巴黎奧運丨方力申20年參與4屆奧運謙稱經驗尚淺鍾志光以「乒乓嫲嫲」為喻大拋「開心享受論」

娛圈事

巴黎奧運丨方力申20年參與4屆奧運謙稱經驗尚淺鍾志光以「乒乓嫲嫲」為喻大拋「開心享受論」

2024年08月12日 16:30 最後更新：08月13日 12:03

一眾奧運主持分享感受。

一連兩周的巴黎奧運圓滿落幕，於今晨（8月12日）香港時間3點於巴黎法蘭西體育場舉行閉幕，除了有荷里活巨星湯告魯斯（Tom Cruise）負責傳遞奧運會旗到美國洛杉磯外，美國方面的表演嘉賓亦巨星雲集，包括美國知名歌手Billie Eilish、美國知名Rapper Snoop Dogg和Dr. Dre、美國樂隊Red Hot Chili Peppers，及比利時歌手Angèle、法國樂隊Air等。

點擊看圖輯

巴黎奧運閉幕喇！

閉幕禮好多嘢睇。

湯告魯斯大晒好身手！

Billie Eilish

Snoop Dogg

Dr. Dre

小方同翠如隔空同巴黎特派專員傾偈。

小方分享獨家訪問拖延時間大法。

翠如喺巴黎工作都有好深感受，佢自爆睇江旻憓比賽緊張到胃痛。

鍾仔主持咗9屆奧運，佢話今屆感受特別深。

朱凱婷連續5屆主持奧運，佢喺社交網分享歷屆奧運相片。

無綫巴黎奧運特派專員方力申（小方）與黃翠如，在閉幕儀式開始前現身香港直播室分享採訪感受。由於上屆東京奧運是閉門作賽，小方直言今屆奧運比起上屆氣氛熱鬧得多，現場觀眾更不斷玩人浪將氣氛推至最高。擁有四屆奧運採訪經驗的小方，談到今屆獲封「採訪界世一」時謙虛表示：「我年紀大，四屆即係橫跨20年，20年做4次其實好冇經驗。」

小方續指自己頭兩屆奧運僅為游泳賽事擔任旁述，直到上屆和今屆奧運才真正擔任採訪工作，笑言今屆不少獨家採訪均遇上「催時間專員」，小方還大方分享了獨門拖延時間大法：「每次運動員埋嚟做訪問，都係得兩、三分鐘，試過有人掂我摸我示意要走。咁每次完咗，我都會好有禮貌話唔好意思，頭先冇應你因為做緊live，因為唔可以得罪佢，嗰個地方佢管。然後又送個pin畀佢，希望佢下次唔好篤我。」

翠如則自認在眾「特派專員」中相對較chill，小方聞言即透露翠如撰稿、導演、收音師角色一腳踢，曲線表達對翠如努力的欣賞；翠如表示能親眼見證巴黎奧運很感恩，談及運動員的努力時更一度感觸至眼濕濕：「我一路喺側邊睇住小方佢哋做訪問，第一身見證運動員流下嘅眼淚，作為觀眾好感動。」她又指很難忘在巴黎大皇宮現場直擊「微笑劍后」江旻憓奪金：「現場睇好震撼，因為主場（給予的無形）壓力好誇張，四周圍都係法國觀眾，不停𨂽地去為法國運動員加油，相對現場嘅香港人好少，我哋就不停嗌，我喺現場就不斷咁胃痛，去到後尾（江旻憓）攞獎，全部香港人攬埋一齊真係好感動！」

而第9屆擔任奧運主持的鍾志光（鍾仔），則以四個字「感慨良多」概括今屆主持感受，並以「開心乒乓嫲嫲」倪夏蓮比喻自己對主持奧運的享受：「乒乓嫲嫲參加咗6次奧運，今年61歲，正所謂『人生如此自可樂，豈必局束為人鞿』，最緊要做到自己開心快樂。」談到今屆因連踩十多小時主持奧運惹關注，鍾仔再次感謝幕後同事關照：「佢哋時間安排得好恰當，等我可以有得瞓。有人話見到你仲要拍《愛．回家》，你知唔知我嗰日幾好，劇組特登畀我遲少少到，兼且跳拍我嘅部分先，等我可以早D休息，係完全群策群力先有嘅效果。」

