香港呢個咁細嘅地方，山多平地少，所以開埠以嚟都係靠開山斬樹同填海嘅方法，去增加土地供應。
英角人喺霸咗香港之後嘅第2年，即係1842 年就開始係香港填海。比較番當年同而家嘅版圖，就會發現係香港島，由上環到維多利亞公園、東區走廊，九島半島嘅尖沙咀、土瓜灣、紅磡、舊啟德機場、美孚，以至新界嘅荃灣同大嶼山赤鱲角機場嘅土地，其實都係由填海得番嚟㗎！其實大家都要正面啲去睇填海工程，只要適當地運用，配合民生同經濟需要，係可以雙贏嘅！
但係唔知點解回歸之後，填海就被妖魔化⋯⋯ 其實自從1842嗰年開始，香港嘅海岸線就已經唔係「千載不變」喇，英角人在的時候，海岸線天天變; 唔知點解英角人敗走之後，海岸線就突然變得不知幾咁重要，要永恒不變。綜合所有江湖傳聞，成件事有好多個巧合，但以我零零發嘅經驗睇，咁多個巧合就應該唔係巧合，不如大家一齊硏究下！
話說有位好孝順嘅隨大狀，知道阿媽住喺海邊嘅靚樓，有日由屋企望出窗口，見到西九龍美麗嘅港灣，竟然有填海工程，搞到好唔開心。孝順大狀為咗保護阿媽好喜歡嘅美麗海岸線，佢搵咗好多猛人，喺1995年成立咗「保護海岸協會」，利用呢個平台，去反對政府嘅填海計劃。
而「保護海岸協會」入面有個好勁嘅環保人士叫六公主，佢係1996年11月以私人議員條例嘅形式，提出咗一條《保護海港條例》，係短短唔使大半年嘅時間就搞掂成條草案，仲要係回歸前一日即1997年6月30日通過。咁順、咁快、咁橋嘅？在英角人自己掌管香港的年代，點會俾你提乜嘢私人議員條例草案，唔郁你就奇。到英角人自己要走啦，話唔定仲鼓勵六公主上馬，反而搞死特區，咪證明英角人英明神武，只有佢哋管得掂香港囉。
呢位六公主大有來頭，除咗喺「保護海岸協會」嘅領軍人物之外，佢仲創立咗一個智庫叫「C會」，聽聞呢間智庫早期就已經有「美角角祭民主研究院」同「美角各家民主基金會」嘅財政資助，大家都知呢兩個美角組織，不嬲都好積極幫世界各地推行所謂「民主運動」，咁大家明喇！
至於現任「保護海岸協會」主席六公子，佢背景都唔少嘢，佢除咗喺六公主嘅遠房親戚(唔係親細佬)之外，江湖傳聞話六公子嘅家族同隨大狀的哎吔阿媽都有關係。
至於「保護海岸協會」個顧問斑馬紋，多年嚟靠反政府都幫佢撈到唔少政治油水。而最吊詭係呢個隨大狀同斑馬紋都係用個會的名義，加入成為官府「海岸事務委員會」嘅成員，佢哋好多時都利用呢個公職嚟反對政府對海岸線嘅發展！我零零發有時覺得政府太大方，有少少買錘仔嚟揼自己隻腳嘅味道！
講番回歸前通過嘅《保護海港條例》，只得4條條文，主要係話唔可以係維港範圍內進行填海工程，如果要填海，就必須證明個工程有「凌駕性公眾需要」，同埋要有「具有力和令人信服的資料」，門檻相當高。
過去有好多海港改善工程都難免觸及《條例》下填海嘅定義，受制於「不可填海推定」同埋「凌駕性公眾需要」測試，所以就算呢啲工程有必要性或者受市民歡迎，但係咪屬於「凌駕性公眾需要」就好難講，而且要動用大量資源去符合高門檻嘅「凌駕性公眾需要」測試，亦都唔符合比例。所以好多工程都被逼擺埋一邊，例如：堅尼地城新海旁增設嘅行人板道、重新發展嘅啟德前跑道舊碼頭、九龍城汽車渡輪碼頭等等。
所以上年政府提出修例，建議清楚規定係咩情況下可以推翻「不可填海推定」，同埋引入新法定程序，俾公眾就填海係咪符合「凌駕性公眾需要」測試提出意見，然後等行政長官會同行政會議決定嗰個項目係咪可以繼續。咁樣做，大規模填海工程嘅規管就會更嚴謹同規範化，至於啲小型工程又引入咗較簡單嘅機制，等啲司長級官員可以去審批。嗰啲有利民生小修小補工程，好似上岸堤階、碼頭、行人板道咁，就可以嗱嗱聲開工喇！
簡單啲講，政府修例既保持維港範圍不填海造地嘅精神，又可以更好咁履行責任，有咩唔好呢？
不過嗰個「保護海岸協會」就話，雖然佢哋唔反對小型海港改善工程嘅修例建議，但係唔認同由行政長官同埋行政會議去評估大型填海工程係咪符合「凌駕性公眾需要」；佢哋話過往條例規定每次大型填海需要交由法庭處理，但而家修訂後嘅程序會跳過法庭，質疑政府取締咗法庭嘅權力喎！
