最近睇衙門消息，發現原來生果報同當年黑暴、47個顛人案有密切嘅關係。 咁諗住呢張生果報摺埋咗，大家可以有啲安樂日子過，但我零零發最近發現呢班生果報嘅人，已經喺唔同嘅媒體繼續佢哋嘅「孽」績。所以大家尤其係有仔有女嘅老友，千祈唔好掉以輕心，否則，就會好似當年咁，中咗生果毒2.0。
以下係我零零發對呢啲「新」媒體嘅「明星班底」，以及報導手法嘅資料搜集同觀察，不喜勿插，同埋唔好自己對號入座呀！
「法庭路」
「法庭路」嘅創辦人陳X婷同陳信X兩個都係前「臘腸新聞」記者，當年生果報摺埋個陣，「臘腸新聞」就接收咗佢好多員工，所以嚟嚟去去都係同一班人！
我零零發發現「法庭路」成日都有生果佬單案嘅獨家料，首先喺2023年年頭，生果佬嘅本地律師團隊發聲明澄清，話而家成日喺外國嗶哩巴啦嘅所謂黎智英國際律師團隊，唔係代表生果佬。當時全香港嘅傳媒都攞唔到呢個資料，只得「法庭路」有！另外，嗰個外國假律師團隊又周圍講懲教署拒絕生果佬領聖體，話佢有糖尿病又冇適切嘅治療，又冇得曬太陽，影響佢身體健康……咁啱得咁蹺，生果佬嘅本地律師團隊喺9月27號又出咗個聲明，話無咁嘅事。嗰日「法庭路」喺其他傳媒都冇呢個資料嘅時候，就搶先出咗呢單料！
點解好似所有第一手資料都係喺呢個「法庭路」出現？似乎只有「法庭路」有渠道可以直接攞到生果佬嘅獨家消息，究竟係佢哋叻叻豬，抑或有其他原因？
雖然呢個「法庭路」係主打報道法庭消息，好似好中立，但佢報導嘅手法其實㗳落有味，好似最近單「屠龍案」，14個被告有7個認罪，1個被告審訊之後被定罪。呢班罪犯係犯咗一啲好嚴重嘅暴力行為，罪有應得！但係「法庭路」竟然用「無人經審訊定罪」嚟形容呢7個認罪嘅被告。我零零發喺度同大家分享一下法庭知識，其實當一個罪犯被告上法庭開始，佢已經係進入咗司法程序，每次上庭都有法官同控辯雙方律師，評估案情同埋證據去保障佢，所以唔係你話認罪，就俾你認罪咁兒戲㗎！好明顯「法庭路」係蓄意咁樣寫個標題去斷章取義，混淆視聽！另外佢寫「冇人受審後以反恐條例定罪」，我唔可以話佢錯，因為審訊之後定罪嗰個被告，係以「刑事罪行條例」被定罪嘅。大家點睇佢報道新聞嘅手法同角度? 係咪別有用心去誤導一般嘅讀者？
「閘智社」
另一個都非常關注生果佬嘅黃媒就係「閘智社」。佢哋兩個創辦人，分別係做過生果報同「臘腸新聞」嘅採訪主任雷X樂；另一個就係前港台編導蔡X玲，佢2022年免費去美角「哈罰」進修遊埠之後，無幾耐就搞咗「閘智社」，唔知呢間嘢有乜人支持呢？
2023年10月，「閘智社」係 「7.21」暴動案審訊前，就發佈咗涉嫌同審訊有關嘅閉路電視片段，法官都好關注會唔會影響案件嘅審訊，叫咗警方睇下有冇人違法！
而佢哋係今年6月又訪問咗朱X明，呢個人除咗當年搞非法佔中之外，又聽聞曾經幫啲暴徒逃離香港，佢係2020年就走咗佬，而家喺外地風流快活，但佢就叫啲香港年青人「唔好放棄」，呢啲咪完全係「叫人衝，自己鬆」嘅作風囉！
呢間「閘智社」嘅報道手法同風格，都好值得商榷囉！
「停看」
