新歌《新牌仔》以「成長」為題李幸倪自揭曾壓力大到晚晚發夢考試

娛圈事

新歌《新牌仔》以「成長」為題李幸倪自揭曾壓力大到晚晚發夢考試

2024年07月25日 16:30 最後更新：16:37

Gin Lee李幸倪推出全新歌曲《新牌仔》，這次新歌為大家帶來「成長」課題，歌詞繼續由黃偉文（Wyman）操刀，作曲方面，則由Gin跟好友馮允謙（Jay Fung）、陳考威及黃銘一起創作。

點擊看圖輯

Gin推出新歌《新牌仔》。

Gin分享成長的故事。

Gin指小時候總覺得大人甚麼都會，但長大後才知並非如此。

作曲由Gin及好友Jay Fung合作。

歌詞再次找來Wyman相助。

MV方面，Gin與導演麥曦茵是首次合作。

MV中禮堂的場景令Gin感受特別深。

觀看相關影片按連結：https://youtu.be/fA7rKkQcfbQ

原來「成長」這個主題，一直在Gin的袋中藏着多年，「我記讀大學嘅時候，有一日我個同班同學同我分享佢屋企嘅嘢，話點解佢爸爸會係咁？我就突然間有一個諗法，同佢講：『其實你爸爸都係第一次做爸爸㗎咋，可能有好多嘢佢都係學緊，你唔好怪佢啦，可能佢之前做得唔好，但經過嗰次之後佢有嘗試補救、有嘗試做返好，不如你原諒佢或者俾多次機會佢。』」

Gin謂小時候總覺得大人應該甚麼都會，長大後才知並非如此，「有時候佢哋會犯錯或者唔識，所以人生就係要不停學習，冇人永遠都一百分。」她續說：「人生去到唔同嘅階段，分唔同嘅工，每一個階段做嘅每一個選擇，當時可能會令到你不知所措、會令到你覺得好難嘅一啲新嘅課題，但你要去學。」

「苦候」多年，終於迎來這首歌，Gin直言是Timing、是緣份。她跟Jay Fung認識多年，閒聊間也會提到寫歌，但一直未有行動，直到今年二人合作拉闊音樂會，再次提起作歌，終於成事。Gin大爆《新牌仔》本來是不存在的，「我哋原先寫咗另外一首歌，好順利寫完之後，大家覺得好似仲有啲精力、仲有好多諗法，仲可以去創作另外一首歌，當時我好興奮，『我有個諗法！』跟住我就成個故事講咗一次俾大家聽，大家好有感覺，佢哋都覺得呢個題材有趣，《新牌仔》就喺咁嘅情況下誕生。」

而歌詞就再次找來Wyman相助，Gin坦言歌詞有很多擊中她的小心臟，覺得這是Wyman給她的一份小禮物，「首先一定係父母嗰一part，佢知道我同屋企人感情好好，我好想孝順父母，但可能有啲時候做唔到，因為自己要離鄉別井追求自己想要嘅嘢，歌詞有句『但對父母親別提及傷口』；第一句『大踏步踏出氧氣罩』都好有感覺，因為我係七星女，唔足月出世，一出世就要瞓氧氣箱一個月先可以出嚟。」

MV方面，Gin跟導演麥曦茵是首次合作，找女導演是希望透過女性的敏感度，感受girl's talk，然後再用她的方法將感受呈現於MV中。籌備拍攝前期的工作，Gin表示發送了很多段audio note給導，她笑言全部至少有四十五分鐘，將自己由出生到現在的每個重要時刻都跟導演說了一遍，「講晒我成個人生比佢聽，我已經特登講好快，哈哈，我自己已經x咗2㗎啦，至少！呢個其實係一個幾得意嘅過程，因為我同導演係之前係完全未見過面，但係佢彷彿認識咗我一生。」期間更講到喊，她也說自己始料不及，「講到某個位講唔落去，stop咗先，然後開始喊。隔咗五分鐘我平復咗再繼續，我真係估唔到會講到自己喊，我諗導演都有嚇親。」

MV其中一個場景是禮堂，Gin表示感受特別深，「我係一個好容易好大壓力嘅人，記得有一排我好大壓力嘅時候，我每一晚都發同一個夢，就係發夢考試！夢入面我係『死啦冇溫到書呀』、『呢一科唔熟呀』、『唔記得晒啲嘢呀』真係好驚！但MV嘅情景係唯美嘅，我就諗返起求學時期好開心同同學一齊打排球、食嘢、傾偈、田徑，係溫馨嘅，一定唔係考試嗰part，哈哈。」

Tags:

排球

往下看更多文章

張艾嘉率馮允謙劉偉恒任「Global 6K for Water」大使跑出同理心齊為非洲水利工作籌款

2024年11月07日 15:30 最後更新：22:38

張艾嘉透露她與跑步的淵源，原來與好友周潤發有關！

世界宣明會全球性籌款活動「Global 6K for Water」即將登陸香港舉行，參與者透過跑步或步行為缺水社區的水利工作籌款，美國及韓國等均先後舉辦這項既有意義又健康的活動。今年，香港世界宣明會將「Global 6K for Water」帶到香港，首屆香港「Global 6K for Water」將於12月8日假金鐘添馬公園舉行！香港世界宣明會更邀得影后張艾嘉領軍，孖唱作歌手馮允謙（Jay Fung）及導演劉偉恒擔任活動大使，早前更齊齊為活動拍攝宣傳片及海報。