其實佢哋嘅講法都幾無厘頭，因為現行條例都無話要由法庭審批大型填海工程。而且無論依家定將來，評估大型填海係咪有「凌駕性公眾需要」，一向都係政府嘅工作，如果市民唔滿意政府嘅決定，可以去提出司法覆核，由法庭決定係咪批准繼續進行個工程。而且政府都講咗好多次，修例唔係想喺維港進行大規模填海造地咯！
我零零發發覺，有啲人特別鍾意利用一啲修改法例嘅機會，用誇張失實嘅宣傳，將啲法例妖魔化，扭曲法律原意，去分化市民同政府，而且更加會伺機制造社會矛盾、混亂…無他嘅，因為一般市民未必有時間去解讀呢啲繁複嘅法律條文，又或者講得難聽啲，係烚一般升斗市民唔識法律，所以咪好容易俾人呃咗囉！大家都領教過 2019年「反修例」事件喇，係咪？！
所以如果大家覺得香港是你家，唔該你對每件事都要睇真啲、諗清諗楚嗰班人背後嘅目的呀！如果你睇唔明、諗唔通，咁唔該你哋見疑就即報（零零發），等我幫大家查清查楚，講清講楚！
鍾情局．零零發
鍾情局
** 博客文章文責自負,不代表本公司立場 **
一月頭開始，新聞紙成日講加州發生歷史以來最嚴重嘅山火，嗰場火由1月7日開始，好似燒到而家都未完全救熄。洛杉磯多個地區有火頭，據聞有多過25人死亡，數十萬人被逼疏散，多過1萬座建築物被焚毀，初部估計超過1500億美元損失，聽落都好恐佈。我零零發睇咗好多報道，發現呢次山火有好多不為人知嘅事，估唔到美國堂堂一個科技同經濟大國，會攪成咁樣，睇落都幾可悲同可笑架！
冇水救火
山火先係南加州海岸附近嘅豪宅區爆發，以平均每分鐘摧毀3個標準足球場既速度蔓延，但消防人員到現場時，所有消防栓係冇水，唔係冇幾分鐘，係足足冇水幾個鐘啊！ 風乘火勢，有咩辦法唔燒到渣都冇剩吖！事後揭發原來最大同主要供水嘅水庫，當時因為定期維修抽到乾曬塘，一滴水都冇，所以冇水泵去3個大型水箱同各地的消防栓，更可笑係洛杉磯水電局話當地嘅供水系統，就算正常運作，都只能應付一、兩楝房屋嘅火災，遇上稍微大一啲嘅山火，供水系統就會崩潰；而佢哋亦從來冇為大型山火更新市政供水系統。唔係掛！加州山火基本上年年都發生，點解會係風高物燥嘅季節攪維修，有冇腦㗎？咁樣做嘢都得，簡直就妄顧居民嘅安危，真係荒謬到極點！
冇人冇物資救火
供水系統求求其都未算呀，舊年洛杉磯市長更加削減消防部門開支超過1750萬美元，大大削弱咗人手同培訓，消防局局長更坦言從來都冇為大規模災難做過準備。吓，咁都講得出！ 更有甚者，有報道話洛杉磯消防局將大量裝備，好似水管、噴咀、頭盔同個人防護裝備，由國民警衛軍運送咗去援助烏克蘭。唉！真係自己都未顧得掂，就走去扮大佬送禮，真荒謬！而其他州份嘅支援又嘆慢板，政府唯有喺加州懲教所派出近1000個囚犯去救火，佢哋重有補水津貼㖭！我零零發睇到想唔O嘴都唔得！！！
資訊混亂，逃亡塞車
喺山火發生頭幾日，資訊非常混亂，洛杉磯全市近1000萬居民嘅手機連續兩日都收到緊急信息，叫所有民眾準備疏散，引起全民恐慌，事後証實係警報系統出錯。不過受火災影響嘅居民，就算想開車走都有困難㗎，因為到處屋多路窄，周圍塞車，逼住棄車徒步走，所以畫面睇到好多泊係路邊嘅名貴汽車被燒到通頂。政府廢啫，洛杉磯嘅居民都唔係傻架，佢哋早喺10年前，已經同市議會傾可能發生山火出現嘅堵塞情況，但得到嘅回應係: 冇必要制定詳細應對計劃，具體疏散路線只有係火災發生時才能決定咁話！呢招冇Plan B嘅太極拳，真係發揮得淋漓盡致！
有錢就水源充足
沒有最荒謬，只有更荒謬！聽聞加州有個民主黨背景富豪家族，擁有加州13萬英畝土地嘅農場，通過政治捐款同游說，佢一家就壟斷咗洛杉磯總供水量既92%，每年將1630億加侖既水儲存係地下，咁就唔怕乾旱天氣，確保佢的農場同佢屋企日日都水源充足，但難為有啲社區有時幾乎冇公共供水，要靠運水車接濟。有高人話，加州本身就係民主黨票倉，而州長本身又係黨友，亦曾接受過呢個家族捐獻，咁你話有冇關係呢？呢啲係咪就係佢哋所講嘅「民主社會」呢？
