而家中秋節月餅品種越嚟越多，絕對係越食越有驚喜! 不過最近有隻月餅就越食越驚…因為人家賣流心月餅，佢就賣黑心月餅。呢隻黑心月餅係「餘一」嘅出品，呢間嘢早兩年已經被揭發賣「發霉月餅」，今年就因為係無牌食品工場制造月餅，俾食安中心封咗舖，但聽聞最初整好嗰批月餅係海外訂單，已經寄咗去英美各地，所以奉勸各位海外食家要小心，因為食無牌工場月餅真係責任自負！
中秋節係中國人嘅大節，邊鬼個整呢啲無牌工場黑心月餅？明查暗訪之後起咗「餘一」話事人嘅底，原來係前旺角區議員朱X瑋。呢個阿瑋喺「暴大」數學系畢業後就學人攪工運，佢喺2007年煽動班紮鐵工人大罷工。到2010年就黐埋另一隻「豬」朱迪迪反高鐵，如果當年唔係佢哋不停唱衰高鐵，話工程會影響沿線嘅樓宇同人命安全，又話要滅菜園村先可以起高鐵，成個高鐵工程就唔駛拖慢咗成9個月，嘥曬啲錢。而家高鐵開通咗之後唔單止人同樓都無事，而且個個仲爭住坐，事實証明佢哋當日只係利用社會議題搞分化、搞對抗，阻住發展，成件事完全係玩誇張失實指控，愚弄市民！
到咗2019年，朱x瑋就食住「黑暴」條水，做咗旺角嘅區議員。利用黑暴抗爭光環當選嘅佢，一心只係諗住撈政治油水，完全無諗過服務社區，點知2021年被DQ咗，即刻無咗份人工高，但又唔使做嘅區議員工，於是佢唯有絞盡腦汁去搵快錢，搵大錢！俗語都有講，唔熟唔做、唔熟唔食，所以佢首先開咗間網購店「餘一」去食「黃色經濟圈」呢條水。後來發覺手足啲錢長呃長有，於是突然華麗轉身去關心「囚犯權益」，成立所謂囚權組織「後鳥」，去支援在囚反對派人士，其實佢係去發囚犯財先真。呢隻「後鳥」初初就搞法律支援、釋囚經驗分享，同埋提供家屬心理支援，跟住佢哋仲去招募啲大學生做「後鳥」實習生去探監。佢哋係藉住呢個平台去繼續發佈反政府訊息，同埋去賺盡在囚手足屋企人嘅錢。點賺？就係賣「囚犯平安包」去謀取暴利囉！
乜嘢係「囚犯平安包」？其實就係囚犯親友探監時，拎去俾在囚人士嘅物資。因為懲教署對俾囚犯嘅物資有嚴格嘅規定，所以呢個阿瑋就借啲意透過「後鳥」去接觸在囚人士嘅屋企人，然後建議佢哋去「餘一」訂平安包俾在囚嘅親朋戚友。好多人驚買錯嘢拎唔到入去監倉，咁咪幫襯佢哋囉。佢哋嗰兩款平安包賣850-1000 蚊，我計過喇，佢哋基本上賺成一半！話就話啲利潤係用嚟支援在囚手足，但佢哋又無將盤數攤出嚟，鬼知道堅定流咩！
賺錢點會嫌多㗎，但係在囚手足比起潛伏係外面小黃人嘅數目，真係小巫見大巫。於是係2023年嘅時侯，阿瑋把心一橫去搵大錢，佢孖住「雲利」一對保險經紀嘅兄弟同埋兩個D Q咗嘅區議員，去搞強積金生意，因為唔想俾比其他黃人捷足先登呢盤大生意，佢哋於是高調地攪咗好多個所謂「強積金」講座，又懶叻咁接受訪問谷人氣！由於樹大招風，終於有「手足」睇唔過眼，踢爆阿瑋原來係無「強積金中介人」牌照，唔查由自可，一查就發現成個掠水集團有人虛報入職紀錄、有人又偽造保險履歷等等，攪到個個自己一身蟻。內幕消息話成單嘢仲查緊，而家佢哋就真係有得震、無得瞓喇！
其實由黑暴開始，有唔少人借住黃色經濟圈嚟開餐廳、開各色各樣嘅舖頭，吸自己友嘅血。呢啲黃店一喺就抬高曬啲價錢、一喺就賣啲次等貨嚟掠水呃錢。點解佢哋啲客仔咁蠢，有平嘢優嘢唔買，要幫襯呢啲二打六劣質舖頭買嘢呢？
鍾情局．零零發
鍾情局