以往經常與宣明會到不同地方探訪的張姐，首次以跑者身份為宣明會活動籌款，提到她與跑步的淵源，原來與好友周潤發有關：「自從COVID之後，周潤發就約我去跑步，開頭我真係跑唔郁，3分鐘我已經就嚟死，不過佢話我知跑步就係需要一種毅力，就係要慢慢練，唔可以停，要繼續跑。喺跑步中間，我得到好多樂趣同埋搵返啲健康。」

劉偉恒笑指自己跑步，亦間接與發哥有關，他表示好友周家怡同樣在疫情期間，邀請他加入跑隊：「其實嗰隊人就係由發哥跑步團嗰度衍生出嚟，發哥嘅教練蘇凱男同我哋一齊跑。嗰陣日日喺城門水塘跑，見親都係影視圈嘅人，米雪姐、黃日華、發哥個表妹。最有趣嘅地方，我同過咁多同佢咁(接)近嘅人跑，唯獨我冇同過發哥跑，連野生捕獲都未試過。」Jay Fung雖然同樣未曾與發哥跑步，但他直言：「如果佢叫我跑，我一定去啦，可以一路跑一路selfie，正！」

這次的「Global 6K for Water」旨在讓參與者感受缺水社區孩童，每日徒步約6公里取水的體驗。張姐大讚非常有意義：「我曾經探訪過盧旺達陪過一個小朋友去打水，要上山落山，拎住一個破爛嘅水桶放喺頭頂度，行好遠路打水畀屋企人飲，我覺得用跑步去支持佢哋，係好有同理心。雖然我哋唔使拎住個水桶跑，但係都會明白行咁遠路去攞半桶水，係幾咁辛苦嘅一件事。」Jay Fung認為生活於香港好幸福，打開水龍頭便有自來水，希望藉著這次活動，嘗試感受缺水社區孩童，每日要走很遠取水的生活。身為父親的劉偉恒，跑步活動讓一家更了解貧困地區居民的生活狀況，期待兩個女兒透過活動，強身健體之餘亦可以有更深的體會。

「為了生存，每日仍然有無數孩子必須冒險徒步大約6公里，才能夠取得一家需用的水。」

張姐指乾淨水是生存必要的條件：「有次去探訪，我哋跟個小朋友去攞水，落山要20分鐘，佢裝滿個水桶『POP』一聲就放上個頭，仲要係單手就行上山返屋企，我哋喺後面真係追唔到佢，但係返到屋企可能得返半桶。生命當中最重要，第一係空氣，第二係水，冇咗呢兩樣嘢我哋會死。城市人同佢哋睇嘅嘢係有距離，好似我哋平常洗手，佢哋可能為咗留住啲水嚟飲而唔洗，因為太珍貴。宣明會做水利工程，可以令佢地好近打到水，更重要係教育佢哋點樣自力更生。」

三人除了是「Global 6K for Water」的活動大使，同樣是宣明會的助養者。其中，張姐成為助養者超過30年，她滿足地笑道：「有個小朋友，我由佢8、9歲就開始探訪佢，同佢一路有聯絡，佢有嚟過香港，到佢大學畢業做咗律師，之後佢已經變成媽咪，我見到佢嘅成長，好似自己啲小朋友一樣。助養最大嘅意義唔在於我，係在於個小朋友，知道有人幫佢嗰份開心同希望。」她亦非常有心，每次收到助養兒童的心意卡及聖誕卡，必定抽時間親自回信：「我會對返係咪我個小朋友，又會睇佢哋嘅相有冇長大咗。我得閒嗰陣，又會諗啲古靈精怪嘢畀佢哋，我諗小朋友係鍾意睇呢啲。」

劉偉恒二十多年前已開始參與助養計劃，他有儲起助養兒童的書信，他說：「每年都會收到書信、聖誕卡，我全部都儲起晒，佢哋提醒我，我都唔係淨係為咗自己工作，原來都可以照顧到人，又可以同自己嘅小朋友分享返，幫助到人真係好大嘅恩典。」

另外，張姐亦會身體力行到不同脆弱地區探訪，她笑指自己是「捐款者嘅眼睛」，為大家親自看看捐款的去向。她分享其中一些深刻的經歷，指有些脆弱地區會捉小朋友當童兵：「餵佢哋食火藥，佢哋會癲咗，然後等啲小朋友自己攞槍去殺自己條村嘅人。我去探訪過呢啲小朋友，佢哋每晚都發惡夢，見到佢哋眼入面嘅恐懼，同佢哋講咩對眼都唔知去咗邊。」是否這些經歷，令她多年來堅持善行？她直言不覺得自己在做善事：「當你覺得自己做緊善事嗰陣，好似覺得自己叻過人哋、優越過人哋。我覺得貧窮唔代表唔快樂，嗰啲苦難嘅小朋友，嗰個真心嘅笑容，係我喺城市度睇唔到嘅。」劉偉恒認同張姐的說法，作為基督徒的他，指幫助別人並非為自己或者自我感覺良好，而是應盡之義。

問到他們最想邀請誰人參與這次的「Global 6K for Water」？Jay Fung表示最想邀請好友釗峰齊齊跑：「我哋有經常打波，跑步都幾啱我哋，同埋希望跑嗰陣可以撞到啲朋友、Fans，撞到會好開心，可以一齊影幾張selfie。」劉偉恒指已「下令」太太及兩個女兒齊齊落場跑：「到時會參加3公里親子組，而家已經開始練跑啦。」張姐鼓勵沒有跑步習慣的人亦都可以參與：「今次唔止係6公里，都有3公里同1公里，無論你想行定跑，你點做都得，最緊要係你有心去支持佢哋。」