柳應廷張天賦為《KATCH OUR LIFE》打頭陣唱爆亞博 陳蕾洪嘉豪Dear Jane接棒演出擦出音樂新火花

準備好搶飛未？

由Katch音樂娛樂平台主辦的《KATCH OUR LIFE》系列音樂會以「Katch Our Life, Bravely Be You」為核心主題，鼓勵大家活在當下，勇敢做自己。去年《KATCH OUR LIFE方皓玟演唱會》好評如潮，所以今年捲土重來，Katch繼續邀請不同歌手單位參與。在《KATCH OUR LIFE》記者會中，大會更一口氣宣布將舉辦4場《KATCH OUR LIFE》音樂會，而且更有10組音樂單位現身記者會，盛況空前。 

《KATCH OUR LIFE》記者會公布4場音樂會

柳應廷

張天賦

陳蕾

洪嘉豪

記者會上率先公布的是將於8月30日舉行，Visa 及 港鐵冠名贊助《Katch Our Life Jer柳應廷 x MC張天賦 音樂會》。Jer柳應廷與MC張天賦同是《全民造星》出身，Jer過去更曾在《造星》的舞台上，為MC所屬的B4組獻聲合唱，之後便是擔任MC演唱會的演出嘉賓，所以一聽到有這次合作，Jer已經很興奮，他說：「第一次聽到呢個合作係好興奮，因為MC嘅歌係喺我嘅Playlist裡面，一直都好期待如果可以一齊喺台上面唱一啲Rock啲嘅歌會係點，一直都幻想呢個畫面，今次有呢個機會，我哋可以天馬行空玩咩歌都得。」MC亦表示十分期待，更主動提出提早構思Rundown，MC說：「一知道有呢個Show已經即刻問Jer今次個Show可唔可以爆啲，或者提早開會傾下有乜嘢環節，其實我哋玩《全民造星》時都有自彈自唱嘅，如果有Part可以有兩支結他一齊玩，就正了！」除了Jam歌，二人當被問到會否演繹跳唱作品，MC笑言：「都會係一個衝擊，如果時間容許，我唔介意㗎，有呢一Part都好睇，我哋都出名跳唱勁。」Jer也和應道：「信心方面係有嘅！」二人的分享隨即引發現場Fans瘋狂尖叫，大家都引頸以待。

柳應廷、張天賦攜手打頭陣

第二場將於2024年年底舉行的音樂會則有陳蕾與洪嘉豪的參與，而且更會加入一位男歌手組成鐵三角組合。陳蕾大膽表示這位隱藏人物顏值非常高，但她對Kaho笑言：「不過今日（昨日）好多你啲人喺度，所以我要話佢爭你啲啲，但都係零死角。」Kaho聽罷亦和應道：「佢都係靚仔，我同佢喺電影上合作過，但佢頭腦比較慢少少，有啲天然呆。」這樣突破性的組合，究竟會有甚麼突破性演出呢？Kaho即透露：「我其實有聯絡佢，問過佢會唔會花少少時間一齊跳返Part舞。我有少少想迫佢一齊跳嘅，因為大家應該未見過，同埋我當初都係俾人迫跳舞。」至於陳蕾則期待三個人在台上的互動，她解釋道：「因為佢同Kaho講嘢一樣，好難接，但呢種難接又有佢嘅笑點，所以我比較期待同佢哋喺台上互動，唔知到時會傾咗啲咩出嚟。」究竟這個鐵三角會擦出甚麼火花呢？就要拭目以待了！

陳蕾、洪嘉豪夥神秘男歌手接棒演出

第三場將於2025年年初舉行的音樂會則有Dear Jane坐鎮，屆時他們會與一隊海外男子組合同台演出，Dear Jane大讚這隊海外組合廣東話講得不錯，又懂得跳舞，Tim此時搞笑道：「我估一定會有人問我哋會唔會想同佢哋一齊跳舞，但其實我哋跳得太勁喇！我反而期待大家將我哋兩個單位嘅歌都背到滾瓜爛熟，到時一齊大合唱，應該好好玩。」兩大組合的一場音樂交流，相信必定讓樂迷陶醉於他們的音樂世界。

Dear Jane

第四場同樣於2025年年初舉行的壓軸音樂會，則由華納唱片旗下的歌手同台演出，當中包括Dear Jane、陳蕾、洪嘉豪、MC 張天賦、Gigi 張蔓姿、moon tang、Zpecial、Lewsz、Nancy 歸綽嶢，以及昨日未能現身記者會的Gareth.T、Kiri T及Byejack。記者會上，一眾師弟師妹首次同台參與大型演出，他們都各自以一個詞語形容此刻心情，而作為師兄師姐的Dear Jane、陳蕾、Kaho及MC，則以動作表情表達，各人別出心裁的即興演出，都教人喜出望外，現場笑聲連連，相信音樂會當晚，亦必定極盡視聽之娛。介紹過4場《Katch Our Life》音樂會演出陣容後，一眾出席歌手單位與嘉賓進行簡單而隆重的啟動儀式，《Katch Our Life》系列音樂會亦宣告正式展開撲飛行動。

