》

日期：2024年3月3至5日

時間：晚上8時15分

地點：紅磡香港體育館

票價：$880/ $680/ $480

主辦單位：Warner Music Hong Kong

Citibank 優先訂票

(Cityline購票通)

優先訂票日期及時間：2023年12月18日10:00 開始至2023年12月20日23:59, 售完即止

「期間限定」組合炸爆舞台

《Katch Our Life WARNER! GO!》一直為樂迷期待嘅演唱會，由宣佈至今仍未有演出詳情，加上華納歌手嘅school tour反應非常熱烈，令大家都好期待呢次總動員演出。呢日大會宣佈將於下年2月15日於香港亞洲國際博覽館舉行，華納唱片動員一共12個歌手樂隊單位參與，包括Dear Jane、陳蕾、洪嘉豪、MC張天賦、Gareth.T湯令山、Gigi張蔓姿、Kiri T、moon tang、Zpecial、Lewsz、Nancy Kwai歸綽嶢、Gordon Flanders等等，陣容極為吸引！

《Katch Our Life WARNER! GO!》

呢次演唱會唔同單位歌手Cross Over演出，將個人特色掃出新火花帶出新感覺，MC就話令呢次音樂會「好睇」最緊要：「我同好多同公司嘅歌手都合作過，例如陳蕾、Dear Jane、洪嘉豪都合唱過，我最想同湯令山試吓，因為佢有好多天馬行空嘅創意，如果成真嘅話會好正，但如果超支就真係要加場先搞得掂。有人問如果呢個騷要跳唱嘅話，我係好需要一個女伴，所以我好誠意邀請陳蕾同我一齊嘅，我地叫『PC』組！」

呢日大會宣佈將於下年2月15日於香港亞洲國際博覽館舉行

陳蕾聞言就話公司多創作歌手，冇諗過要跳舞演出：「我冇諗過呢個騷要跳嘅，都係得moon同Nancy學過吓。我地成班同事做過好多School Tour，後台都好熱鬧，大家都係健談嘅人，女仔就傾吓扮靚，男仔就傾第二啲野，反而我驚我地太好傾，本來約好咗傾吓歌單，點知講講吓傾咗另外一啲野。」

呢日歌手齊集影Poster，大家為另一位歌手指定造型影返個搞笑版嘅海報，趣怪造型令人驚喜，歌手們碰面亦傾唔停，氣氛非常熱鬧！Dear Jane主音Tim ：「係咪都難搞啦，但咁先有火花，我地計劃將後台搬上前台，比大家睇到最真實嘅一面，可能淨係『吹水』已經覺得好搞笑。我地好多歌手都會玩樂器，等呢個歌單整理好之後，再慢慢加啲創意！」

呢日歌手齊集影Poster

而同場嘅洪嘉豪揚言取代Howie，練好結他「加入」Dear Jane：「我代替咗佢之後，佢梗係負責唱《黑玻璃》啦，但我係完全唔識結他嘅，我點會比大家估到表演啲咩！其實舊時Dear Jane成日會同同事合唱，但唔知點解我等咗咁耐都等唔到『呢支曲』，佢地快手整出嚟玩吓先啦！我知道觀眾唔係期待每個單位唱2-3首歌，係期待大家合體，所以大家放心！」

湯令山同張蔓姿「互相吹捧」，笑言想與對方台上合體演出，Gigi仲話想「炸裂舞台」：「我好想唱『CHOK』呢首歌，因為呢首歌跳辣身舞應該幾有氣氛！」而Gordon Flanders就比眾人推舉「模仿大賽」，仲即場扮Gigi唱歌，搞到對方哭笑不得，Gordon Flanders仲自薦為對方伴舞！

而moon tang就話想「華納仝人」大合跳，仲話想同MC合唱：「我因為未同佢合唱過，所以想試吓！」而Zpecial就話想同「女聲」合作，仲心思未揀定「對手」：「我地想同Nancy合作，我估佢同Band合作會幾得意，而陳蕾就同Band同台會好型，最好就所有女歌手一齊啦！臨尾叫老闆Gordon Lee上台唱歌，我地幫手彈、moon負責跳舞，華納家族點可以冇佢呢！」