《毒舌大狀》導演吳煒倫表示:「所有演員獎都入晒,我好開心。」
第42屆香港電影金像獎今日(2月6日)公布提名名單,《毒舌大狀》獲10項提名,包括「最佳電影」、「最佳導演」、「最佳編劇」、「最佳攝影」、「最佳剪接」、「最佳美術指導」、「最佳服裝造型設計」、「最佳動作設計」、「最佳音響效果」及「最佳視覺效果」。
![《毒舌大狀》](https://image.bastillepost.com/1200x/wp-content/uploads/hongkong/2024/02/20240206_EN_毒舌大狀01_source-web_.jpg.webp)
《毒舌大狀》
首度入圍「最佳男主角」的黃子華表示:「好開心,多謝大家支持!」而獲提名「最佳女主角」的王丹妮則表示:「剛剛收到消息,喺今屆金像獎獲得最佳女主角嘅提名,我自己冇估到,覺得好驚喜。今年有好多好出色嘅電影同角色,自己好榮幸可以同咁多位出色嘅人一齊獲得提名,我好感恩。一定要多謝安樂電影,多謝江老闆,多謝監製Ivy,同埋導演Jack(吳煒倫),好多謝佢比呢個機會我,去演呢個咁有挑戰性嘅角色,好多謝拍攝團隊嘅每一位,我好感恩可以同團隊裡面嘅每一位一齊共事。毒舌大狀能夠有咁好嘅成績好多謝每一位入戲院支持嘅觀眾。毒舌嘅每一位都好努力,能夠拎到咁多個提名,我好希望導演、子華,Fish(廖子妤),Renci(楊偲泳),君豪哥都可以攞到獎,另外亦都好期待可以同毒舌嘅團隊一齊行紅地毯,去感受今次嘅盛事。依家嘅我正身處多明尼加共和國,雖然好遠,但都感受到大家滿滿嘅愛同支持,毒舌係我第二部電影,大家見證住我嘅成長。所以好多謝大家,我會繼續努力。」
![《毒舌大狀》劇照](https://image.bastillepost.com/1200x/wp-content/uploads/hongkong/2024/02/20240206_EN_毒舌大狀02_source-web_.jpg.webp)
《毒舌大狀》劇照
![《毒舌大狀》劇照](https://image.bastillepost.com/1200x/wp-content/uploads/hongkong/2024/02/20240206_EN_毒舌大狀03_source-web_.jpeg.webp)
《毒舌大狀》劇照
![《毒舌大狀》劇照](https://image.bastillepost.com/1200x/wp-content/uploads/hongkong/2024/02/20240206_EN_毒舌大狀04_source-web_.jpg.webp)
《毒舌大狀》劇照
![《毒舌大狀》劇照](https://image.bastillepost.com/1200x/wp-content/uploads/hongkong/2024/02/20240206_EN_毒舌大狀05_source-web_.jpg.webp)
《毒舌大狀》劇照
入圍「最佳女配角」的楊偲泳表示:「感恩!希望大家可以一齊上台,我真係好愛好愛毒舌呢個family!!」同樣憑《毒舌大狀》入圍「最佳女配角」的廖子妤就自言興奮到語無倫次,「呢部戲真係對我嚟講係其中我演藝事業一個幾重要嘅里程碑,《毒舌大狀》除咗喺票房上面得到好好嘅成績,同埋我哋依家喺金像獎又得到咁多項嘅提名。因為真係好開心,我哋團隊當時拍攝嘅時候個合作嘅氣氛都係好開心,每日就係返去就係講緊個劇情,點樣去做得好啲、點樣去完成個角色,咁大家嘅相處又非常之開心。我覺得首先我真係要多謝江老闆,因為佢已經畀咗好好幾次機會我,好幾次都係好好嘅角色,上次我攞獎《梅艷芳》,咁今次毒舌,咁我都好多謝安樂電影,好多謝導演Jack,佢可以有提名係我真係非常之開心,因為同導演係合作得好愉快,我喺導演身上係得到好多力量嘅,同埋要多謝我啲對手,我真係好開心子華可以有個影帝嘅提名,跟住my friend、我嘅好姊妹王丹尼,同埋Renci,即係我哋合作都真係非常之開心,所以我唔知,我好期待我哋一齊著得靚靚,一齊去行紅地氈,一齊去享受金像獎嗰一日囉。」
![《毒舌大狀》劇照](https://image.bastillepost.com/1200x/wp-content/uploads/hongkong/2024/02/20240206_EN_毒舌大狀06_source-web_.jpeg.webp)
《毒舌大狀》劇照
![《毒舌大狀》劇照](https://image.bastillepost.com/1200x/wp-content/uploads/hongkong/2024/02/20240206_EN_毒舌大狀07_source-web_.jpg.webp)
《毒舌大狀》劇照
![《毒舌大狀》劇照](https://image.bastillepost.com/1200x/wp-content/uploads/hongkong/2024/02/20240206_EN_毒舌大狀08_source-web_.jpg.webp)
《毒舌大狀》劇照
![《毒舌大狀》劇照](https://image.bastillepost.com/1200x/wp-content/uploads/hongkong/2024/02/20240206_EN_毒舌大狀09_source-web_.jpeg.webp)
《毒舌大狀》劇照
而獲提名「最佳男配角」謝君豪就表示:「好開心!多謝所有投票俾「金遠山」的電影人,《毒舌大狀》喺舊年年初上映時得到很好的成績,之前亦剛剛亦憑呢個角色拿到新時代國際電影節最佳男配角,多謝大家支持!好開心,另一方面好刺激,因為今年男配角提名高手如雲,能夠有份提名,與有榮焉。多謝導演吳煒倫寫左一個咁好嘅劇本,同埋俾一個咁好嘅機會我去演繹呢個角色,今次《毒舌大狀》獲得10項提名!真系好開心!我會繼續努力,多謝!」至於《毒舌大狀》導演吳煒倫就同時獲提名「最佳導演」、「新晉導演」,他表示:「所有演員獎都入晒,我好開心。」
![《毒舌大狀》劇照](https://image.bastillepost.com/1200x/wp-content/uploads/hongkong/2024/02/20240206_EN_毒舌大狀10_source-web_.jpeg.webp)
《毒舌大狀》劇照
![《毒舌大狀》劇照](https://image.bastillepost.com/1200x/wp-content/uploads/hongkong/2024/02/20240206_EN_毒舌大狀11_source-web_.jpg.webp)
《毒舌大狀》劇照