男乘客不滿有人帶榴槤上巴士「搞到架車成陣味」,要求車長及停車報警,連累全車乘客下車轉車,車長親解畫。
男子投訴有人帶榴槤搭巴士要求停車報警
有網民於Facebook群組「屯門公路塞車關注組」發文,表示日前乘搭九巴58M線前往屯門時,目睹一名男乘客從轉車站上車後不久,因聞到車廂內有榴槤味,而向車長投訴「車內有人帶榴槤上車,搞到架車成陣味」,男乘客更要求停車並報警處理。
連累全車乘客下車轉車 最終未有報警
最終,車長唯有安排所有乘客下車,再轉乘另一輛巴士離開。而經交涉後,男乘客決定放棄報警。
樓主嬲爆表示「好心你啦,人地帶個榴槤雖然係有味,但人地包到實一實,又無整污糟架車,車長都話呢度唔係新加坡,公司無規例話禁止帶榴槤上巴士」。他又不忿男乘客連累全車人「當時繁忙放工時間,架車都就返到屯門,就係因為要滿足你呢位嗅覺大帝,阻住成車放工客返屋企,你咁頂唔順咪坐其他位,上樓上坐囉,係要為難車長同乘客,你好唔好意思呀?」
疑車長親自解畫
帖文曝光後,有自稱是當事車長的網民現身說法「首先同咁多位乘客講對唔住先喇。呢位乘客係屯公塞車時鬧小弟,身為一個車長,你有冇搞錯呀,你點解俾個客帶榴槤上車呀,咁臭。咁小弟呢,就帶住口罩,打開左隻窗,同埋該名乘客並非帶原隻榴槤,係斬件個隻,根本就睇唔到。好啦,我處理嘅時候,佢話要報警,我唯有過客,準備打電話時,佢鬧我做咩唔截住當事人,鬧我唔係一個稱職嘅車長,我都認,我好少處理呢啲事情,但係人都走咗,成部車都吉佢,我問佢,滿意未?最後佢話唔報喇,完。多謝呢位先生,遲咗收工,啱啱先返到屋企食飯」。
疑似車長又表示「呢班車嘅乘客大多數都好平靜,係帶榴槤果位乘客差啲同佢打架,大多都係怕會打起上嚟,唯有立即轉車避免發生打鬥」。
網民支持車長怒批男乘客
不少網民表示支持車長「車長,不用自責,你已處理得好好」、「唔洗道歉,要道歉都係嗰條茂利道,你都唔想遇到白卡人」;有網民亦指責男乘客「收工時間阻x住哂,正x街黎」、「轉車站再過到屯門唔使10分鐘姐。使唔使呀?」、「要同全車攬炒先開心。覺得自己係正義英雄?」、「呢種人真係好乞人憎,癲少陣啦,阻住人放工返屋企」、「其實如果真係頂唔順,咪落車等下一班囉,搞到全車人要陪佢玩」。
帖文來源:Facebook群組「屯門公路塞車關注組」