據黑網資料，「停看」相信係由前前生果報高層和高級記者創辦，部份人曾搞「眾News」。
「停看」特登揀「眾News」停刊一周年嘅時候成立，我估計係諗住用佢哋嘅舊名氣嚟吸睛，並且以「法庭新聞」作幌子，利用黃營人士對所謂「抗爭」、「同路人」、「真相」等「不割蓆」心態，透過訂閱係黃圈繼續眾籌吸粉……
「瘋顛乾十九角度」
係網上有個「瘋顛乾十九角度」專欄寫手「瘋顛乾」，以前係生果報同「大幾元」嘅御用筆手。根據生果佬案嘅從犯證人講，「瘋顛乾」曾經提議生果佬搞生果報英文電子版，之後又喺專欄話生果報要搞八卦式公義同走國際文宣線，總之就娛樂新聞政治化、或者政治醜聞娛樂化……生果佬個人咁自大都聽佢話，可見佢哋嘅關係真係唔簡單！另外作為「大幾元」御用寫手，「瘋顛乾」係咩立場，唔使零零發講出口喇卦！
係今年2月，「瘋顛乾」就寫咗篇《在囚人士可以反對嗎？》文章，批評《維護國家安全條例》諮詢文件中，話國安犯坐監要得到懲教署署長相信，早啲放佢監唔會影響國家安全，先可以減刑，係剝削囚犯權利喎！我零零發想講，先唔好話犯咩罪坐監，提早放監本身都唔係必然㗎啦！囚犯係可以因為行為良好而減刑，但唔係老馮要減刑㗎！
最近喺9月，佢又配合美西方刊登咗一篇《共看明月應垂淚》文章，話生果佬坐監冇得領聖體、冇曬人權，又講到好似未審先判，坐咗3年9個月冤獄。喂喂喂，生果佬係犯咗詐騙罪被法庭判監5年9個月，佢仲未坐完嗰單案刑期喎！
「瘋顛乾」身為「御筆」，無理由寫文之前唔去查吓資料；佢咁都寫得出，心照不宣啦！
新聞傳媒被形容為係行政、立法、司法三權之外，社會嘅「第四權」。傳媒嘅「天職」應該係以真實、客觀、公正嘅原則報道，盡力確保報道正確無誤，但係呢啲所謂嘅「天職」近年已經被黃媒騎劫，為求達到政治目的，以惡意剪裁、顛倒黑白、無中生有、斷章取義嘅報道手法，去挑動公眾情緒，製造社會不滿和對立。雖然好多黃媒已經樹倒猢猻散而相繼停刊，但好似同生果報有直接或間接關係嘅「法庭路」、「閘智社」、「停看」同埋「瘋顛乾十九角度」等等，仍然死心不息，繼續佢哋嘅「孽」績，或者諗住用黃媒嘅身份，繼續喺黃色經濟圈搵真銀！
鍾情局．零零發
鍾情局
** 博客文章文責自負,不代表本公司立場 **
最近俾「生果佬」單案提醒咗我零零發，「民主阿婆陳四萬」，已經冇公開露面好耐，唔知佢最近點呢？ 既然生果佬咁回味同「阿婆」喺黑暴時候並肩作戰嘅日子，咁我一於用零零發視角，去翻吓「阿婆」嘅舊賬啦！
「阿婆」已經80幾歲，佢係內地出生，8歲跟家人定居香港，由細到大都係西方文化嘅氛圍下長大、接受英式教育，喺大學主修英文同英國文學。大學畢業後，就加入政府做政務主任，公職生涯做過好多部門，包括社會福利署、經濟司、布政司，退休前官拜特區政府政務司司長。「阿婆」嘅仕途都算順風順水，加上有些少家底，咁當年一般人就以為佢好勁。
