羅啟豪為豪殼現場製作香蕉蛋糕及深情獻唱感謝歌迷一直以來的陪伴

娛圈事

羅啟豪為豪殼現場製作香蕉蛋糕及深情獻唱感謝歌迷一直以來的陪伴

2024年02月20日 19:00 最後更新：02月21日 10:36

羅啟豪出席歌迷會「豪吧」為佢舉辦嘅「豪吧龍年新春團拜」，同近 150 位豪殼過新年。

正式成為歌手後第一個農曆新年，羅啟豪（英國豪 Ramon）喺日前出席歌迷會「豪吧」為佢舉辦嘅「豪吧龍年新春團拜」，同佢近 150 位豪殼（歌迷暱稱）過新年。活動嘅主要環節包括啟豪親手為佢嘅豪殼現場製作香蕉蛋糕同埋為佢哋獻唱。問到啟豪夠唔夠時間即場整百幾件蛋糕，佢話：「因為時間關係，我之前嗰日喺屋企預先整咗九底，今日現場再整四底，咁就夠時間又夠食。呢個食譜係我好幾年前學嚟整俾朋友食，朋友嘅反應都唔錯。豪殼一直對我咁好，我好開心今次可以親手做返少少嘢送俾佢哋，表達我嘅心意！」

點擊看圖輯

更多相片

活動以搣紙龍鬥長嘅遊戲開始，勝出嘅豪殼可以做啟豪嘅烘焙小助手，協助佢現場完成整個蛋糕嘅製作過程。其中一位豪殼仲要喺偶像一邊講解嘅時候一邊幫佢揸咪，估計豪殼蛋糕未食，都已覺得甜到入心！可能因為唔習慣用人哋嘅焗爐，啟豪放蛋糕入焗爐冇耐，墊蛋糕嘅牛油紙就著咗小火，好在有開餐廳嘅啟豪二家姐監場。二家姐處變不驚，秒速用毛巾冚熄啲火，喺贏得在場豪殼嘅掌聲之餘，亦令啟豪可以繼續放心烘焙。

喺等候蛋糕出爐期間，豪殼爭取時間同豪殼再玩遊戲同埋為大家獻唱八首歌。當中有廣東話、國語同英文歌，其中一首仲係英國豪近日喺自家 YouTube 頻道「歌曲重Sung」系列嘅第五首作品，亦係葉蒨文舊作——〈回歸自然〉，令團拜猶如一個小型音樂會。今次活動請嚟同樣係中年好聲音第一季（中一）參賽者嘅「本地豪」（馮志豪）做主持，同時仲同啟豪合唱一曲〈左右為難〉。馮志豪表示：「好開心收到 Ramon 嘅邀請，成就我哋中一生所稱嘅「雙豪拼盤」嘅首度二人合唱，實在令我覺得好激動、好振奮！」另外，佢對豪殼亦表示欣賞：「豪殼疼錫啟豪就聽得多，今日終於可以第一次親眼目睹，覺得佢哋好可愛！譬如啟豪話將蛋糕食譜嘅糖份量減半，豪殼即刻高呼：『嘩——！！！』去鼓勵佢；啟豪話將香蕉嘅份量加倍，由兩隻變四隻，佢哋又為佢歡呼，總之啟豪做乜豪殼都會：『嘩——！！！』，令現場氣氛非常高漲，亦睇得出佢哋真係好錫 Ramon！而我今日觀察到，Ramon 對佢每一位嘅豪殼都好體貼，為每一位豪殼親手送上蛋糕同埋合照，所以真係抵豪殼咁錫佢！」

見現場張貼咗好多手寫毛筆字揮春，啟豪分享話，原來其中一位豪殼係書法大師，佢除咗用啟豪嚟緊嘅新歌歌名〈相信相信〉親筆揮毫咗好多揮春用嚟佈置會場之外，亦愛嚟送畀啟豪同豪殼留念。除此之外，佢仲用啟豪兩個字寫咗一句對聯——《啟程放懷天地外豪邁信步山水間》——真係好有意思。

