張頴康與老婆麥雅緻和兩歲囡囡「小豆」一家三口相當幸福，張頴康努力搲銀，麥雅緻則管理家頭細務兼為財政大臣。日前兩公婆一齊出活動時，張頴康自爆成份人工上繳老婆，每日「配給」$100要儲兩日先買到酒飲，亦不能請同事食飯。報道一出網民都指麥雅緻太嚴苛，張頴康就在社交網站大平反，感謝老婆管理哂成頭家，更Sweet爆指「如果冇我老婆一直以嚟管理我嘅生活，依家一定仙都唔仙吓！」
一家三口好溫馨。（張穎康IG圖片）
張頴康在Instagram撰長文道：「最近喺一次活動中，我透露咗我每日有$100蚊零用錢！報導出咗之後，有好多人覺得我老婆好似好嚴好刻薄！其實我想同大家講，呢$100蚊只係俾我用嚟買我自己嘅嘢，例如紅酒，零食，所以係絕對夠用嘅！但係大家唔知道，我老婆要用我哋嘅人工，去管理哂成頭家嘅所有駛費，例如供樓、買車、入油、屋企所有雜項嗰啲乜費物費、小豆嘅幼稚園學費、一日三餐等等等等...而我係完全唔需要理，全部由我老婆一個人處理哂！希望大家知道，一個女人要照顧一頭家，其實係好辛苦好偉大！就算我搵幾多錢俾家用，都彌補唔到佢為咗個家嘅付出！我聽日就要到內地拍戲一個多月，冇時間陪住我老婆！希望大家喺街見到佢，唔好再叫佢加零用錢俾我喇！仲有，我好想講，如果冇我老婆一直以嚟管理我嘅生活，唔好話$100零用錢，我諗我而家一定仙都唔仙吓！」
張頴康感恩有老婆管理自己生活，否則仙都唔仙吓。（張穎康IG圖片）
不少網民看到很都大讚「好sweet！」，更有人讚張頴康是「絕種好男人」、而麥雅緻則是「好老婆、賢內助」！