買唔到保險
年年山火，加上個政府咁啡啡流，所以啲保險公司就梗係稔縮數啦，原來係2023年開始，加州12間保險公司之中，有7間已經退場唔開新保單，攪到好多居民間屋一係冇保險，一係就被逼買州政府好貴、同保障好少嘅保險計劃。雖然話今次幾大災區，主要都係有錢人或明星居住，但係睇見自己家園燒成咁，又未必有保險賠，同埋有咩首尾跟都未知，所以隨時都會破產，都咪話唔淒涼呀！
趁火打劫
唔好以為「美國優先」，啲人真係上等啲！ 原來真係有人會趁火打劫！ 一場火，搞到警察疲於奔命，社會秩序大亂，所以唔去「零元購」就笨啦！ 呢班 「零元購」團伙趁咁好機會，就梗係順應天意，周圍搶掠啦，攪到有啲城鎮要實施宵禁。我零零發真係覺得好荒謬囉！ 而家至少已經有20多人被捕，聽聞有啲疑犯，更加承認特登燒垃圾雜物，制造火場，方便搶掠咁話！不過佢哋俾人拉做咗監犯之後，轉頭又可以被徵召出嚟幫手救火賺外快，幾「趣」喎！
個孫出世喎
嗰個前美國拜總統仲攪野，唔知佢真痴定假傻，話說加州州長係火災初期，曾經打電話俾佢5次，都未能接通，之後佢1月8日係洛杉磯消防站聽完簡報後，以為會有咩救災大計出台，點知佢向記者宣布佢孫女生咗個B，自己做咗老太爺，重慌死唔夠衰，話「以後多一個原因記住今天」，之後佢太座仲將抱孫既「溫馨」圖片上載社交媒體，佢真係成功演活咗「你有你閉翳，我有我快慰」！成功吸睛，攞唔到奧斯卡提名，都上梗「笑笑小電影」或者「全美一叮(走) 」囉！
政黨互片
本來係一個咁嚴重天災嘅時候，全國應該上下一心去救援，但係呢場山火成為咗美國共和黨同民主黨「互片」嘅平台。當時共和黨候任總統「侵侵」將今次救火不濟，歸究於總統拜登，冇將聯邦資金用係救災行動咁話。而「侵侵」大仔更加係社交媒體炮轟民主黨嘅「多元、公平和包容」政策，話佢地(為咗環保)反對北水南調，以致冇水救火，又鼓吹同性戀同變性人嘅人權，將削減消防嘅千多萬美元去補貼中小企去請變性人，又用冇消防專業嘅女同性戀者做洛杉磯消防局局長等等。總之佢唔理真正假，噏得出就噏！ 而民主黨背景嘅加州州長，就批評「侵侵」將單山火同救援一事政治化！更有陰謀論話「拜登政府」特登留個爛攤子比「侵侵」㖭。我零零發覺得美國嘅政黨政治已經去到一個瘋狂地步，面對天災，仲你有你片，我有我hea，呢班人為咗自己嘅利益同選票，真係乜都做得出！
睇返啲新聞紙， 1月7號除咗加州山火，原來西藏日喀則市定日縣都發生6.8級大地震，不過當政府一收到消息，就即刻派無人機去勘察震源，西藏自治區嘅第一話事人亦都即刻去到指揮部，佢唔係喺電視機前講兩句做show就交差算了，佢係親自調動部署、監督安排。兩小時就有4500人趕赴救援，唔使6個鐘頭就恢復供電，仲喺好短時間已經準備咗成15萬箱緊急食品，同埋七萬幾件嘅禦寒物資比當地嘅嘅災民。唔夠10日已經搭建咗5000幾套板房，俾災民有安全温暖嘅臨時住所過冬。
講遠啲，重慶喺2022年亦都發生嚴重嘅山火，但政府以生命至上、保障財產安全、
善用科技去救援嘅對策，加上內地人民團結齊心，組成電單車隊去救人、運送物資糧食去災區等等，成場火 8日就救熄咗，仲喺短時間就妥善安置咗災民㖭！
我零零發覺得加州呢場山火巳經講唔清係「天災」，定係「人禍」！我唔係想落井下石，但從呢件事睇到一個所謂科技同民主大國，冇好好利用科技去救災，冇睇到國民自發幫忙，政黨只顧互相指責；實在係有幾謊誕、有幾匪夷所思呢！
我零零發知道人比人，比死人，尤其係喺呢啲天災嘅時候，更加唔應該比較，但係當你睇到兩個地方，面對災難嘅救援態度同對策，點會唔感慨呢？每次內地有天災，喺電視見到政府同民間救援隊第一時間到達災場救人，大家雖然唔係現場，但心中都多少有底，覺得災民有救！
人人應該平等，所以必須以「人民優先」為大前題。但願大家都珍惜得來不易嘅平安幸福啊！
鍾情局．零零發
