許靖韻錄新歌靠聽容祖兒《出賣》入戲 自揭作賤自己經驗豐富

繼《望年月》和《被吃掉的靈魂》後，許靖韻推出今年第三首廣東歌作品《作賤》，歌曲由KW朱敏希作曲、張楚翹填詞、廖志華監製、黃兆銘編曲。

許靖韻推出今年第三首作品《作賤》。

許靖韻（Angela）表示歌曲靈感是從她一聽到這首歌的demo開始，「一聽到demo我個腦入面淨係出現咗一個『賤』字！哈哈，好賤！係一個好犯賤嘅感覺，喺感情裏面係飾演緊一個好卑微、犯賤嘅一方。」之後她便找來跟她合作無間的填詞人張楚翹主理新歌歌詞。

觀看相關影片按連結：https://youtu.be/MQdbIaRXfko

Angela透露為了更加投入，錄音時一直聽着容祖兒的《出賣》幫助「入戲」，「我好鍾意呢首歌，而家個feel亦好中，雖然歌詞唔同，但成個意境就係呢個感覺，真係心慘絕人寰㗎。」問到在愛情中有否作賤自己的經歷，Angela笑言「經驗豐富」，「中學嘅時候冇乜錢，雖然我冇試過做幾份兼職買禮物俾對方，但我試過連續好多日捱肚餓、同人share lunch，儲錢買波鞋俾當時嘅初戀。另外一件作賤自己嘅經歷都係中學發生，我諗係比較細個先會失去理智咁樣瘋狂打好多次電話，就好似MV入面咁樣，瘋狂打好多次電話俾對方，呢一種都係比較卑微嘅感情狀態。」

Angela為了更加投入，錄音時一直聽着容祖兒的《出賣》幫助「入戲」。

又笑言在愛情中作賤自己的經歷「豐富」。

Angela繼續「滔滔不絕」分享，「同對方鬧交，每一次都係我認錯先，每一次分手都係我去氹番對方先，試過直程去對方屋企搵對方復合，而家諗返起嗰陣時都係作戰自己嘅經歷，哈哈。」

Angela繼續「滔滔不絕」分享作賤自己的經歷。

來到年尾，總結今年，Angela坦言過得十分充實，推出了三首歌曲、又舉行了巡迴音樂會、亦作出新嘗試跟品牌合作推出自家設計的服飾，「回望2024 ，真係覺得太快，我而家仲覺得好似過緊暑假。今年好開心有三首歌，亦都係自己鍾意嘅作品，雖然主題都係比較sad，但都係自己比較擅長嘅曲風。」Angela又謂透過巡演，更能直接知道觀眾的喜好，並且有新發現，「抒情歌同埋Ballad都會係我最擅長同埋大家喜愛嘅曲風，但喺今年巡演上唱《琢磨》嘅時候，觀眾係好有反應，亦都好有氣氛，所以嚟緊有機會想再做一首偏搖滾小小嘅一首歌。」

Angela對今年推出三首歌曲又舉行了巡迴音樂會感到開心。

並透露計劃再做一首偏搖滾小小的歌。

許靖韻（Angela）於今年四月開始在內地舉行巡迴音樂會，首場的廣州站，Angela已經爆喊，估不到日前的尾站東莞場，Angela又再爆喊，認真係「由頭喊到尾」。

Angela由首站的廣州場，喊，喊到尾站東莞場。

Angela表示今場十分感動，因為這次跟觀眾距離十分接近，「近到坐第一行嘅觀眾講嘢都聽到，好難得個舞台同觀眾、歌迷咁近距離，大家成個感覺係同佢哋好close，佢哋每一個樣我都睇得好清楚。」亦因為這樣，所以當全場大合唱時，Angela感動得淚如雨下，「第一個感動位係唱《別為我好》，因為今次我除低咗一邊耳機，咁近距離，聽到佢哋唱歌聽得好清楚，《別為我好》同《謝謝對不起》佢哋一齊大合唱，同埋因為我冇諗過《情歌之後》都全場大合唱，嗰個大聲程度係大過《別為我好》，所以忍唔住喊咗出嚟。」

東莞場與觀眾距離十分接近。

Angela直言好難得！

Angela坦言沒想過這場會喊，更因為這是今年的最後一場，所以特別穿上紅色衫，希望以開心的心情作一個總結，她又感謝歌迷，「多謝茶茶們（歌迷名稱）每一站為自己準備唔同嘅應援物同打卡點，仲會開show前喺場館外設立應援物交換點，好sweet。」雖然完成尾站，但Angela已急不及待自爆明年的計劃，「同茶茶們（歌迷名稱）暫別音樂會舞台，2025年會再開，希望快啲可以公佈日子。嚟緊都有好多唔同嘅舞台演出機會，到時會同大家再見。」

Angela自爆明年會再開騷，亦有很多不同的舞台演出機會。

大合照

除此之外，原來開show之，大量歌迷留言給Angela表示要一嚐東莞燒鵝瀨，所以開show前，Angela特別搵同事「撲」了一碗，「因為完show就即刻走，所以開show前食。我哋係全體！係全體同事都一齊食燒鵝瀨，大家都覺得超好食！我都係第一次食東莞燒鵝瀨，真係覺得好好食！係好唔同嘅，嗰個粉係好唔同。」十分搞笑。

Angela同自己的Backdrop打卡。