25歲的無線小花蔣家旻(Angel),入行近9年雖然都係做啲阿妹、主角少女版等角色,不過早年都憑處境劇《愛‧回家》中的馬子妮一角入屋,而且身材有肉地,輕易成宅男女神!日前,唔使開工嘅Angel就與兩位圈外女友人齊齊去尖咀The One行街,在超市揀吓家品、零食,仲想買黃豆粉。坊間有傳黃豆粉加牛奶可豐胸,莫非擁C cup上圍的她想再升cup?!
小花蔣家旻入行多年,但憑住姣好身材擸仔戰績都唔錯,先後同羅仲謙、前港男羅天宇、朱敏瀚等傳出緋聞,近年Angel轉口味,玩完花O靚移情大叔,最新目標就係搭上大佢十年、現正在數碼電台做DJ的Martin(林路寶),兩人不時被影到十指緊扣兼攬啜行街。
早前剛去完哈爾濱拍攝旅遊特輯回港的蔣家旻,相約女友人行尖咀。三女在The One商場內的超市閒逛,淡妝Angel先獨自睇家品,見她揀儲物籃,睇吓各種size,最後都唔啱心水,就轉身看文儀用品,又揀零食,其間見她走入買麵粉的食材區左睇右睇,最後索性開口問店員有無黃豆粉?聽到無買後,有啲嘴扁扁,就埋單走人。黃豆粉可以即食,網傳又可以溝牛奶飲,達到豐胸瘦身效果,唔通Angel想有更激凸身材箍實男友?!