** 博客文章文責自負,不代表本公司立場 **
一月頭開始，新聞紙成日講加州發生歷史以來最嚴重嘅山火，嗰場火由1月7日開始，好似燒到而家都未完全救熄。洛杉磯多個地區有火頭，據聞有多過25人死亡，數十萬人被逼疏散，多過1萬座建築物被焚毀，初部估計超過1500億美元損失，聽落都好恐佈。我零零發睇咗好多報道，發現呢次山火有好多不為人知嘅事，估唔到美國堂堂一個科技同經濟大國，會攪成咁樣，睇落都幾可悲同可笑架！
冇水救火
山火先係南加州海岸附近嘅豪宅區爆發，以平均每分鐘摧毀3個標準足球場既速度蔓延，但消防人員到現場時，所有消防栓係冇水，唔係冇幾分鐘，係足足冇水幾個鐘啊！ 風乘火勢，有咩辦法唔燒到渣都冇剩吖！事後揭發原來最大同主要供水嘅水庫，當時因為定期維修抽到乾曬塘，一滴水都冇，所以冇水泵去3個大型水箱同各地的消防栓，更可笑係洛杉磯水電局話當地嘅供水系統，就算正常運作，都只能應付一、兩楝房屋嘅火災，遇上稍微大一啲嘅山火，供水系統就會崩潰；而佢哋亦從來冇為大型山火更新市政供水系統。唔係掛！加州山火基本上年年都發生，點解會係風高物燥嘅季節攪維修，有冇腦㗎？咁樣做嘢都得，簡直就妄顧居民嘅安危，真係荒謬到極點！
冇人冇物資救火
供水系統求求其都未算呀，舊年洛杉磯市長更加削減消防部門開支超過1750萬美元，大大削弱咗人手同培訓，消防局局長更坦言從來都冇為大規模災難做過準備。吓，咁都講得出！ 更有甚者，有報道話洛杉磯消防局將大量裝備，好似水管、噴咀、頭盔同個人防護裝備，由國民警衛軍運送咗去援助烏克蘭。唉！真係自己都未顧得掂，就走去扮大佬送禮，真荒謬！而其他州份嘅支援又嘆慢板，政府唯有喺加州懲教所派出近1000個囚犯去救火，佢哋重有補水津貼㖭！我零零發睇到想唔O嘴都唔得！！！
資訊混亂，逃亡塞車
喺山火發生頭幾日，資訊非常混亂，洛杉磯全市近1000萬居民嘅手機連續兩日都收到緊急信息，叫所有民眾準備疏散，引起全民恐慌，事後証實係警報系統出錯。不過受火災影響嘅居民，就算想開車走都有困難㗎，因為到處屋多路窄，周圍塞車，逼住棄車徒步走，所以畫面睇到好多泊係路邊嘅名貴汽車被燒到通頂。政府廢啫，洛杉磯嘅居民都唔係傻架，佢哋早喺10年前，已經同市議會傾可能發生山火出現嘅堵塞情況，但得到嘅回應係: 冇必要制定詳細應對計劃，具體疏散路線只有係火災發生時才能決定咁話！呢招冇Plan B嘅太極拳，真係發揮得淋漓盡致！
有錢就水源充足
沒有最荒謬，只有更荒謬！聽聞加州有個民主黨背景富豪家族，擁有加州13萬英畝土地嘅農場，通過政治捐款同游說，佢一家就壟斷咗洛杉磯總供水量既92%，每年將1630億加侖既水儲存係地下，咁就唔怕乾旱天氣，確保佢的農場同佢屋企日日都水源充足，但難為有啲社區有時幾乎冇公共供水，要靠運水車接濟。有高人話，加州本身就係民主黨票倉，而州長本身又係黨友，亦曾接受過呢個家族捐獻，咁你話有冇關係呢？呢啲係咪就係佢哋所講嘅「民主社會」呢？
買唔到保險
年年山火，加上個政府咁啡啡流，所以啲保險公司就梗係稔縮數啦，原來係2023年開始，加州12間保險公司之中，有7間已經退場唔開新保單，攪到好多居民間屋一係冇保險，一係就被逼買州政府好貴、同保障好少嘅保險計劃。雖然話今次幾大災區，主要都係有錢人或明星居住，但係睇見自己家園燒成咁，又未必有保險賠，同埋有咩首尾跟都未知，所以隨時都會破產，都咪話唔淒涼呀！
趁火打劫