華納唱片總動員壓軸開唱

Visa 及 港鐵冠名贊助《Katch Our Life Jer柳應廷 x MC張天賦 音樂會》
日期：2024年8月30日（星期五）
時間：晚上8時15分
地點：亞洲國際博覽館 Arena
門票將於6月14日（星期五）早上10時起於Katch音樂娛樂平台憑Katch Point兌換活動門票，更多詳情，請瀏覽Katch官方社交平台專頁。

「期間限定」組合炸爆舞台

《Katch Our Life WARNER! GO!》一直為樂迷期待嘅演唱會，由宣佈至今仍未有演出詳情，加上華納歌手嘅school tour反應非常熱烈，令大家都好期待呢次總動員演出。呢日大會宣佈將於下年2月15日於香港亞洲國際博覽館舉行，華納唱片動員一共12個歌手樂隊單位參與，包括Dear Jane、陳蕾、洪嘉豪、MC張天賦、Gareth.T湯令山、Gigi張蔓姿、Kiri T、moon tang、Zpecial、Lewsz、Nancy Kwai歸綽嶢、Gordon Flanders等等，陣容極為吸引！

《Katch Our Life WARNER! GO!》

呢次演唱會唔同單位歌手Cross Over演出，將個人特色掃出新火花帶出新感覺，MC就話令呢次音樂會「好睇」最緊要：「我同好多同公司嘅歌手都合作過，例如陳蕾、Dear Jane、洪嘉豪都合唱過，我最想同湯令山試吓，因為佢有好多天馬行空嘅創意，如果成真嘅話會好正，但如果超支就真係要加場先搞得掂。有人問如果呢個騷要跳唱嘅話，我係好需要一個女伴，所以我好誠意邀請陳蕾同我一齊嘅，我地叫『PC』組！」

呢日大會宣佈將於下年2月15日於香港亞洲國際博覽館舉行

陳蕾聞言就話公司多創作歌手，冇諗過要跳舞演出：「我冇諗過呢個騷要跳嘅，都係得moon同Nancy學過吓。我地成班同事做過好多School Tour，後台都好熱鬧，大家都係健談嘅人，女仔就傾吓扮靚，男仔就傾第二啲野，反而我驚我地太好傾，本來約好咗傾吓歌單，點知講講吓傾咗另外一啲野。」

呢日歌手齊集影Poster，大家為另一位歌手指定造型影返個搞笑版嘅海報，趣怪造型令人驚喜，歌手們碰面亦傾唔停，氣氛非常熱鬧！Dear Jane主音Tim ：「係咪都難搞啦，但咁先有火花，我地計劃將後台搬上前台，比大家睇到最真實嘅一面，可能淨係『吹水』已經覺得好搞笑。我地好多歌手都會玩樂器，等呢個歌單整理好之後，再慢慢加啲創意！」

呢日歌手齊集影Poster

而同場嘅洪嘉豪揚言取代Howie，練好結他「加入」Dear Jane：「我代替咗佢之後，佢梗係負責唱《黑玻璃》啦，但我係完全唔識結他嘅，我點會比大家估到表演啲咩！其實舊時Dear Jane成日會同同事合唱，但唔知點解我等咗咁耐都等唔到『呢支曲』，佢地快手整出嚟玩吓先啦！我知道觀眾唔係期待每個單位唱2-3首歌，係期待大家合體，所以大家放心！」

湯令山同張蔓姿「互相吹捧」，笑言想與對方台上合體演出，Gigi仲話想「炸裂舞台」：「我好想唱『CHOK』呢首歌，因為呢首歌跳辣身舞應該幾有氣氛！」而Gordon Flanders就比眾人推舉「模仿大賽」，仲即場扮Gigi唱歌，搞到對方哭笑不得，Gordon Flanders仲自薦為對方伴舞！

而moon tang就話想「華納仝人」大合跳，仲話想同MC合唱：「我因為未同佢合唱過，所以想試吓！」而Zpecial就話想同「女聲」合作，仲心思未揀定「對手」：「我地想同Nancy合作，我估佢同Band合作會幾得意，而陳蕾就同Band同台會好型，最好就所有女歌手一齊啦！臨尾叫老闆Gordon Lee上台唱歌，我地幫手彈、moon負責跳舞，華納家族點可以冇佢呢！」