「阿婆」最出位嘅公職莫過於1986年嘅「郭亞女」事件，當時佢係社會福利署署長，有一個患有精神病嘅阿媽，將自己個女「郭亞女」囚禁係住所，「阿婆」決定破門入屋強行解救「郭亞女」。平心而論，呢件事嘅處理方法好壞參半，但係當時輿論一窩蜂質疑當刻破門入屋有冇必要，同埋話「阿婆」霸道、越權同侵犯私隱，指責佢只係想邀功出位！不過當年係殖民地統治，港督一句話撐佢，咁所有人就靜曬啦。 呢件事之後，「阿婆」就去咗英角國防研究院深造同改造，隨即升埋級做經濟司。佢放洋留學之後，樣樣都「英角優先」，先係1992年放棄公開招標貨櫃碼頭經營權，直接將個權交咗比英資公司；而喺回歸前，佢又配合末代港督嘅政改方案，改變當時立法局同區議會選舉制度，為亂港種下禍根。
講開又講，其實係1997年回歸前，英角的確係想捧當時巳經係第二把交椅嘅「阿婆」做第一屆特首。為咗令佢得到香港人同埋西方人接受，當時嘅外藉新聞處副處長仲做咗佢形象顧問，教佢着旗袍嚟突顯東方女性嘅特質，令到外國人更容易接受。另外就係塑造佢成為一個親民、笑容可掬嘅官員，所以要「阿婆」返屋企對住個鏡，練習「四萬式」嘅笑容！佢過去係唔識笑嘅，黑口黑面，唔信你睇返佢係「郭阿女事件」嘅新聞片，當時「殺死人」嘅樣，同後期着旗袍個四萬樣，簡直係兩個feel 啦。所以大家見到後期嘅「阿婆」，只不過係俾英角人set出嚟嘅「人設」而矣，唔係真㗎！ 不過呢個英方嘅「人設」特首候選人，最後因為末代港督單方面攪政改，激嬲咗中央政府，以致英角嘅如意算盤打唔響啫！
「阿婆」俾人捧為香港鐵娘子，令佢嘅野心更澎湃，唸住十拿九穩做硬特首，點知甩腳，佢只係做到千年老二就梗係唔開心喇，受過英角恩惠嘅佢，於是就索性擺名車馬做外力「代理人」。係回歸初期，佢對興建跨境大橋同24小時通關問題上模棱兩可，拖慢晒個發展，新機場啟用時又攪到大混亂！喺2000年，有間拍賣行打算拍賣喺圓明園被偷走嘅國寶，當時中央政府強烈反對，但「阿婆」一意孤行，話係正常商業活動，冇理由阻止咁話！
由於「阿婆」係一個權力野心非常大嘅人，令人覺得當時特區政府出現咗兩個「話事人」，影響到特首董伯伯執政。於是2000年尾佢被邀請返北京「述職」，「阿婆」以為成功謀朝篡位，點之見完港澳辦老闆之後頭耷耷、眼紅紅，冇晒Mood，仲要喺後門走，等班特登係香港飛去採訪嘅記者白等一場！ 佢返咗酒店敷咗個mask之後，到夜晚先至勉為其難、強顏歡笑同啲記者飲杯茶、食個包！
喺大約半年後，「阿婆」被逼宣佈提早退休。之後佢就利用自己係政界嘅影響力，更加肆無忌憚咁同中央對著幹。 2002至2005年期間，「阿婆」多次係外媒發表佢對香港政改同「一國兩制」嘅謬論。係2007年又經補選做咗立法會議員，係議事廳帶領班反對派就住各種民生議題阿吱阿咗，又去參加「撐普選」遊行，被外界話佢「忽然民主」！不過呢個「阿婆」係遊行途中「快閃」去咗恤髮，成為政圈一大笑話，係人都睇得出佢只係想做show，好肉酸囉！