唔好以為「美國優先」，啲人真係上等啲！ 原來真係有人會趁火打劫！ 一場火，搞到警察疲於奔命，社會秩序大亂，所以唔去「零元購」就笨啦！ 呢班 「零元購」團伙趁咁好機會，就梗係順應天意，周圍搶掠啦，攪到有啲城鎮要實施宵禁。我零零發真係覺得好荒謬囉！ 而家至少已經有20多人被捕，聽聞有啲疑犯，更加承認特登燒垃圾雜物，制造火場，方便搶掠咁話！不過佢哋俾人拉做咗監犯之後，轉頭又可以被徵召出嚟幫手救火賺外快，幾「趣」喎！
個孫出世喎
嗰個前美國拜總統仲攪野，唔知佢真痴定假傻，話說加州州長係火災初期，曾經打電話俾佢5次，都未能接通，之後佢1月8日係洛杉磯消防站聽完簡報後，以為會有咩救災大計出台，點知佢向記者宣布佢孫女生咗個B，自己做咗老太爺，重慌死唔夠衰，話「以後多一個原因記住今天」，之後佢太座仲將抱孫既「溫馨」圖片上載社交媒體，佢真係成功演活咗「你有你閉翳，我有我快慰」！成功吸睛，攞唔到奧斯卡提名，都上梗「笑笑小電影」或者「全美一叮(走) 」囉！
政黨互片
本來係一個咁嚴重天災嘅時候，全國應該上下一心去救援，但係呢場山火成為咗美國共和黨同民主黨「互片」嘅平台。當時共和黨候任總統「侵侵」將今次救火不濟，歸究於總統拜登，冇將聯邦資金用係救災行動咁話。而「侵侵」大仔更加係社交媒體炮轟民主黨嘅「多元、公平和包容」政策，話佢地(為咗環保)反對北水南調，以致冇水救火，又鼓吹同性戀同變性人嘅人權，將削減消防嘅千多萬美元去補貼中小企去請變性人，又用冇消防專業嘅女同性戀者做洛杉磯消防局局長等等。總之佢唔理真正假，噏得出就噏！ 而民主黨背景嘅加州州長，就批評「侵侵」將單山火同救援一事政治化！更有陰謀論話「拜登政府」特登留個爛攤子比「侵侵」㖭。我零零發覺得美國嘅政黨政治已經去到一個瘋狂地步，面對天災，仲你有你片，我有我hea，呢班人為咗自己嘅利益同選票，真係乜都做得出！
睇返啲新聞紙， 1月7號除咗加州山火，原來西藏日喀則市定日縣都發生6.8級大地震，不過當政府一收到消息，就即刻派無人機去勘察震源，西藏自治區嘅第一話事人亦都即刻去到指揮部，佢唔係喺電視機前講兩句做show就交差算了，佢係親自調動部署、監督安排。兩小時就有4500人趕赴救援，唔使6個鐘頭就恢復供電，仲喺好短時間已經準備咗成15萬箱緊急食品，同埋七萬幾件嘅禦寒物資比當地嘅嘅災民。唔夠10日已經搭建咗5000幾套板房，俾災民有安全温暖嘅臨時住所過冬。
講遠啲，重慶喺2022年亦都發生嚴重嘅山火，但政府以生命至上、保障財產安全、
善用科技去救援嘅對策，加上內地人民團結齊心，組成電單車隊去救人、運送物資糧食去災區等等，成場火 8日就救熄咗，仲喺短時間就妥善安置咗災民㖭！
我零零發覺得加州呢場山火巳經講唔清係「天災」，定係「人禍」！我唔係想落井下石，但從呢件事睇到一個所謂科技同民主大國，冇好好利用科技去救災，冇睇到國民自發幫忙，政黨只顧互相指責；實在係有幾謊誕、有幾匪夷所思呢！
我零零發知道人比人，比死人，尤其係喺呢啲天災嘅時候，更加唔應該比較，但係當你睇到兩個地方，面對災難嘅救援態度同對策，點會唔感慨呢？每次內地有天災，喺電視見到政府同民間救援隊第一時間到達災場救人，大家雖然唔係現場，但心中都多少有底，覺得災民有救！
人人應該平等，所以必須以「人民優先」為大前題。但願大家都珍惜得來不易嘅平安幸福啊！
鍾情局．零零發
