大台星期日的啟播《快樂聯盟》簡直令人大失所望，好好地一個真人騷變成萬人圍插的港鐵廣告騷，大台根本攞自己收視「較飛」！
韓風《Running Man》令亞洲掀起一鼓「無限挑戰」真人騷熱潮，大台照版煮碗，揾本港藝人挑機。睇《快樂聯盟》的宣傳的確被吸引，畢竟本地藝人的「另一面」有幾番吸引力。不過估唔到第一集竟然淪為港鐵的「救亡爛鬼PR騷」，嘔心到反肚。
上星期睇直播，越睇就越唔對路，不斷滲入港鐵點好點好，在遊戲挑戰之中，藝員嘉賓不斷大呼叫好，好記得阿Bob的一句：「進入鐵路入面好安全，由一個目的地去到另一個目的地，中間嘅過程，有好多同事、工作人員，喺你夜晚瞓著哂覺時候，佢哋通宵達旦確保鐵路安全，原來呢張飛真係唔簡單。」
myTV截圖
節目首播就幫港鐵大賣廣告，「『快樂聯盟』深入港鐵 發掘鮮為人知一面嗚謝港鐵」，最後要嗚謝港鐵。唔通你俾班藝人喺地鐵玩兩玩，就會覺得你張飛值回票價？
由藝人去講港鐵服務辛勞、值得欣賞，由一班出入都以保姆車袋勞的人去讚港鐵的好，何來說服力？又同蘇局長叫你等多班車有何分別？港鐵夠膽就隨街執一個日日迫地鐵迫到嘔血的小市民問一句好了。都仍然叫好？那就只有好了，不過CY不會說句多謝。政府是大股東，有小市民的份兒，難道要感謝自己嗎？
港鐵今次「廣告雜誌」根本就自曝其短，由開始就注定失敗，嘉賓去找由香港站去青衣車費，不懂，可能聽市民講車費太貴聽多了，所以藝人第一答案就爆了句「100元」，貽笑大方。走去青衣的指揮中心、模擬駕駛艙，要推廣港鐵幾安全、幾有系統、訓練幾嚴謹。不是嘛？嚴謹到車長在駕駛中途剪腳甲？
走入路軌做檢測，強調電纜每晚有人詳細檢查，那將軍澳去年底爆電纜一役又如何解釋？咪就係馬虎唔嚴謹囉！
想睇睇藝人玩節目，變成要聽港鐵講垃圾介紹？甚麼狗屎？一路睇住反胃的PR騷，再回想港鐵根據可加可減機利，有加無減年年加價、高鐵延工延期、沙中綫發現古跡就率先拆毀，面對種種醜聞港鐵面不改容、理直氣壯的嘴臉，政府又「疑中留情」但港鐵高層仍然有加薪分花紅，市民心中恕氣同憤怒又點會被撲熄？
港鐵還有做PR的需要嗎？如果真係「心繫生活每一程」，咁就將貨就價，最奏效的PR只有一個，減價！
CY
** 博客文章文責自負,不代表本公司立場 **