「阿婆」做咗8個幾月立法會議員就話自己年紀大要引退，但實際係想更無拘無束，孖住「生果佬」咁去深度參與反中亂港嘅惡行！當時有網民篤爆，話「阿婆」分別係2013年6月至2014年2月，分3次收咗「生果佬」350萬去創立「香港2020」政治組織。表面上就係推動香港民主發展(落實2017年普選行政長官同埋2020年立法會普選咁話)，實際上係俾「阿婆」做經費周遊列國去唱衰香港。2014年4月，佢就高調地同「白鴿黨」元老白頭李出訪美角，得到當時副總統拜登同副國務卿伯恩斯接見， 3個月之後，又同白頭李又再去咗英角一轉，冇耐「佔中」就發生啦！
經過嗰幾年，明眼人都睇到「阿婆」嘅政治取態。咁話說2016年北面有一個領導人，釋出善意嚟香港見「阿婆」同班犯民，這邊廂班犯民友惡形惡相見領導人，最後俾領導人超時特(別)訓(話) 成粒鐘，個個面懵懵！ 但那邊廂到第二朝，「阿婆」就四萬咁口著靚靚去同領導人大合照。嘩，呢班人真係左右逢源，而「阿婆」更盡顯雙面皇本色！
到咗2019年3月，政府提出修訂《逃犯條例》，「阿婆」又急急腳咁同白頭李等人飛美角與時任副總統彭斯同民主黨領袖佩洛西高調見面。兩個月之後，「阿婆」又帶隊去德角同官員與政客見面，游說大家支持香港抗爭去爭取民主。冇幾耐，黑暴咁啱又開始啦！
黑暴嘅時候，「阿婆」又公開鼓勵公務員遊行示威，(企圖癱瘓特區政府)，又四出幫「生果佬」泵水嘅「重光團隊」成員穿針引線去見英角駐港總領事，又同白頭李頻頻去見美角駐港總領事……一個7、80歲嘅阿婆咁忙為乜呢？總之一句，咁多巧合就唔會係巧合啦！ 所以「阿婆」係「佔中」同「黑暴」嘅角色，都好值得重新評估啊！
唔好睇「阿婆」個「人設」好似係社會上嘅精英，其實佢同屋企人都有唔少醜聞。有線人報料，係1993年樓市起飛嘅時侯，時任布政司嘅阿婆，被揭發以780萬買入港島半山豪宅，低於市價二百萬之餘，又利用財技攞到十成按揭(當時500萬元以上嘅豪宅，按揭貸款係唔可以多過樓價七成)，佢又用公司名義俾少啲印花稅。雖然有高人話「阿婆」嚴格上冇違規冇呃政府錢，但老實講，佢就係用盡所有方法去「賺到盡」！ 當時好多人嘈，話要調查佢，但係件事最後唔知點解不了了之？！身為一個政府高官，乜唔係應該要比白紙更白、比清水更清咩！
至於「阿婆」嘅阿哥「方律師」，係1999年嘅時候因為租客冇交租成六年，於是搵人收番個單位而揭發咗一宗命案。江湖傳聞呢個租客其實係「方律師」包養嘅模特兒情婦，佢被發現嘅時候，剩係得返副白骨，估計死咗成四年，當時都好轟動㗎！之後嘅死因聆訊裁定死者「死於不幸或意外」，雖然件事疑點重重，但最後又係不了了之， 唔知同當時「阿婆」係政務司司長有冇關係呢？！
「阿婆」係2020年「國安法」生效之前，就拿拿臨扔低晒所有戰友跳船，退出政壇。不過作為一個「過氣」退休高官，一邊出緊政府長糧，另一邊又勾三搭四去搞亂香港，冇理由一龜縮，就可以當冇事發生過，有人建議起碼都要褫奪佢個大紫荊勳章卦！ 以為避過一劫嘅「阿婆」，而家一定有得震冇得份，因為最近佢老友「生果佬」成日喺衙門提起佢哋嘅當年情，同埋「阿婆」積極爭取「香港民主」嘅事蹟，「阿婆」有冇手尾跟，都真係要剝花生等睇戲喇！
鍾情局．零零發
