雲咸街王子?
最近車婉婉作客香港電台節目《守下留情》分享童年趣事,以及認識澳籍老公Jonathan的過程。她表示因為自小哥哥與弟弟長大,所以表面上似男仔頭,自細亦只可以玩自製豆袋和橡筋繩,但其是與普通小女孩一樣,相當渴望擁有一個Barbie公仔。
車婉婉於單親家庭長大,童年時與兩個年長七、八年的哥哥和細五年的弟弟、以及媽媽與婆婆一齊住在大角咀大同新邨。她表示自己受哥哥與細佬影響,以致性格男仔頭:「因為屋企冇女仔,同哥哥細佬玩,唔會學到啲嬌滴滴嘅嘢,媽媽又為咗生計成日出去,所以屋企唔係太多玩具,但女仔就算你幾咁爽朗,見到Barbie都會好想要!」
直至小六,車婉婉到美國讀夏令營,與當地鄰居小朋友玩才接觸到Barbie:「人生未見過咁多Barbie!我嗰陣時已經10、11歲,佢得6歲定7歲,用兩個籮嚟裝住啲Barbie,另一個仲籮裝住啲衫,仲有另一個籮裝住阿Ken!去佢屋企玩可以滿足我十幾年來對Barbie嗰種缺乏!」
到18歲時,她於第十一屆《新秀歌唱大賽》奪冠,她表示一直相當迷哥哥張國榮,曾將他的相片貼滿記事簿,入行後竟然有機會可與偶像拍電影《戀戰沖繩》,更受到哥哥關顧:「我好鍾意佢㗎,我之後都有話畀佢聽,佢好正㗎,例如我去拍嘅時候佢就會望住我話『婉婉,我今日又做咗30下sit up!』跟住我就同佢講『好靚仔呀哥哥,好掂,你唔使做喇已經好fit!』」
車婉婉笑指因為當年大家於沖繩拍戲朝夕相見,因而變得熟絡,當時哥哥錄好電影主題曲更替她第一個做聽眾:「佢係一個好nice嘅人,嗰時佢錄咗首主題曲《沒有愛》,因為當時我都係搵Alvin Leung做監製,所以佢就同我講『喂!Alvin同我做咗主題曲,你想唔想聽呀?我第一個畀你聽!』梗係想啦哥哥!我係超級fans嚟!跟住佢就拎部MD機出嚟,好開心,哈哈!」
此外,車婉婉表示因於單親家庭成長而對婚姻無信心,幸得媽媽鼓勵而勇於冒險:「我媽媽同我講,雖然佢嘅婚姻非常失敗,但唔好因為自己嘅背景冇父愛而去否定自己嘅人生,佢話一個女人點都要結婚生仔先會人生完整。單親家庭係有一定缺陷,我又唔想下一代係咁樣,所以當下都有猶豫,但總覺得阿媽唔會老點我!」
她現時與老公Jonathan育有囝囝BBQ,三口之家相當幸福,但她指開頭對老公無好感。當時她與友人去蘭桂坊消遣,當時有朋友指著她老公表示:「全條雲咸街最靚仔嗰個出咗嚟!」她看到後大吃一驚:「我見到佢個背脊,嘩!又光頭又着尖頭波鞋,我好唔鍾意人着尖頭鞋,都唔啱taste嘅,唔使擰過嚟都知唔掂啦!然後就冇理到。然後入到去飲嘢我個朋友又話『阿車,嗰個男仔上咗嚟呀!』我就同佢講『你咁鍾意佢,你就去請佢飲嘢啦!』」結果最後結識了對方,更對他慢慢開始有好感,最後拍拖三年直到2013年拉埋天窗。
婚後,車婉婉想到自年事已高,本想接受人工受孕,豈料檢查後原來已成功自然懷孕:「我驗咗兩支驗孕棒,然後行出廳同我老公講,『你同我即刻戒煙!』,我老公呆咗,即刻上網查吓呢個牌子檢孕棒有幾準!」雖然成功大肚,但懷孕時已42歲已為高齡產婦,而且子宮有腫瘤而不能開刀,最終於2016年痛足13個鐘,誕下8磅9安士重的囝囝BBQ。