網傳新城大裁員 營運總裁馬浚偉稱非事實：唔好亂作啦

馬浚偉奉勸大家不要亂信流言，小心別誤墮陷阱！

就近日有網民在社交平台發放假消息，指新城廣播大裁員，新城廣播有限公司首席營運總裁馬浚偉與新城多位管理層、節目主持紛紛在個人社交平台出Po剝花生！馬浚偉留言：「我哋新城廣播並冇裁員，唔好亂作啦。」馬浚偉再稱：「現在科技發達，假訊息、假資訊隨時可以誤導讀者！要進行抹黑或者攻擊行為，網絡實在有太多方法！當然我奉勸大家不要亂信，亦要小心別誤墮陷阱！當然更重要嘅，係繼續留意同支持我哋新城廣播和MBOTV! 哈哈，多謝大家！」

馬浚偉否認新城大裁員。

馬生還奉勸大家不要亂信流言。

MBO TV台長兼創作總監葉文輝（啤梨）亦出Po：「睇到關於新城嘅花生真係得啖笑，連我日日返工都唔知，大家笑完好快啲聽我節目同睇MBO TV嘞。」

知訊台台長程凱欣也出Po：「身體同一間公司一樣，要健康茁壯成長，也不能讓不真嘅消息蔓延。近日收到 有WhatsApp問到關於新城傳出裁員消息，辟谷對身體有很多好處，同樣「辟謠」也重要，不能讓不盡不實，流言蜚語發酵蔓延。」

葉文輝（啤梨）話傳聞「得啖笑」。

財經台台長魏美珍與主持胡孟青在財經台「開市直擊」節目中，也踢這則流料：「網民留言話MBO TV，聽都未聽過，實在太難過喇。咁落力演出竟然無人知？咁就等我再次介紹一下MBO TV，有聲、有畫；可以聽、可以睇！專業分析、貼地演繹！以後記得逢港股交易日上午11時至12時收睇直播，支持我地！
近日太多朋友問到公司裁員消息，無法逐一澄清，請大家準時收聽同收睇「開市直擊」揾答案！」

范振鋒今日與思敏返新城主持《開心大派對》節目，阿范表示一路無聽過新城裁員。

思敏FB

新城廣播藝人經理人及項目總監范振鋒今日與思敏返新城主持《開心大派對》節目，阿范表示一路無聽過新城裁員，反而見到公司（新城）最近請咗好多人：「依家要做假新聞好容易，搵鍵盤戰士打手。反而自從COO馬生入主電台後，電台新景氣，改革好咗好多，新城多咗好多活動及宣傳，生氣好好多，11月其中有一日，連搞三單event，大家嘅士氣好好。」阿范更歡迎發放假消息的人聯絡他：「放假消息朋友，有咩唔明或誤會，可以搵我，我可以安排當面搵馬生傾下。」

思敏反而欣賞：「馬生好肯用錢在科技上。」更在社交平台出Po：「如果新城有吉位多出嚟，我絕對會將我嘅私人物品擺喺公司，慳返啲。可惜！我依家要繼續借迷你倉，因為個個位都有人㗎！」

知訊台台長程凱欣指，不能讓不盡不實流言蜚語蔓延。

胡孟青

希望有大團圓結局喇！

黎耀祥和胡定欣日前（11月12日）到新城廣播接受薛家燕、范振鋒及思敏主持的《開心大派對》之「開心家訪」訪問，宣傳熱播劇《巾幗梟雄之懸崖》，該劇下周五（22日）將迎來大結局，劇情亦開始進入高潮，祥仔和定欣在訪問中無意中劇透，但對於「七爺」（胡定欣飾）和「柴十七」（黎耀祥飾）能否開花結果則守口如瓶，並大賣關子表示：「大家睇啦！」

黎耀祥和胡定欣接受新城《開心大派對》節目訪問。

祥仔和定欣透露《巾幗梟雄之懸崖》在橫店拍攝了兩個半月，今次亦是兩人第8次合作，所以充滿默契。提到角色名字柴十七的由來，祥仔直言自己也有問過編劇張華標，「因為好多人對呢個問題好有興趣，我就問標哥點解係十七？唔係十五或者十六？標哥話佢查過《易經》，十七係代表堅定不移、勇往直前。」祥仔又認為柴十七的角色既寫實又充滿人性，「好多人都會問柴十七點解成日話辭職，但又要返去，其實我哋每日返工都唔想撈，最後總會有啲原因令到你又會返工。」

宣傳熱播劇《巾幗梟雄之懸崖》。

蕭正楠在劇中有3個角色，祥仔和定欣忍不住爆料，「大家眼見嘅有三個，佢用三個身份出現，但質實只係兩個人，我哋開頭拍都有啲亂，會問佢究竟係邊個，哈哈。」定欣又十分開心每日開工都有靚衫著，「一日十幾場戲，好彩劇組已經幫我安排好，唔需要我自己記住要著邊一套，我就好似個模特兒咁，換完就出嚟，好似fashion show，有成三十套靚衫。」

七爺和柴十七由最初的互不信任，到後來出生入死互相扶持，兩人內心都有對方，定欣續說：「之後柴十七去咗香港，我有時會去探佢，大家好似好掛住對方，但我又有大病，子彈碎片會影響記憶，自己唔想拖累佢。」祥仔更形容：「都幾夭心夭肺。」范振鋒問兩人最後是否走在一起？定欣和祥仔異口同聲表示：「大家睇啦！」

胡定欣大爆七爺同柴十七分隔兩地。

祥仔：「都幾夭心夭肺！」

詳細節目內容，請留意 11 月 16 日，3-4時，新城知訊台《開心大派對》節目，網址：
https://www.metroradio.com.hk/MetroInfo/