往下看更多文章

羅啟豪獲歌迷花心思籌辦市集感動不已感激鄭丹瑞提攜後輩

2024年12月18日 23:00 最後更新：23:18

羅啟豪邀請一班自己非常重視的嘉賓一同見證市集開幕！

羅啟豪（Ramon 英國豪）的歌迷會「豪吧」為了增添普天同慶的聖誕氣氛，更為最喜愛的歌手羅啟豪送上一份聖誕大禮，特別於今年12月在赤柱美利樓舉辦一共七日的《羅啟豪冬日約會迷你市集》，並於日前隆重開幕，請來鄭丹瑞（旦哥）、胡渭康、以及《中年好聲音》家族吳大強、丁文俊、魏嘉信、顏米羔、劉威煌、黃健文、安雅希、周碧嘉、梁浩賢、顏志恒太太及兒子等參與剪綵儀式。

心思滿滿，《羅啟豪冬日約會迷你市集》特別利用十三個含「心」字的詞語——譬如細心、匠心、醉心——去作為攤檔名稱以及代表啟豪的特質，並為完成參觀市集的訪客，誠意送上免費的精緻烘焙、熱飲及禮品，加上有遊戲、手工藝、社企產品及慈善義賣，開幕首日大受市民歡迎，場面墟冚，為今年聖誕率先燃點節日氣氛！

開幕儀式期間，啟豪解釋今次市集是人生重要的里程碑，所以邀請自己非常重視的嘉賓以見證市集開幕；啟豪與歌迷心意一致，強調市集並非一個歌迷會活動，而是面向所有遊客的項目，啟豪說：「歌迷會用一般市民的角度去構思市集內容，希望訪客食得、玩得、買得開心，不但前來參觀市集，盡興而歸，並介紹身邊親友前來分享歡樂；豪殼（歌迷暱稱）花盡心思籌辦市集，希望令更多人認識到我，這份心意教我感動不已。」

今天第一次走進市集，啟豪形容心情百感交集：「我知道豪殼花了很多精神心機去成就這個市集，今天完全看得出當中心意與心思，我覺得好成功，應該會吸引不少遊客，達到預期的目標！」啟豪補充，去年年尾曾舉辦了《與羅啟豪之冬日約會音樂會》，今年的聖誕市集正是延續篇，他說：「很想延續這個節日氣氛，赤柱美利樓的聖誕市集已有多年傳統，向來吸引很多人前來參觀，今年我們參與其中，在這裏有十四個攤位，全部均是充滿聖誕氣氛的食品、扭蛋機、遊戲攤位，亦有義賣各樣社企精品，內容非常豐富。」

今次市集場地最獨特之處，就是被絕佳的海景環抱，所以精心挑選藍色、白色與啡色的聖誕裝飾，以配襯窗外無邊際感的晴空大地。在市集開幕禮上，一眾嘉賓拆開歌迷用以貼滿入口的巨型花紙與絲帶，寓意嘉賓陪同主人翁羅啟豪一起拆開歌迷會送給他們的禮物。「豪吧」每次活動皆創意無限，這次開幕方式亦不例外。

鄭丹瑞專程前來市集開幕禮支持啟豪，旦哥笑言：「今天天氣本來有點寒意，但一走進這個市集，就可以感受到啟豪帶給大家的溫暖，我很高興看到這麼有意義的活動，除了熱愛唱歌以外，啟豪真的身體力行去回饋社會，我作為前輩，會全力支持他！」

問到旦哥與啟豪的認識，原來旦哥當年都有追看《中年好聲音》，好希望支持一眾畢業生追夢，所以曾邀請啟豪出席活動。啟豪表示非常感激有這位前輩提攜，更表示非常感恩旦哥今次抽空出席支持，因爲知道旦哥剪綵後要即時趕往為電影《得寵先生》謝票，正當啟豪在現場呼籲大家一定要到戲院欣賞這齣講述人狗共融的溫情電影，此際劉威煌剛帶同兩隻愛犬到達會場，非常巧合，旦哥有感而發：「之前已試過多次謝票，今次還是首度看到觀眾帶着狗狗入戲院，這個新鮮體驗令我深受感動！」

剪綵後，啟豪當上星級領隊帶嘉賓參觀市集，見大強哥好投入地玩齊所有攤位遊戲，丁文俊、魏嘉信、顏米羔、劉威煌分別成功搶購超筍價一折太陽眼鏡、社企出品的朱古力及湯包等，收穫豐富。啟豪到達飲食攤位時最為興奮，見到非常精緻的糕點飲品，立時表現得有選擇困難，見到枱面擺放着檸檬方磚蛋糕、小鴨沐浴曲奇、花果協奏曲（柑桔檸檬伯爵茶）、一縷陽光（香橙熱紅茶）等等，品質、賣相與味道完全達到專業水準。