鍾仔又感性表示懷念昔日鐵腳好拍檔鍾伯光，「同佢做咗八屆奧運，都係坐我隔籬，今屆佢冇同我哋一齊做，冇喺我隔籬都係心有戚戚焉，鍾教授努力、加油！」至於連續主持五屆奧運、與鍾仔同為資深主持的朱凱婷，則在社交網亦分享了歷屆奧運的珍貴相片，留言：「莫名其妙嘅感動！」

Tags:

奧運會奧運閉幕閉幕禮

往下看更多文章

TVB台慶｜18位藝人拍攝宣傳片分享「TVB精神」視帝黎耀祥打頭陣大談演藝樽頸位

2024年11月12日 15:00 最後更新：17:26

一年一度盛事《萬千星輝賀台慶》將於11月19日晚假將軍澳電視廣播城隆重舉行。

為慶祝無綫踏入57周年台慶，今年的主題是「同一家人，與你前行」，今年除了接近300位合約藝人及昔日無綫藝人好友會雲集電視廣播城「回家」助慶，並邀得18位代表不同年齡層及界別的藝人朋友，與觀眾分享他們透過在TVB的成長及經歷、所體驗得來的「TVB精神」。

18位藝人分別為（排名不分先後）黎耀祥、黃翠如、林盛斌（Bob）、黎寬怡、蔡思貝、汪明荃、王祖藍、李思捷、阮兆祥、車婉婉、陳㦤德、譚輝智、錢嘉樂、高海寧、周吉佩、C君、陸浩明及莊子璇，一系列宣傳片由昨晚（11日）開始陸續於翡翠台黃金時段內播放，而昨晚（11月11日）打頭陣與大家分享在TVB成長經歷的，是台慶劇《巾幗梟雄之懸崖》男主角—黎耀祥！

先後憑《巾幗梟雄》第一、二季及《大太監》三奪《萬千星輝頒獎典禮》最佳男主角的祥哥，由1986年起開始拍劇生涯，轉眼在電視圈打滾了38個年頭。祥哥在台慶宣傳片中坦言從演多年確實遇過樽頸位：「我入行做咗十幾年閒角，先至可以叫做升上配角嘅位，又做十幾年嘅配角，先至可以做到主角，當時自己都有啲深深不忿，因為覺得自己好盡力，人哋對我評價又幾好，點解唔可以進一步呢？」

祥哥又謂幸好自己有堅持下去，並以「儲印花」來比喻不放棄及繼續努力的重要性：「人生好似我哋去超級市場買嘢儲印花，當你儲夠印花，先可以換到禮物。換印花嘅過程其實好長，如果你半途而廢、唔儲夠足夠印花，你所有印花就會變成廢紙。所以我依家都仲儲緊我人生嘅印花，可能十年、二十年後，我又可以換到上天畀我嘅一份禮物。」

今晚（11月12日）接棒播出的黃翠如，分享主題為「開心」及「笑容」，內容結集了翠如以往拍攝旅遊節目的見聞及感受，相當感性；而星期三（13日）、四（14日）及五（15日）播出的，分別是林盛斌（Bob）、蔡思貝及黎寬怡（貓仔）的分享。

在主持《360秒人生課堂》時已充份展現了說故事能力、及對人生哲理的追求的阿Bob，在台慶宣傳片中分享自己如何由唔怕蝕底、到變成今日所有人眼中幸運兒的經歷及心路歷程，當中一句：「明知件事幾咁搵笨都好，畀心機，盡心盡力咁去做，個天係會睇到，有一日，佢會用一個你意想不到嘅方式，透過某啲途徑，回報番去你身上。」發人深省。

蔡思貝的分享主題是Team Work，相關宣傳片曝光了不少思貝拍攝《與天地對話》時的幕後花絮；至於貓仔，則會分享擔任了七年《東張女神》的苦與樂，貓仔指做了《東張》多年，身邊不斷有朋友問「做藝人咁辛苦為乜」，但一路以來的「東張經驗」，讓她覺得再危險、再污糟的採訪經歷，也會是得多於失：「親眼見證過太多被逆轉嘅生命故事，我永遠都忘記唔到佢哋嘅眼淚同笑容。」

你或有興趣的文章

巴黎奧運丨方力申20年參與4屆奧運謙稱經驗尚淺 鍾志光以「乒乓嫲嫲」為喻大拋「開心享受論」