一位港男去年在討論區上發文,稱想尋回離世10年妹妹的公仔遺物。事隔1年,他向網民更新進度。然而,高得離譜公仔售價則引來大批網民討論。
妹妹10年前離世 港男重酬搵妹妹遺物
去年一位港男在討論區上發文,指妹妹離世10年,留下約30隻公仔。可惜,公仔都被母親棄置。他認為公仔滿載兄妹間的回憶:「細個時會拎佢哋嚟教妹妹做功課同埋氹佢,亦成日同妹妹一齊講啲公仔嘅嘢,佢哋每一隻都有自己嘅名同埋性格,喺我同妹妹心目中,佢哋唔係公仔,而係動物」。因此,決定在討論區上發文,盼能以重酬尋回妹妹遺物。
事隔1年有新進展 真金白銀買回公仔
事隔1年,發文者在討論區主動更新近況,指自己在這1年間已斷斷續續尋回不少公仔。當中有3隻公仔「失而復得」,其中一隻綿羊公仔則以2,000元從一名網民手中買入,而另外兩隻則分別是由熱心女網民送贈及在二手網店購買。同時,他亦成功尋獲5隻與妹妹同款、但並無遺失的公仔,當中兩隻分別以1,500元及2,000元向網民購買,其他則由熱心網民送贈。
高價引網民爭議 明買明賣VS不近人情
有網民就認為公仔價格太高,「2,000元一隻公仔太貴」、「收樓主$2,000個啲人真係……」、「畀我都唔好意思收足,收$500乜都夠啦」、「乘人之危」。
不過都有網民覺得收足錢反而對發文者更好,「明買明賣,有乜問題」、「如果隻公仔本身都係由細玩到大,你俾得嗰幾百蚊真係未必會賣俾你」、「樓主開心,用2000蚊搵到滿足感」、「賣家開心,收到二千蚊亦搵到滿足感」。
心水清網民:快啲助力樓主好過
兩方各有理據,不過亦有人清醒地點出:「與其喺度嘈啲公仔值唔值幾千蚊,不如發揮連登之力幫樓主盡快搵齊啲公仔,而家大部分留言都係嘈應唔應該收錢,想幫手都追唔到post」。
網民留言送祝福
另外亦有網民認為樓主應該放下,不要再執著。樓主亦大方承認自己有看心理醫生,處理妹妹離世帶來的情緒,因此不少人留言送上祝福,「好感動 希望你可以願望成真」、「搵呢個過程已經變咗舊(樓)主嘅心靈支柱,時間過去,真係唔會再講咩就算搵返啲公仔都唔係你個妹嘅/放低,嗰啲3篤屁,樓主加油。」。